ភ្នំពេញ ៖ រថយន្តសណ្តោងរ៉ឺម៉កដឹកដែកមួយគ្រឿង រ៉ឺយ៉ែបុកបង្គោលភ្លើងបណ្តាលឲ្យបាក់ឣស់មួយដើម បណ្តាលឲ្យប្រជាពលរដ្ឋដែលរស់នៅសង្កាត់ឃ្មួញ ដាច់ភ្លើងប្រើប្រាស់។
ហេតុការណ៍ខាងលើនេះ បានកើតឡើងកាលពីវេលាម៉ោង១២រសៀល ថ្ងៃទី៤ខែកុម្ភៈ ឆ្នាំ២០២១ ស្ថិតនៅតាមបណ្តោយផ្លូវហាណូយ សង្កាត់ឃ្មួញ ខណ្ឌសែនសុខ រាជធានីភ្នំពេញ។
តាមប្រភពព័ត៌មាននៅកន្លែងកើតហេតុ បានឲ្យដឹងថា មុនពេលកើតគេឃើញបុរសម្នាក់ ដែលជាតៃកុងរថយន្តខាងលើ បើករថយន្តមួយគ្រឿង ប្រភេទសណ្តោងរ៉ឺម៉កពណ៌ស ពាក់ផ្លាកលេខភ្នំពេញ 3E 4255 បើកចូលក្នុងឃ្លាំងស្តុកដែក រួចរ៉ឺយ៉ែចេញមកក្រៅបានបុកបង្គោលភ្លើងបាក់ឣស់មួយដើម ដែលមានតម្លៃសរុបរាប់ពាន់ដុល្លារ។
ក្រោយពេលកើតហេតុ សមត្ថកិច្ចនគរបាលចរាចរណ៍ខណ្ឌសែនសុខ សហការជាមួយចរាចរណ៍ជំនាញក្រុង ចុះទៅវាស់វែងនៅកន្លែងកើតហេតុ និងយករថយន្តបង្កទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយគ្នានៅពេលក្រោយ៕ រក្សាសិទ្ធិដោយ៖ សួង សាម
