ភ្នំពេញៈ ក្រុមមន្ត្រីជាន់ខ្ពស់ នៃអតីតគណបក្សសង្គ្រោះជាតិ នឹងយកពាក្យស្នើសុំបង្កើតគណបក្សថ្មីទៅដាក់នៅក្រសួងមហាផ្ទៃនាសប្តាហ៍នេះ។ ការបង្កើតគណបក្សថ្មីនេះ គឺដើម្បីចូលរួមការបោះឆ្នោតក្រុមប្រឹក្សាឃុំ សង្កាត់ និងបោះឆ្នោតជ្រើសតាំងតំណាងរាស្ត្រនាឆ្នាំ២០២៣ ខាងមុនេះ។
លោក អ៊ូ ច័ន្ទរ័ត្ន មន្ត្រី នៃអតីតគណបក្សសង្គ្រោះជាតិ បានឲ្យដឹងថា ការបង្កើតគណបក្សថ្មីនេះ បានសម្រេចយកឈ្មោះជាផ្លូវការហើយ គឺគណបក្ស “កែទម្រង់កម្ពុជា” ដោយកំពុងតែរៀបចំបញ្ជី និងឯកសារដើម្បីដាក់ទៅក្រសួងមហាផ្ទៃនៅសប្តាហ៍នេះ។ ចំណែករូបសញ្ញាគណបក្ស“កែទម្រង់កម្ពុជា” គឺមានរូបព្រះអាទិត្យ និងក្បាលដំរីបួងផ្កាឈូកបីដើម។
លោកបានបញ្ជាក់ថា ការបង្កើតគណបក្សថ្មីនេះ គឺមានអតីតមន្ត្រីជាន់ខ្ពស់ នៃអតីតគណបក្សសង្គ្រោះជាតិ មួយចំនួនបានមកចូលរួមជាមួយ ប៉ុន្តែនៅក្នុងការបង្កើតគណបក្សថ្មីនេះ គឺលោកមិនមែនជាបេក្ខភាពប្រធានគណបក្សនោះទេ ពីព្រោះមានបុគ្គលដែលអាចនឹងចេញមកដឹកនាំគណបក្សថ្មីនេះ។
សូមជម្រាបថា លោក អ៊ូ ច័ន្ទរ័ត្ន អតីតតំណាងរាស្ត្រ នៃអតីតគណបក្សសង្គ្រោះជាតិ ទទួលបាននីតិសម្បទាឡើងវិញកាលពីថ្ងៃទី១៩ ខែមីនា ឆ្នាំ២០១៩។ ក្រៅពីនេះ ក៏មានអតីតមន្ត្រីជាន់ខ្ពស់ចំនួន ១២រូបផ្សេងទៀតក៏ទទួលបាននីតិសម្បទាឡើងវិញដែរ។ ក្នុងចំណោមអ្នកទទួលបាននីតិសម្បទាឡើងវិញនោះ គឺមានលោកជីវ កត្តា បានបង្កើតគណបក្សខ្មែរស្រឡាញ់ជាតិ , លោករៀល ខេមរិន្ទ្រ បង្កើតគណបក្សខ្មែរអភិរក្សនិយម។ ចំណែកលោកគង់ គាំ បានទៅចូលរួមជាមួយគណបក្សឆន្ទៈខ្មែរ ដែលបង្កើតឡើងដោយលោកគង់ ម៉ូនីកា កូនប្រុសបង្កើតរបស់លោក។
ចំណែកលោកសុខ ឥសាន អ្នកនាំពាក្យណបក្សប្រជាជននកម្ពុជា បានថ្លែងថា បើក្រុមមេដឹកនាំអតីតបក្សប្រឆាំងចង់បង្កើតគណបក្សថ្មី គឺអាចបានដោយប្រើឈ្មោៈថ្មី។ តែអ្នកដែលជាប់បម្រាមធ្វើនយោបាយ មិនអាចមានវត្តមានក្នុងបក្សថ្មីនេះបានទេ រហូតដល់អស់រយៈពេលកំណត់។ ប៉ុន្តែអ្នកផ្សេងដែលមានឈ្មោះផ្សេង អាចបង្កើតគណបក្សប្រឆាំងថ្មីបានដែលមានគោលនយោបាយដោយឡែកមួយ។ តែបើឲ្យអ្នកផ្សេងឈរឈ្មោះឲ្យគណបក្សផ្សេង គឺជាអាចបានគ្រាន់តែអតីតមេបក្សនោះទុកចិត្តប្ញមិនទុកចិត្តប៉ុណ្ណោះ៕ រក្សាសិទ្ធិដោយៈ ចេស្តារ