ភ្នំពេញ ៖ បុរសម្នាក់ រួមអ្នកដំណើរមានស្រីនិងប្រុស៣នាក់ទៀត បានបើករថយន្តក្នុងល្បឿនលឿន ខ្វះការប្រុងប្រយ័ត្នរេចង្កូតជ្រុលទៅបុកនឹងរថយន្តកុងតឺន័រចតចោលនៅលើចិញ្ចើមផ្លូវ ចំពីក្រោយ បណ្តាលឲ្យរថយន្តខ្ទេចផ្នែកពីខាងមុខស្ទើរទាំងស្រុង។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ២ និង១៥នាទីយប់រំលងអធ្រាត្រឈានចូលថ្ងៃចន្ទទី៨ ខែកុម្ភៈ ឆ្នាំ ២០២១ស្ថិតនៅតាមបណ្តោយផ្លូវ២១៧ ក្នុងសង្កាត់ដង្កោ ខណ្ឌដង្កោ រាជធានីភ្នំពេញ។
បើយោងតាមប្រភពព័ត៌មានពីជនរងគ្រោះ បើកបររថយន្តនៅកន្លែងកើតហេតុ បានឲ្យដឹងថា មុនពេលកើតហេតុគាត់បានបើករថយន្តម៉ាកកាមរីឆ្លាមមួយគ្រឿង ពណ៌ស្ករពាក់ផ្លាកលេខព្រះសីហនុ2-A 4751 បើកបរដោយបុរសម្នាក់ និងរួមដំណើរ៣នាក់ទៀត ចេញពីស្ពានព្រែកជ្រៃ គោលបំណងបម្រុងទៅផ្លូវវេងស្រេង ធ្វើដំណើរតាមបណ្តោយផ្លូវ២១៧ ក្នុងទិសដៅពីលិចទៅកើតក្នុងល្បឿន ខណៈមកដល់ចំណុចកើតហេតុស្រាប់តែរេចង្កូតទៅបុកពីក្រោយរថយន្តកុងតឺន័រមួយគ្រឿងដែលពាក់ផ្លាកលេខ 3E-3036 ចតចោលនៅលើចិញ្ចើមផ្លូវ បណ្តាលឲ្យរងរបួសធ្ងន់ស្ត្រីម្នាក់ និង៣នាក់ទៀតរងរបួសស្រាល។
ក្រោយពេលកើតហេតុសមត្ថកិច្ចមូលដ្ឋាន សហការជាមួយនឹងខាងជំនាញចរាចរណ៍ខណ្ឌដង្កោ ចុះមកដល់រួចប្រគល់តួនាទីនេះទៅឲ្យខាងចរាចរណ៍ជំនាញក្រុង វាស់វែងយករថយន្តស្ទូចមកស្ទូចយករថយន្តទាំង២គ្រឿង ទៅរក្សាទុកនៅខាងការិយាល័យចរាចរណ៍ផ្លូវគោករង់ចាំដោះស្រាយនៅពេលក្រោយ៕ រក្សាសិទ្ធិដោយ៖ សា មេត
