ភ្នំពេញៈ នៅថ្ងៃទី១ ខែកុម្ភៈ នេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាកម្ពុជា និងជាប្រធានគណបក្សប្រជាជនកម្ពុជា បានផ្ញើលិខិតអបអរសាទរចំពោះលោក ង្វៀន ហ្វ៊ូចុង ដែលត្រូវបានជ្រើសតាំងសាជាថ្មីជាអគ្គលេខាធិការមជ្ឈិមបក្ស នៃគណៈកម្មាធិការមជ្ឈិមបក្សកុម្មុយនិស្តវៀតណាម កាលពីថ្ងៃទី៣១ ខែមករា ឆ្នាំ២០២១។
នៅលិខិតរបស់សម្តេចតេជោ ហ៊ុន សែន ផ្ញើជូនលោក ង្វៀន ហ្វ៊ូចុង មានខ្លឹមសារយ៉ាងដូច្នេះថា “តាងនាមអោយគណៈកម្មាធិការកណ្តាល នៃគណបក្សប្រជាជនកម្ពុជា និងរូបខ្ញុំផ្ទាល់ ខ្ញុំមានសេចក្តីសោមនស្សរីករាយយ៉ាងខ្លាំង សូមផ្ញើជូននូវអំណរសាទរយ៉ាងស្មោះស្ម័គ្រ និងកក់ក្តៅបំផុតជូនចំពោះ ឯកឧត្តម ក្នុងឱកាសដែលឯកឧត្តមត្រូវបានបោះឆ្នោតជ្រើសតាំងសាជាថ្មីជាអគ្គលេខាធិការមជ្ឈិមបក្ស នៃគណៈកម្មាធិការមជ្ឈិមបក្សកុម្មុយនិស្តវៀតណាមអាណត្តិទី១៣ នៅមហាសន្និបាតបក្ស កាលពីថ្ងៃទី៣១ ខែមករា ឆ្នាំ២០២១។ ការជ្រើសតាំងឯកឧត្តមសាជាថ្មីនេះ បានឆ្លុះបញ្ចាំងនូវទំនុកចិត្ត និងការជឿជាក់របស់បក្សកុម្មុយនិស្ត និងប្រជាជនវៀតណាម ចំពោះការដឹកនាំដ៏ឈ្លាសវៃ និងប្រកបដោយសមត្ថភាពរបស់ឯកឧត្តម ដើម្បីបន្តអភិវឌ្ឍសេដ្ឋកិច្ច -សង្គមប្រកបដោយជោគជ័យ និងរក្សាសន្តិភាព ស្ថិរភាព និងវិបុលភាពយូរអង្វែងរបស់ប្រទេសវៀតណាម។ ខ្ញុំមានជំនឿជឿជាក់យ៉ាងមុតមាំថា ក្រោមការដឹកនាំរបស់ឯកឧត្តម បក្សកុម្មុយនិស្តវៀតណាម នឹងបន្តអនុវត្ត នូវគោលនយោបាយ និងសេចក្តីសម្រេចសំខាន់ៗ ដែលត្រូវបានអនុម័តនៅក្នុងមហាសន្និបាតបក្សលើកទី១៣ ប្រកបដោយជោគជ័យធំធេងថែមទៀត។ នៅក្នុងអាណត្តិថ្មីរបស់ឯកឧត្តម សម្តេចមានជំនឿជឿជាក់ថា ចំណងមិត្តភាពជាប្រពៃណី សាមគ្គីភាព និង ទំនាក់ទំនងដ៏ជិតស្និទ្ធរវាងគណបក្សប្រជាជនកម្ពុជា និងបក្សកុម្មុយនិស្តវៀតណាម នឹងត្រូវបានបន្តពង្រឹង និង ធ្វើអោយកាន់តែស៊ីជម្រៅបន្ថែមទៀត ដើម្បីជាផលប្រយោជន៍សម្រាប់ប្រជាជន និងប្រជាជាតិយើងទាំងពីរ។ ខ្ញុំសូមជូនពរ ឯកឧត្តម សូមមានសុខភាពល្អ សុភមង្គល និងជោគជ័យត្រចះត្រចង់ នៅក្នុងភារកិច្ចដ៏ឧត្តុង ឧត្តមរបស់ឯកឧត្តម”៕ រក្សាសិទ្ធិដោយៈ ចេស្តារ
