ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានជួបពិភាក្សាការងារជាមួយលោក Christian Berger ឯកអគ្គរដ្ឋទូតអាល្លឺម៉ង់ប្រចាំកម្ពុជានារសៀលថ្ងៃទី០៣ ខែកុម្ភៈ ឆ្នាំ២០២១ នៅទីស្ដីការក្រសួងមហាផ្ទៃ។
នៅក្នុងជំនួបពិភាក្សា ឯកអគ្គរដ្ឋទូតអាល្លឺម៉ង់ចង់ដឹងអំពីវឌ្ឍនភាពការងារកំណែទម្រង់វិមជ្ឈកាល និងសហវិមជ្ឈកាល បន្ទាប់ពីដំណើរទស្សនកិច្ចរបស់សម្តេចក្រឡាហោម ស ខេង ទៅកាន់អាល្លឺម៉ង់ កាលពីឆ្នាំ២០១៩ កន្លងទៅនេះ តើមកដល់ពេលនេះមានវិឌ្ឍនភាពអ្វីខ្លះទៅលើការងារកំណែទម្រង់វិមជ្ឈកាល និងសហវិមជ្ឈកាលនៅកម្ពុជា។ ហើយជម្រាបជូនសម្តេចអំពីគំនិតផ្តួចផ្តើមនៅការគាំទ្រដល់ការងារនគរបាល និងសហគមន៍។
ជាការឆ្លើយតប ទាក់ទងការងារកំណែទម្រង់វិមជ្ឈកាល និងសហវិមជ្ឈកាល សម្តេចក្រឡាហោម ស ខេង បានបញ្ជាក់ថា មកដល់ពេលនេះ រាជរដ្ឋាភិបាលបាបញ្ចប់ការអនុវត្តនៅផែនការជាតិ រយៈពេល ១០ឆ្នាំ ដំណាក់កាលទី១ របស់ខ្លួន និងកំពុងតែរៀបចំបន្តផែនការដំណាក់កាលទី២ សម្រាប់រយៈពេល ១០ឆ្នាំបន្តទៀត ដើម្បីបន្តការងារកំណែទម្រង់វិមជ្ឈកាល និងសហវិមជ្ឈកាល។
សម្តេចក៏បានអរគុណភាគីអាល្លឺម៉ង់ដែលបានជួយគាំទ្រលើផ្នែកបច្ចេកទេសនៅក្នុងការរៀបចំនៅផែនការជាតិ ១០ឆ្នាំបន្តទៀត។
ចំពោះសមិទ្ធិផលធំៗនៅក្នុងការងារកំណែទម្រង់វិមជ្ឈកាល និងសហវិមជ្ឈកាល សម្តេចក្រឡាហោមបានបញ្ជាក់ថា រាជរដ្ឋាភិបាលមានការស្រុះស្រួលផ្ទៃក្នុងល្អរវាងស្ថាប័នពាក់ព័ន្ធរបស់រាជរដ្ឋាភិបាល និងក៏មានការយល់ដឹងកាន់តែច្រើនអំពីសាធារណៈជន ដែលនេះគឺជាទុនមួយដ៏ធំក្នុងការគាំទ្រដល់កំណែទម្រង់ននេះឲ្យមានវឌ្ឍនភាពទៅមុខ និងតាមរយៈផែនការ ១០ឆ្នាំ ដែលបានដាក់ចេញដំណាក់កាលទី១ គឺបានរៀបចំនៅលិខិតបទដ្ឋាន ក៏ដូចជាយន្តការផ្សេងៗ សម្រាប់ដំណើរការកំណែទម្រង់នេះ ដែលក្នុងនោះមានជាអាទិ៍ ការរៀបចំនៅច្បាប់ ក៏ដូចជាដំណើរការរៀបចំការបោះឆ្នោតឃុំសង្កាត់ ដែលនេះ គឺជាផ្នែកមួយនៃការកំណែទម្រង់វិមជ្ឈកាល និងសហវិមជ្ឈកាល។ ការផ្ទេរធនធាននិងអំណាចទៅរដ្ឋបាលថ្នាក់ក្រោមជាតិ គឺមានវិស័យចំនួនពីរដែលបានផ្ទេរច្រើនជាងគេ ទី១. វិស័យសុខាភិបាល និងទី២. វិស័យអប់រំ ។ ហើយនឹងបន្តពិនិត្យលើវិស័យអាទិភាពផ្សេងៗទៀតដើម្បីផ្ទេរទៅរដ្ឋបាលថ្នាក់ក្រោមជាតិ។ ទោះបីជាយ៉ាងណាក៏នៅមានបញ្ហាមួយចំនួនផងដែរ ដែលត្រូវបន្តដោះស្រាយ គឺនៅមានការមិនទាន់ស្រុះស្រួលគ្នាខ្លះនៅលើការងារក្នុងវិស័យរបស់ស្ថាប័នមួយចំនួន និងបញ្ហាប្រឈមមួយទៀត កត្តាធនធានមនុស្ស គឺជាកត្តាស្នូលមួយក្នុងការអនុវត្តកំណែទម្រង់វិមជ្ឈកាល និងសហវិមជ្ឈកាល៕ រក្សាសិទ្ធិដោយៈ ចេស្តារ
