បោយប៉ែត៖ ឯកឧត្តម ដួង តារា ជំនួយការផ្ទាល់សម្តេចតេជោហ៊ុន សែន និងជារដ្ឋលេខាធិការនៃទីស្តីការគណៈរដ្ឋមន្ត្រី បានថ្លែងសារលើហ្វេសប៊ុកថា ដូនជីទាំង៣នាក់បងប្អូនមានឈ្មោះ ១)ញឹក វ៉ាន់ធី ២)ញឹក វ៉ាន់រី ៣)ញឹក សុវណ្ណនី មានវិវាទលើទីតាំងដីជាមួយ លោក ពៅ រិទ្ធី ជាប៉ូលីសវរការពារព្រំដែនប៉ោយប៉ែត បន្ទាយមានជ័យ ដែលមានរយៈពេលជាងមួយឆ្នាំមកហើយ។
បញ្ហាដែលកើតមានវិវាទនេះគឺនៅ ខែ កុម្ភៈ ២០១៩ លោក ពៅ រិទ្ធី បានធ្វើរបងព័ទ្ធជុំវិញយកដី៣ប្លង់ដែលឪពុកដូនជីបានទិញពីគ្រូបង្រៀនកាលពីឆ្នាំ ២០០៦ គឺក្នុងពេលដែលដូនជីបានចាក់ដីចំនួន ៣៥ឡាន បំពេញក្នុងដីរបស់គាត់។ ភាគីដូនជីក៏បានតវ៉ាជាមួយអាជ្ញាធរ ហើយឈានដល់មានការសម្របសម្រួលសះជាក្រោមអធិបតីភាព លោកអភិបាលរង កែវ តារារស្មី នៅសាលាក្រុងប៉ោយប៉ែតកាលពីថ្ងៃទី ១៦ កក្កដា ២០២០ ដែលភាគីដូនជី ញឹក វ៉ានធី ព្រមទទួលយកសំណង ២ម៉ឺនបាត និងទទួលយកដី (១៨.៧០ម + ១៩.៨០ម x ២៦x៨០ម) ដែលមានផ្តិតមេដៃភាគីវិវាទទាំង២ផងដែរ។
ប៉ុន្កែក្រោយមក ភាគីដូនជី បាននិយាយថា មិនយុត្តិធម៌សម្រាប់ពួកគាត់ទេ ព្រោះទីតាំងដីដែលភាគី លោក ពៅ រិទ្ធី បានព័ទ្ធរបងយកគឺជាដីពិតរបស់គាត់ដែលគាត់បានចាក់ដីបំពេញរួចហើយ។ ការដែលគាត់ព្រមទទួលយក ២ម៉ឺនបាតនោះព្រោះគ្មានជម្រើសអ្វីដែលគាត់អាចតវ៉ាបានក្រៅពីទទួលយកដោយទឹកភ្នែកប៉ុណ្ណោះ។ ភាគីដូនជីទាំងពីរក៏បានដាក់ពាក្យគោរពសុំមកសម្តេចតេជោអោយជួយពួកគាត់ផង។
នៅថ្ងៃទី ៤ កុម្ភៈ ខ្ញុំក៏បានជួបដូនជីទាំង២ (ញឹក វ៉ាន់ធី និង ញឹក វណ្ណរី ) នៅសាលាក្រុងប៉ោយប៉ែត។ ក្រោយពីបានស្តាប់ការរៀបរាប់ដោយផ្ទាល់ពីដូនជីទាំងពីរហើយ ខ្ញុំនិងលោកប្រធានមន្ទីរសុរិយោដីខេត្ត និងលោកអភិបាលក្រុងប៉ោយប៉ែត ក៏បានចុះទៅដល់ទីតាំងដីទំនាស់ដែលនៅមិនឆ្ងាយពីក្រុងប៉ោយប៉ែត។ បន្ទាប់មកខ្ញុំក៏បានសម្របសម្រួលភាគីទាំងពីរក្រៅប្រព័ន្ធតុលាការឈរលើគោលការណ៍ឈ្នះឈ្នះសម្តេចតេជោ ដោយភាគី ពៅ រិទ្ធី ទទួលបានដីដែលខ្លួនបានព័ទ្ធរបងរួចហើយចំនួន ៦៦៦ម៉ែត្រការ៉ែ និង ដីជាប់គ្នាចំនួន ៥៧៨ម៉ែត្រការ៉េ ទៀតជូនទៅភាគីដូនជី។ ក្នុងនោះភាគីដូនជីបានយល់ព្រមប្រគល់លុយ២ម៉ឺនបាតទៅ លោក ពៅ រិទ្ធី វិញ ដើម្បីអោយគាត់យកទៅចាក់ដីបំពេញអោយដូនជីទាំងពីនៅលើដីម្ខាងទៀតអោយស្មើដូចដីដែលគាត់បានចាក់បំពេញលើដីដែល លោក ពៅ រិទ្ធី ដែលកំពុងកាន់កាប់គ្រប់គ្រង។
ដោយមើលឃើញពីការលំបាករបស់ដូនជីទាំងពីរមិនអាចមានលទ្ធភាពរកលុយ២ម៉ឹនបាតប្រគល់ទៅភាគី លោក ពៅ រិទ្ធី ខ្ញុំបានជួយចេញ ២០០ដុល្លារ និងលោកចៅហ្វាយក្រុងប៉ោយប៉ែតបានជួយចេញ៤០០ ដុល្លារ (២ម៉ឺនបាត) ជូនទៅ លោក ពៅ រិទ្ធី ជាថ្លៃចាក់ដីបំពេញជូនទៅអោយភាគីដូនជីវិញ។ ភាគីទាំងពីរបានយល់ព្រមផ្តិតមេដៃសះជាបញ្ចប់វិវាទចុងក្រោយនៅថ្ងៃទី ៤ កុម្ភៈ ២០២១ នៅសាលាក្រុងប៉ោយប៉ែត ប្រកបដោយបរិយាកាសរំភើបរីករាយក្រៃលែង។
ឯកឧត្តម ដួង តារាបានថ្លែងថា ខ្ញុំសូមអរគុណចំពោះកិច្ចសហការដ៏ល្អពីលោកអភិបាលក្រុងប៉ោយប៉ែត គាត់ ហ៊ុល លោកប្រធានមន្ទីរដែនដីខេត្ត អាង ណារិទ្ធ លោកស្រីមេភូមិប៉ាលីលេយ្យ២ ថេង សុផារី និងមន្ត្រីពាក់ព័ន្ធទាំងអស់ដែលបានចូលរួមដោះស្រាយបញ្ចប់វិវាទថ្ងៃនេះ។ ខ្ញុំបាទក៏សូមគោរពអរគុណសម្តេចតេជោនាយករដ្ឋមន្ត្រីដែលបានផ្តល់ឱកាសអោយខ្ញុំបានចូលរួមដោះស្រាយបញ្ចប់វិវាទក្រៅប្រព័ន្ធតុលាការជូនប្រជាពលរដ្ឋក្រោមគោលការណ៍ឈ្នះឈ្នះសម្តេចតេជោ។ យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម នឹងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើង៕ រក្សាសិទ្ធិដោយ៖បញ្ញាស័ក្តិ