ភ្នំពេញ៖ ឆ្លើយតបនឹងតម្រូវការកើនឡើងឥតឈប់ឈនៃសេវាទូទាត់សាច់ប្រាក់ជារៀងរាល់ថ្ងៃ ការទូទាត់តាមបែបឌីជីថលជាមធ្យោបាយ សុវត្ថិភាព និងរហ័ស មួយទៀត ដែលប្រជាជនកម្ពុជា កំពុងប្រើប្រាស់។
យោងតាមការសិក្សារបស់ក្រុមហ៊ុន Visa បានឲ្យដឹងថា តម្រូវការចំពោះការបង្កើនសុវត្ថិភាព និងការយល់ដឹងជាប្រចាំ អំពីគោលការណ៍ណែនាំ សុខភាពនាពេលបច្ចុប្បន្ន បានជំរុញឲ្យនិន្នាការ ការទូទាត់ដោយមិនប្រើប្រាស់ សាច់ប្រាក់សុទ្ធ មានការកើនឡើង។ ស្របពេលដែលកំពុងមានជំងឺរាតត្បាតជាសកល កូវីដ១៩ផង នោះ និនា្នការនៃការទូទាត់តាមបែបឌីជីថល ត្រូវបានគេមើលឃើញថា ជាជំរើសល្អមួយ ក្នុងការកាត់បន្ថយ ហានិភ័យនៃឆ្លងជំងឺកូវដី១៩ ជាជាងការកាន់សាច់ប្រាក់ផ្ទាល់។
ការសិក្សារបស់ក្រុមហ៊ុន Visa បានឲ្យដឹងថា ៧៨ ភាគរយ នៃអតិថិជននៅទូទាំងសកលលោក បានកែសម្រួលមធ្យោបាយទូទាត់ ថ្លៃទំនិញរបស់ពួកគេ ដោយសារតែមានការព្រួយបារម្ភ ពីសុវត្ថិភាព ហើយប្រមាណជាជិតពាក់កណ្តាល (៤៨ ភាគរយ) ជ្រើសរើសមិនទិញទំនិញ នៅហាងប្រើប្រាស់ វិធីសាស្ត្រទូទាត់ប្រាក់ តម្រូវឲ្យមានការប្រាស្រ័យ ទាក់ទងដោយផ្ទាល់ ជាមួយអ្នកគិតប្រាក់ ឬម៉ាស៊ីន ដែលត្រូវប្រើរួមគ្នា ដូចជាម៉ាស៊ីនឆូតកាតជាដើម។ Visa ជឿជាក់ថាឥរិយាបទរបស់អតិថិជន ដែលកំពុងធ្វើបែបនេះ វាមិនមែនជាការផ្លាស់ប្តូរ បណ្តោះអាសន្ននោះទេ គឺវានឹងបន្តរបៀបនេះជាអចិន្ត្រៃ។
ចំនួនប្រើបច្ចេកវិទ្យាហិរញ្ញវត្ថុ កំពុងកើនឡើង និងក៏កំពុងប្រឈមជាមួយ នឹងការស្វែងរកមធ្យោបាយថ្មី ដែលអាចផ្ញើ ឬទូទាត់ប្រាក់ និងចែករំលែកព័ត៌មាន បានរហ័សជាងមធ្យោបាយ បែបប្រពៃណី។ ការទូទាត់ភ្លាមៗ ការប្រើប្រាស់រូបិយប័ណ្ណឌីជីថល ព្រមទាំងការចូលរួមពីធនាគារ ក្នុងការគាំទ្រដល់ការបង្កើតថ្មី សមស្របទៅនឹងការរំពឹងទុក របស់អ្នកប្រើប្រាស់ ឌីជីថលនោះ អាចជួយជំរុញពាណិជ្ជកម្ម នៅលើបណ្តាញឌីជីថល កាន់តែរីកចម្រើន។ ប៉ុន្តែការទូទាត់រហ័សជាងមុន ក៏បើកឱកាសឲ្យមានការក្លែងបន្លំ លឿនជាងមុនផងដែរ។ ទន្ទឹម និង នេះ អ្នកបច្ចេកវិទ្យាហិរញ្ញវត្ថុ និងធនាគារកណ្តាលចាំបាច់ ត្រូវមានយន្តការនៅក្នុងដៃ ដើម្បីត្រួតពិនិត្យភាពមិនប្រក្រតី ដែលអាចជាសូចនាករនៃការក្លែងបន្លំ។
គួរបញ្ជាក់ថា ការទូទាត់បែបបច្ចេកវិទ្យា Contactless បានក្លាយជាជម្រើស សម្រាប់ការទូទាត់ជាទូទៅ នៅជុំវិញពិភពលោក បច្ចេកវិទ្យាដាក់ទូរស័ព្ទប៉ះ ដើម្បីទូទាត់ប្រាក់ (Tap to Phone) នឹងអនុញ្ញាតឲ្យអាជីវកម្មនានា ពិសេសអាជីវកម្មខ្នាតមីក្រូ និងខ្នាតតូច អាចបោះជំហានចូលទៅក្នុងសេដ្ឋកិច្ចឌីជីថលផងដែរ ដោយសារតែ មានភាពងាយស្រួលតាមរយៈ កម្មវិធីទូរស័ព្ទ។ បច្ចេកវិទ្យា Tap to Phone អាចឲ្យអ្នកលក់ ទទួលយក ការទូទាត់បែបបច្ចេកវិទ្យា Contactless ដោយមិនចាំបាច់ ប្រើម៉ាស៊ីនឆូតកាត៕
រក្សាសិទ្ធិដោយ៖CEN
