ភ្នំពេញ៖ ក្រសួងពាណិជ្ជកម្ម សភាពាណិជ្ជកម្មកម្ពុជា អង្គការពាណិជ្ជកម្មក្រៅប្រទេសជប៉ុន JETRO និងសមាគមសហគ្រិនវ័យក្មេងនៅកម្ពុជា បានសហការគ្នារៀបចំបើកសម្ពោធការដាក់តាំងបង្ហាញទំនិញថ្មី ទំនិញជប៉ុន ក្រោមប្រធានបទ “ទំនិញល្អ ទំនិញជប៉ុន ២០២១ (Good Goods Japan 2021)”នៅសណ្ឋាគារ Rose Wood ភ្នំពេញ ដែលមានការចូលរួមពីឯកឧត្តម ប៉ាន សូរស័ក្តិ រដ្ឋមន្ត្រីក្រួសងពាណិជ្ជកម្ម ឯកឧត្តម មីកាមិ ម៉ាសាហ៊ីរ៉ូ ឯកអគ្គរដ្ឋទូតជប៉ុនប្រចាំនៅកម្ពុជា លោកឧកញ៉ា លឹម ហេងអនុប្រធានសភាពាណិជ្ជកម្មកម្ពុជា ឯកឧត្តម ងួន ម៉េងតិច អគ្គនាយកសភា ពាណិជ្ជកម្មកម្ពុជា និងលោកស្រី ម៉ារីសា ហារុតា ប្រធានអង្គការ JETRO ប្រចាំនៅកម្ពុជា។
ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានលើកឡើងថា ព្រឹត្តិការណ៍ពាណិជ្ជកម្មនេះនឹងផ្តល់ឱកាសដល់ពាណិជ្ជករកម្ពុជា ដែលមានបំណងធ្វើធុរកិច្ចជាមួយពាណិជ្ជករជប៉ុន បានឃើញមុខទំនិញច្រើនប្រភេទ និងបានជួបចរចារដោយផ្ទាល់បង្កើតជាវេទិកាពាណិជ្ជកម្ម។
ឯកឧត្តមរដ្ឋមន្ត្រីបានបញ្ជាក់ថា ទំហំពាណិជ្ជកម្មទ្វេភាគី កម្ពុជា-ជប៉ុន សម្រេចបានប្រមាណ ២,០១០ លានដុល្លារអាមេរិក ក្នុងនោះកម្ពុជានាំចេញទៅជប៉ុនក្នុងចំនួនទឹកប្រាក់ប្រមាណ ១,១៣១ លានដុល្លារ និងនាំចូល មកវិញក្នុងចំនួនទឹកប្រាក់ប្រមាណ ជាង ៨៧៩ លានដុល្លារ។ គិតត្រឹម ៦ ខែដើមឆ្នាំ២០២០ ទំហំពាណិជ្ជកម្មទ្វេភាគីកម្ពុជា-ជប៉ុន សម្រេចបាន ប្រមាណ ៨៤១ លានដុល្លារ។ ទំនិញដែលកម្ពុជានាំចេញទៅជប៉ុនមានដូចជា ផលិតផលសម្លៀកបំពាក់កាត់ដេរ ស្បែកជើង គ្រឿងសង្ហារឹម គ្រឿងសំអាង ក្រដាស សម្ភារៈការិយាល័យ ស្បែកនិងផលិតផលធ្វើអំពីស្បែក និងដែក ។ល។ ទំនិញដែលនាំចូលពីជប៉ុនរួមមាន៖ គ្រឿងម៉ាស៊ីន រថយន្ត សាច់ គ្រឿងអេឡិចត្រូនិច សង្ហារឹម ក្រដាស កប្បាស ក្រណាត់គ្រប់ប្រភេទ ផលិតផលផ្លាស្ទីក សម្ភារៈកីឡា និងគ្រឿងបន្ទាប់បន្សំ ជាដើម។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ថា ការតាំងពិព័ណ៌នេះ ជាសញ្ញាបង្ហាញអំពីកិច្ចសហប្រតិបត្តិការបន្តឥតឈប់រវាងប្រទេសកម្ពុជា និងប្រទេសជប៉ុន និងជួយជំរុញបន្ថែមទៀតនូវពាណិជ្ជកម្មទ្វេភាគី។ អង្គការពាណិជ្ជកម្មក្រៅប្រទេសជប៉ុន និង សភាពាណិជ្ជកម្មកម្ពុជា បានប្តេជ្ញាក្នុងការលើកស្ទួយពាណិជ្ជកម្ម និងការវិនិយោគរវាងប្រទេសទាំងពីរ។ លោកឧកញ៉ា លឹម ហេង បានគូសបញ្ជាក់ថា សភាពាណិជ្ជកម្មកម្ពុជា និង អង្គការពាណិជ្ជកម្មក្រៅប្រទេសជប៉ុន នឹងបន្តពង្រីកភាពសហការក្នុងការរៀបចំកម្មវិធីក្នុងវិស័យផ្សេងៗច្រើនទៀត។
លោកឧកញ៉ា លឹម ហេង បានបន្តថា ស្ថាប័នទាំងពីរនេះ បានចុះ អណុស្សារណៈយោគយល់ ក្នុងឆ្នាំ ២០០៥។ លើសពីនេះ សមាគមពាណិជ្ជកម្មជប៉ុននៅកម្ពុជា ក៏បានចុះ អនុស្សារណៈយោគយល់ ជាមួយនឹង សភាពាណិជ្ជកម្មកម្ពុជា ក្នុងឆ្នាំ ២០១៨ ដែរ។ សភាពាណិជ្ជកម្មកម្ពុជា បានរៀបចំកម្មវិធីពាណិជ្ជកម្មរួមគ្នាជារៀងរាល់ឆ្នាំ។ ថ្មីៗនេះ នៅថ្ងៃ ០១ ខែ កញ្ញា ឆ្នាំ ២០២០ យើងបានរៀបចំជំនួបពាណិជ្ជកម្មតាមប្រព័ន្ធ អនឡាញ ដែលមានការចូលរួមពីក្រុមហ៊ុនជប៉ុនចំនួន ១៦០ ដើម្បីស្វែងរកកាលានុវត្តភាពធុរកិច្ចក្នុងវិស័យបច្ចេកវិទ្យា។
ក្នុងក្របខណ្ឌកិច្ចសហប្រតិបត្តិការលើវិស័យសេដ្ឋកិច្ច រវាងអាស៊ាន និង ជប៉ុន ជប៉ុនបានរៀបចំគម្រោងអភិវឌ្ឍសេដ្ឋកិច្ចចំនួន ៨៧ គម្រោង ក្នុងនោះ ៥៨ គម្រោង សម្រាប់ជួយដល់ប្រទេសកម្ពុជា ឡាវ ភូមា និងវៀតណាម លើវិស័យកសិកម្ម ទេសចរណ៍ ការអភិវឌ្ឍន៍សហគ្រាសធុនតូច និងមធ្យម ធានាគុណភាពទំនិញ ជំរុញវិនិយោគ កសាងបរិយាកាស អាជីវកម្ម បរិស្ថាន កសាងសមត្ថភាពមន្ត្រីរាជការ ដើម្បីកាត់បន្ថយគម្លាតនៃការអភិវឌ្ឍរបស់ប្រទេសក្រីក្រ។
សូមជម្រាបជូនថា ចាប់តាំងពីឆ្នាំ១៩៩៤ ដល់ឆ្នាំ២០១៨ គម្រោងវិនិយោគរបស់ជប៉ុន នៅកម្ពុជា មានចំនួន១៣៧ គម្រោង ដែលមានទុនវិនិយោគសរុបចំនួន ២,៤៨៦ លានដុល្លារ។ ក្នុងឆ្នាំ២០១៩ វិនិយោគ មាន ៦ គម្រោង ដែលមានទឹកប្រាក់ចំនួន ២៩៩ លានដុល្លារ ក្នុងនេះ គម្រោងសាងសង់ផ្សារ AEON Mall 3 មាន ទុនវិនិយោគ រហូតដល់ ២៨៩.៦លានដុល្លារ ហើយក្នុងឆ្នាំ២០២០ មាន ១ គម្រោង ដែលមានទឹកប្រាក់ចំនួន ៧.១៧លានដុល្លារ ភាគច្រើន គឺវិនិយោគក្នុងតំបន់សេដ្ឋកិច្ចពិសេសភ្នំពេញ បាវិត នាងកុក ប៉ោយប៉ែត និងក្នុង តំបន់សេដ្ឋកិច្ចពិសេសខេត្តព្រះសីហនុ។
គួរបញ្ជាក់ថា ការវិនិយោគរបស់ក្រុមហ៊ុនជប៉ុនក្នុងប្រទេសកម្ពុជា មានកំណើនគួរឲ្យកក់សម្គាល់ក្នុងប៉ុន្មានទស្សវត្សន៍មកនេះ។ ប្រទេសជប៉ុន ជាដៃគូវិនិយោគមួយក្នុងចំណោមដៃគូវិនិយោគធំៗ នៅប្រទេសកម្ពុជា។មានក្រុមហ៊ុនជប៉ុន ជាង ១៥០០ ក្រុមហ៊ុន បានចុះបញ្ជីនៅក្នុងប្រទេសកម្ពុជា ក្នុងនោះក្រុមហ៊ុនធំ រួមមាន Minebea, AEON, Nippon Express, Denso, J Trust Bank, និង Somitomo។ បន្ថែមពីលើសនេះ មានភោជនីយដ្ឋានជប៉ុនប្រមាណ ៣០០ កំពុងបើកដំណើរការនៅក្នុងប្រទេសកម្ពុជាទៀតផង៕
រក្សាសិទ្ធិដោយ៖CEN
