ភ្នំពេញ ៖ ករណីគ្រោះថ្នាក់ចរាចរណ៍រវាងរថយន្តម៉ាកហុងដា CIVIC ពន្លះជាមួយនឹងរថយន្តដឹកឥដ្ឋពេញទំហឹង បណ្ដាលឱ្យរថយន្តដឹកឥដ្ឋដាច់កង់ក្រោយ សំណាងគ្មានអ្នករងរបួស។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង ៩នឹង៣០ នាទីព្រឹកថ្ងៃទី ២៨ ខែមករាឆ្នាំ ២០២១ ស្ថិតនៅតាមបណ្ដោយផ្លូវ ៦០ម៉ែត្រ ភូមិព្រែកតាគង់៣ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
អ្នកបើកបររថយន្តដឹកឥដ្ឋមានឈ្មោះ ហក ហុន ភេទប្រុស អាយុ៣៧ឆ្នាំមុខរបរបើកបរ មានស្រុកកំណើតនៅ ភូមិក្រាំងចិន ឃុំក្រាំងត្រយ៉ង ស្រុកពាមជរ៍ ខេត្តព្រៃវែង។
នារីបើកបររថយន្តម៉ាក ហុងដា CIVIC មានឈ្មោះ ថូយ ណងស៊ីម អាយុ២០ឆ្នាំមុខរបរសិស្សស្នាក់នៅភូមិទ្រា សង្កាត់ស្ទឹងមានជ័យទី១ ខណ្ឌមានជ័យ។
តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុគេបានឃើញរថយន្តដឹកឥដ្ឋមួយគ្រឿងហ៊ីយ៉ាន់ដាយ ពណ៌ ស ពាក់ស្លាលេខភ្នំពេញ3C-4995 បើកបរដោយបុរសម្នាក់ រួមដំណើរជាមួយកម្មករប្រុសស្រី៣នាក់ទៀត ជិះលើឥដ្ឋនៅខាងក្រោយ ធ្វើដំណើរតាមបណ្ដោយផ្លូវ ៦០ម៉ែត្រ ក្នុងទិសដៅពីជើងទៅត្បូង ខណៈមកដល់ចំណុចកើតហេតុ ក៏មានរថយន្តមួយគ្រឿងម៉ាកហុងដា CIVIC ពណ៌សពាក់ផ្លាកលេខភ្នំពេញ 2BC-0279 បើកបរដោយនារីរូបស្រស់ម្នាក់ ក្នុងល្បឿនលឿនបញ្ច្រាសទិសគ្នា បានរេចង្កូតមកឆ្វេងដៃបុកចំកង់ក្រោយរថយន្តដឹកឥដ្ឋ បណ្ដាលឲ្យដាច់កង់ក្រោយរថយន្តដឹកឥដ្ឋអូសជាច្រើនម៉ែត្រ សំណាងដែលរថយន្តមិនក្រឡាប់ ចំណែករថយន្តហុងដា រងការខូចខាតផ្នែកខាងមុខចំហៀងខាងឆ្វេងយ៉ាងដំណំ ហើយករណីគ្រោះថ្នាក់ចរាចរណ៍ខាងលើនេះ មិនបណ្ដាលឲ្យមានអ្នករងរបួសនោះទេ។
ក្រោយកើតហេតុកម្លាំងសមត្ថកិច្ចមូលដ្ឋាន បានចុះមកដល់ទីតាំងកន្លែងកើតហេតុ ជួយសម្រួលចរាចរណ៍បញ្ចៀសការកកស្ទះ នឹងសហការជាមួយសមត្ថកិច្ចជំនាញចរាចរណ៍ក្រុង ធ្វើការវាស់វែងស្ទូចយកទាំពីរគ្រឿង ទៅក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរជធានីភ្នំពេញ រង់ចាំដោះស្រាយគ្នានៅពេលក្រោយ៕ រក្សាសិទ្ធិដោយ៖មីដា ផាន់ណា
