ខេត្តបាត់ដំបង ៖ ក្រុមអន្តរាគមន៍បង្ការបង្ក្រាប នៃស្នងការដ្ឋាននគរបាលខេត្តបាត់ដំបង ចុះប្រតិបត្តិការ អនុវត្តដីកាបញ្ជាឱ្យចូលខ្លួន របស់តំណាងអយ្យការ នៃអយ្យការអមសាលាដំបូងខេត្តបាត់ដំបង បានបញ្ជាឲ្យជនសង្ស័យដែលពាក់ព័ន្ធនឹងករណីឆបោក ( យកប្រាក់,គ្រឿងអលង្ការ,និងម៉ូតូ )។
ដោយអនុវត្តតាមការណែនាំបញ្ជាផ្ទាល់ពី ឯកឧត្តម ឧត្តមសេនីយ៍ទោ សាត គឹមសាន ស្នងការ នៃស្នងការដ្ឋាននគរបាលខេត្តបាត់ដំបង ក៏ដូចជាលោក វរសេនីយ៍ឯក លឹម ពុទ្ធីឡា ស្នងការរង ផែនការងារនគរបាលព្រហ្មទណ្ឌ និង មានការសម្របសម្រួលទៅលើនីតិវិធីពី ឯកឧត្តម គឺ ប៊ុណ្ណារ៉ា ព្រះរាជអាជ្ញា នៃអយ្យការអមសាលាដំបូងខេត្តបាត់ដំបង នៅថ្ងៃទី ២ ខែកុម្ភៈ ឆ្នាំ ២០២១ វេលាម៉ោង ១៤និង០០ នាទីលោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកំរិតស្រាល បានដឹកនាំកម្លាំងក្រុមអន្តរាគមន៍ បង្ការ បង្ក្រាប ចុះប្រតិបត្តិការ អនុវត្តដីកាបញ្ជាឱ្យចូលខ្លួនលេខ ០៤ អ.យ របស់ឯកឧត្តម គឺ ប៊ុណ្ណារ៉ា តំណាងអយ្យការ នៃអយ្យការអមសាលាដំបូងខេត្តបាត់ដំបង បានបញ្ជាឲ្យជនសង្ស័យឈ្មោះ ពៅ វ៉ាន់ធី ហៅ លី ភេទប្រុស ឆ្នាំកំណើត ១៩៥៦ ដែលមានទីកន្លែងកំណើតភូមិក្បាលរមាស ឃុំក្បាលរមាស ស្រុកក្បាលរមាស ខេត្តកំពត និងទីលំនៅបច្ចុប្បន្នមិនពិតប្រាកដ ដែលពាក់ព័ន្ធនឹងករណីឆបោក ( យកប្រាក់,គ្រឿងអលង្ការ,និងម៉ូតូ ) ។
កាលពីថ្ងៃទី ៣ ខែតុលា ឆ្នាំ ២០២០ វេលាម៉ោង ១៧និង៣០ នាទី ជនសង្ស័យខាងលើបានធ្វើសកម្មភាពឆបោក ( យកម៉ូតូ , ប្រាក់ , និងគ្រឿងអលង្ការ ) របស់ជនរងគ្រោះចំនួន ៣ នាក់៖
១. ឈ្មោះ ដៀត វណ្ណៈ ភេទប្រុស អាយុ ១៦ ឆ្នាំ មានទីលំនៅភូមិអណ្ដូងត្រាច ឃុំកំពង់ព្រះ ស្រុកសង្កែ ខេត្តបាត់ដំបង ( អស់ខ្សែកផ្លាកទីនទម្ងន់ ៣ ជីមួយខ្សែ ដំណឹងខ្សែកផ្លាកទីនទង្ងន់ ៧ជីមួយខ្សែទៀត )។
2. ឈ្មោះ វុន សាវុធ ភេទប្រុស អាយុ 17 ឆ្នាំ មានទីលំនៅភូមិកំពង់ព្រៀង ឃុំកំពង់ព្រៀង ស្រុកសង្កែ ខេត្តបាត់ដំបង ( អស់ម៉ូតូ 1 គ្រឿងម៉ាកហុងដាឌ្រីមសេ125 ពណ៌ខ្មៅស៊េរីឆ្នាំ 2020 ពាក់ស្លាកលេខបាត់ដំបង 1AL 9961 ) ។
៣. ឈ្មោះ វ៉ាត់ ភូវង្ស ភេទប្រុស អាយុ ១៧ ឆ្នាំមានទីលំនៅភូមិកំពង់ព្រះ ឃុំកំពង់ព្រះ ស្រុកសង្កែ ខេត្តបាត់ដំបង ( អស់ប្រាក់ចំនួន៥,៥៩៩,០០០រៀល ) ប្រាំលានប្រាំសែនប្រាំបួនម៉ឺនប្រាំបួនពាន់រៀល ។
វត្ថុតាងដកហូតរួមមាន – ម៉ូតូម៉ាក ហុងដា ឌ្រីម សេ១២៥ ពណ៌ខ្មៅ ស៊េរីឆ្នាំ ២០២០ ចំនួន ២គ្រឿង ( ជារបស់ជនសង្ស័យ១គ្រឿង និង របស់ជនរងគ្រោះ ១គ្រឿង )។
បើរាមសភាពរឿងហេតុបានបញ្ជាក់ថា កាលពីខែ តុលា ឆ្នាំ ២០២០ ជនសង្ស័យបានធ្វើដំណើរមកពីខេត្តបន្ទាយមានជ័យ មកស្នាក់នៅផ្ទះសំណាក់មួយកន្លែងម្តុំស្រែ ១០០ ក្នុងខេត្តបាត់ដំបង ហើយជនសង្ស័យបានស្នាក់នៅផ្ទះសំណាក់នោះបាន២ យប់ក៏បានស្គាល់ក្មេងៗ ប្រុសចំនួន ៣ នាក់ ដែលមានអាយុ ១៦ទៅ ១៧ ឆ្នាំ ហើយជនសង្ស័យក៏បាននាំដើរស៊ីចុកនិង ទិញខោអាវ ស្បែកជើង ទូរសព្ទដៃឲ្យក្មេងៗទាំងនោះ ក្រោយមកទៀតជនសង្ស័យបានឲ្យក្មេងៗទាំងនោះជូនខ្លួនដើរយកលុយ របរតាមផ្សារក្នុង ១ថ្ងៃ ៤ដង ប្រហែល១សប្តាហ៍ ដោយចំណាយអស់ប្រាក់ប្រហែល ១.៧០០ ដុល្លារ ហើយជនសង្ស័យក៏មានគំនិត ឆបោក ក៏ហៅក្មេងៗទាំងនោះទៅហូបអីនៅកញ្ចុះ ហើយក៏បានឲ្យក្មេងប្រុសម្នាក់ដែលខ្លួនហៅថាឈ្មោះអាតូច ឲ្យយកខ្សែកទម្ងន់ ៥ ជី ឲ្យខ្លួនហើយខ្លួននឹងធ្វើឱ្យថែម ៥ជី ទៀតគ្រប់១ដំឡឹង បន្ទាប់មកបងស្រីរបស់ក្មេងប្រុសនោះបានយកលុយឱ្យខ្ញុំចំនួន ៥ លានរៀល ដើម្បីថាយកធ្វើខ្សែក ខ្សែដៃឱ្យ ពេលនោះជនសង្ស័យបានទទួលខ្សែក និងប្រាក់ហើយ ក៏ទៅស្នាក់នៅផ្ទះសំណាក់ម្ដុំ ស្រែ១០០ នោះវិញ ។ លុះដល់ព្រឹកស្អែកឡើងជនសង្ស័យក៏បាននាំក្មេងៗទាំងនោះទៅអប់ពណ៌សក់ នៅម្ដុំផ្សារថ្មីក្នុងក្រុងបាត់ដំបង នៅពេលដែលពួកគេកំពុងអប់សក់នោះ ជនសង្ស័យបាននិយាយថាឱ្យសោម៉ូតូមកបង បងជិះទៅយកលុយគេ ពេលបានសោម៉ូតូ ហើយជនសង្ស័យក៏ជិះទៅបាត់រួចគេចខ្លួនតែម្ដង រហូតមកដល់ថ្ងៃទី ២ ខែកុម្ភៈ ឆ្នាំ ២០២១ ទើបសមត្ថកិច្ចធ្វើការនាំខ្លួនមកកាន់ស្នងការដ្ឋាននគរបាលខេត្តបាត់ដំបងតែម្ដង ។
បច្ចុប្បន្នកម្លាំងការិយាល័យជំនាញកំពុងតែធ្វើការកសាងសំណុំរឿងដើម្បីបញ្ជូនទៅសាលាដំបូងខេត្តបាត់ដំបងចាត់ការបន្តតាមនីតិវិធី៕ រក្សាសិទ្ធិដោយ៖បញ្ញាស័ក្តិ
