នេះគឺជារូបភាពដ៏រន្ធត់មួយ ខណៈពេលដែលគ្រូពេទ្យបានព្យាយាមទាញយកត្រី១ក្បាលប្រវែង ១៨ សង់ទីម៉ែត្រ ចេញពីបំពង់.កបុរសម្នាក់ បន្ទាប់រូបគេបានជួបគ្រោះថ្នាក់ពីហេតុការណ៍នេសាទដ៏ចម្លែកបំផុតមួយ នៅក្នុងប្រទេសកូឡុំប៊ី។
យោងតាមសារព័ត៌មានកូឡុំប៊ី បានឲ្យដឹងថា បុរសអាយុ ២៤ ឆ្នាំ ម្នាក់ បានទៅនេសាទត្រីនៅឯបឹងមួយកន្លែង នៅក្នុងក្រុង Pivijay ខេត្ត Magdalena ប្រទេសកូឡុំប៊ី កាលពីថ្ងៃទី២៣ ខែមករា កន្លងទៅនេះ។
បន្ទាប់ពីចាប់បានត្រីនៅក្នុងដៃ បុរសរូបនេះក៏បានបោះខ្សែសន្ទួចចូលក្នុងទឹកម្តងទៀត ហើយនៅពេលភ្លាមៗនោះ ត្រីទីពីរក៏បានខាំផ្លែសន្ទួច។ ដោយសារតែត្រីទី១នៅតែស្ថិតនៅក្នុងដៃ បុរសវ័យក្មេងរូបនេះមិនដឹងថាត្រូវធ្វើអ្វី ដើម្បីកុំឲ្យបាត់បង់ត្រីផ្សេង ក៏បានសម្រេចចិត្តយកត្រីទី១ខាំចូលក្នុងមាត់ ខណៈកំពុងបន្តព្យាយាមចាប់ត្រីទី២។
តែទោះយ៉ាងណា វិធីដ៏គួរឲ្យហួសចិត្តនេះពុំបានល្អនោះទេ ព្រោះថាខណៈគាត់ដាច់ត្រីចូលក្នុងមាត់ភ្លាម វាក៏បានរើបម្រាស់រំដោះខ្លួន ហើយនៅទីបំផុត ត្រីនោះក៏បានរុលចូលទៅក្នុងបំពង់.ករបស់គាត់តែម្តង។
បន្ទាប់ពីត្រូវជាប់ក្នុងបំពង់.ក បុរសវ័យក្មេងរូបនេះ ក៏បានដើរទៅកាន់មន្ទីរពេទ្យ Santander Herrera ដោយខ្លួនឯង ប៉ុន្តែ មិនអាចពន្យល់ទៅកាន់ក្រុមគ្រូពេទ្យ ពីអ្វីដែលបានកើតឡើង ព្រោះនៅពេលនោះ រូបគេកំពុងពិបាកដកដង្ហើមខ្លាំង (ស្ទើរស្ទះខ្យល់) និងមិនអាចនិយាយបាននោះទេ។
ក្រុមគ្រូពេទ្យពិតជាភ្ញាក់ផ្អើលជាខ្លាំង នៅពេលថត X-ray បានរកឃើញត្រី១ក្បាល កំពុងជាប់នឹងបំពង់.ករបស់អ្នកជំងឺ ហើយពួកគេក៏បានប្រញាប់ប្រញាល់ជួយសង្គ្រោះ ដើម្បីយកត្រីនោះចេញដោយជោគជ័យ។
គួរឲ្យដឹងផងដែរ កាលពីប៉ុន្មានខែមុននេះ អ្នកនេសាទម្នាក់នៅក្នុងប្រទេសអេហ្ស៊ីប ក៏ត្រូវបានគេរាយការណ៍ថា ត្រូវត្រីចូលក្នុងបំពង់.កស្ទះដង្ហើមស្ទើរស្លាប់ ដោយសារតែទង្វើរដ៏ឆ្កួតៗដូចគ្នានេះដែរ៕ រក្សាសិទ្ធិដោយ៖ លឹម ហុង
