ភ្នំពេញ ៖ សេចក្តីណែនាំរបស់ក្រសួងសុខាភិបាល នៅថ្ងៃទី៣ ខែកុម្ភៈ ឆ្នាំ២០២១ បានលើកឡើងថា ស្របពេលដែលកម្ពុជាកំពុង ការពារការចម្លងវីរុសកូវីដ១៩ ដែលនៅតែជាហានិភ័យធំនៅឡើយនោះ ក្រសួងក៏នៅមានការបារម្ភអំពីឱកាសផ្ទុះឡើងនូវជំងឺឆ្លងផ្សេង ៗទៀត និងការពុលចំណីអាហារនិងស្រាផងដែរ។
សេចក្តីណែនាំរបស់ក្រសួងសុខាភិបាល ស្តីពីការការពារ ការពុលស្រា ឬចំណីអាហារ ក្នុងអំឡុងពិធីបុណ្យចូលឆ្នាំប្រពៃណីជាតិខ្មែរ និងពិធីសែនដូនតាផ្សេងៗ។
ក្រសួងសុខាភិបាលនៃព្រះរាជាណាចក្រកម្ពុជា សូមជម្រាបជូនសាធារណជនទាំងអស់ឱ្យបានជ្រាបថា៖ ក្នុង
ពិធីបុណ្យចូលឆ្នាំប្រពៃណីជាតិខ្មែរ និងពិធីសែនដូនតាផ្សេងៗ ប្រជាជនមានការជួបជុំគ្នាច្រើនតាមគ្រួសារ តាមសហគមន៍ និង
ដើរកម្សាន្តតាមរមណីយដ្ឋាននានា។ ស្របពេលដែលយើងកំពុងយកចិត្តទុកដាក់ការពារការចម្លង វីរុសកូវីដ -១៩ ដែលនៅតែ
ជាហានិភ័យធំនៅឡើយ ក្រសួងសុខាភិបាល ក៏នៅមានការបារម្ភអំពីឱកាស ផ្ទុះជំងឺឆ្លងផ្សេងៗទៀត ការពុលចំណីអាហារ ការពុលស្រា ដែលជាបញ្ហាតែងតែកើតមានឡើងនៅតាមទីកន្លែងមួយចំនួន និងក្នុងក្រុមមនុស្សមួយចំនួននៅតាមភូមិ ឃុំ ស្រុក ខណ្ឌ រាជធានី ក្នុងប្រទេសកម្ពុជា ជាពិសេសនៅពេលមានពិធីផ្សេងៗ និងការដើរ លេងកម្សាន្តនៅតាមទីកន្លែងនានា
ដែលបណ្តាលមកពីការខ្វះខាតការប្រុងប្រយ័ត្ន និងការការពារសុខភាពរបស់បុគ្គល។
ក្រសួងសុខាភិបាល សូមលើកទឹកចិត្តគ្រប់ៗគ្នា ឲ្យចូលរួមអនុវត្តនូវវិធានការប្រុងប្រយ័ត្ន រួមទាំងការការពារផ្ទាល់ខ្លួន និង
ក្រុមគ្រួសាររបស់ខ្លួនក្នុងអំឡុងពិធីបុណ្យចូលឆ្នាំប្រពៃណីជាតិខ្មែរ និងពិធីសែនព្រេននានា ដើម្បីជៀសផុតពីបញ្ហា ពុលចំណីអាហារ
ឬពុលស្រា សូមអនុវត្តនូវកូនសោគន្លឹះសុវត្ថិភាពអាហាដូចជា ប្រើប្រាស់ទឹកស្អាត និងម្ហូបអាហារដែលស្អាត និងឆ្អិនជានិច្ច។
ត្រូវលាងដៃនឹងសាប៊ូ មុនពេលនិងអំឡុងពេលរៀបចំម្ហូបអាហារ មុនបរិភោគ និងក្រោយបន្ទោរបង់។
លាងសំអាតបន្លែផ្លែឈើជាមួយទឹកស្អាតឲ្យបានស្អាតមុនបរិភោគ។ សំអាតសម្ភារប្រើសម្រាប់ចម្អិនម្ហូបអាហារឲ្យបានត្រឹមត្រូវ។
ចម្អិនអាហារឲ្យបានឆ្អិនល្អ ជាពិសេស សាច់ សត្វស្លាប ស៊ុត និងអាហារសមុទ្រ។ ទុកដាក់ចំណីអាហារ និងឆ្អិនដាច់ដោយឡែកពីគ្នា ។
កុំរក្សាទុកអាហារក្នុងកំដៅធម្មតាលើសពី២ម៉ោង។ មិនត្រូវរក្សាទុកអាហារ ជាច្រើនថ្ងៃទេ ទោះជាស្ថិតក្នុងកម្រិតសីតុណ្ហភាពសុវត្ថិភាព ក៏ដោយ ។ បើយើងរក្សាទុកអាហារក្នុងប្រព័ន្ធត្រជាក់គឺត្រូវឲ្យនៅក្រោមសីតុណ្ហភាព៥អង្សាសេ។ បើយើងរក្សាទុកអាហារ
ក្នុងប្រព័ន្ធកំដៅគឺត្រូវឲ្យលើសពីសីតុណ្ហភាព៦០អង្សាសេ។
ក្រសួងជំនាញបាន បញ្ជាក់បន្ថែមថា៖ បើមានបញ្ហានៃការពុលអាហារ ឬមានរោគសញ្ញា នៃការពុលស្រា ដូចជា ឈឺក្បាល ក្អួត ឈឺពោះ វិលមុខ ស្រវាំង ភ្នែក សន្លប់ ប្រកាច់ ពិបាក ដកដង្ហើម សូមស្វែងរកការពិនិត្យនិងព្យាបាលជាបន្ទាន់នៅតាម
មណ្ឌលសុខភាពឬទៅមន្ទីរពេទ្យដែលនៅជិតផ្ទះរបស់លោកអ្នក៕ រក្សាសិទ្ធិដោយ៖បញ្ញាស័ក្តិ
