ភ្នំពេញ៖ នគរបាលទទួលផ្នែកការងារព្រហ្មទណ្ឌសហការជាមួយកម្លាំងនគរបាលប៉ុស្តិ៍រដ្ឋបាលសង្កាត់ចោមចៅ២ នៃអធិការដ្ឋាននគរបាលខណ្ឌពោធិ៍សែនជ័យ រាជធានីភ្នំពេបានបង្ក្រាបចាប់ខ្លួនក្រុមក្មេងទំនើង២៨នាក់ជិះម៉ូតូអូសដាវសាំម៉ូរ៉ៃពេញថ្នល់ទាំងយប់អធ្រាត្របង្កឱ្យប្រជាពលរដ្ឋភ័យខ្លាចនិងបានដកហូតគ្រឿងញៀន០៧កញ្ចប់ថែមទៀត។
បើតាមប្រភពព័ត៌មានពីកម្លាំងអធិការដ្ឋាននគរបាលខណ្ឌពោធិ៍សែនជ័យឱ្យដឹងថាកាលពីវេលាម៉ោង០១និង៣០នាទីយប់អធ្រាត្រឈានចូលថ្ងៃទី០៤ ខែកុម្ភៈ ឆ្នាំ២០២១ នៅចំណុចផ្លូវវេងស្រេង ភូមិជ្រៃកោងសង្កាត់ចោមចៅ២ ខណ្ឌពោធិ៍សែនជ័យ គឺមានក្រុមក្មេងទំនើង០១ក្រុមជិះម៉ូតូចំនួន១២គ្រឿងដេញប្រណាំងគ្នាប្រសាចតាមផ្លូវហើយអូសដាវសាំម៉ូរ៉ៃពេញថ្នល់ខណៈនោះក៏បានជួបប្រទះជាមួយកម្លាំងនគរបាលខណ្ឌពោធិ៍សែនជ័យកំពុងចេញល្បាតដោយឃើញសកម្មភាពបែបនោះកម្លាំងនគរបាលក៏បានចាប់ឃាត់ក្មេងទំនើងទាំងនោះឆែកឆេរត្រួតពិនិត្យរកឃើញថ្នាំញៀន០៧កញ្ចប់រួមនិងអាវុធជាប្រភេទកាំបិទកែច្នៃ ដាវសាំម៉ូរ៉ៃនិងជំពាមកៅស៊ូសរុប០៦ និងដុំថ្ម០៧គ្រាប់រួមនិងដែកថ្នាំង០១ដើមនិងម៉ូតូ១២គ្រឿងផងដែរ។
បើតាមប្រភពព័ត៌មានពីកម្លាំងអធិការដ្ឋាននគរបាលខណ្ឌពោធិ៍សែនជ័យឱ្យដឹងទៀតថា ក្នុងចំណោមក្មេងទំនើងទាំង២៨នាក់នោះមានមុខសញ្ញាមួយចំនួនដែលសង្ស័យធ្លាប់ធ្វើសកម្មភាពធាក់ផ្តួលម៉ូតូប្រជាពលរដ្ឋដើម្បីប្លន់យកម៉ូតូនិងមានមុខសញ្ញាឆក់ផងដែរ។ក្មេងទំនើងទាំងនេះបច្ចុប្បន្នបាននឹងឃាត់ខ្លួនសាកសួរនៅអធិការដ្ឋាននគរបាលខណ្ឌពោធិ៍សែនជ័យ។ចំពោះក្មេងទំនើងរកឃើញថាជាប់ពាក់ព័ន្ធជាមុខសញ្ញាប្រព្រឹត្តបទល្មើសខុសច្បាប់ត្រូវបញ្ជូនទៅចាត់ការតាមផ្លូវច្បាប់ចំណែកមួយចំនួនទៀតមិនធ្លាប់ជាប់ពាក់ព័ន្ធនឹងការប្រព្រឹត្តបទល្មើសត្រូវអប់រំធ្វើកិច្ចសន្យាកោះហៅអាណាព្យាបាលមកទទួលនិងដោះលែងត្រឡប់ទៅផ្ទះដោយប្រគល់ឱ្យអាណាព្យាបាលអប់រំបន្ត។
សូមបញ្ជាក់ថា ជុំវិញបញ្ហាក្មេងទំនើងនេះ ឯកឧត្តម ឧត្តមសេនីយ៍ឯក ស ថេត អគ្គស្នងការរងនគរបាលជាតិនិងជាស្នងការនគរបាលរាជធានីភ្នំពេញថ្មីៗនេះបានលើកឡើងនិងដាក់បទបញ្ជាម៉ឺងម៉ាត់ដល់កម្លាំងនគរបាលទាំង១៤ខណ្ឌនិងកម្លាំងការិយាល័យជំនាញត្រូវតែចាត់វិធានការឱ្យមានប្រសិទ្ធភាពបង្ការទប់ស្កាត់និងបង្ក្រាបក្រុមក្មេងទំនើងដែលបង្ក ឱ្យប៉ះពាល់អសន្តិសុខសង្គម។ជាងនេះថែមទៀតការបង្ក្រាបក្មេងទំនើងមិនត្រូវយោគយល់នោះឡើយទោះកូនអ្នមានរឺអ្នកធំក៏ដោយ៕ រក្សាសិទ្ធិដោយ : ចេស្តារ
