ភ្នំពេញ ៖ រថយន្តម៉ាកNAVARAមួយគ្រឿង បើកបក្នុងល្បឿនលឿនខ្វះការប្រុងប្រយ័ត្ន បានរេចង្កូតជ្រុលទៅបុករថយន្តLexusRX330 ចំពីមុខពេញទំហឹងបណ្តាលឲ្យរថយន្តNAVARA ខ្ទាតធ្លាក់ចូលក្នុងប្រឡាយ និងរងរបួសម្ចាស់រថយន្តទាំងសងខាងបញ្ជូនទៅមន្ទីរពេទ្យ។
ហេតុការណ៍គ្រោះថ្នាក់ចរាចរណ៍នេះដែរ បានកើតឡើងកាលពីវេលាម៉ោង ១១ និង ៣០ នាទីយប់ថ្ងៃចន្ទទី ៨ ខែកុម្ភៈឆ្នាំ ២០២១ ត្រង់ចំណុចជាប់និងការ៉ាស់សាំង ptt ស្ថិតនៅតាមបណ្តោយផ្លូវជាតិលេខ៣ ក្នុងភូមិទួលកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ។
បើយោងតាមប្រភពព័ត៌មានពីសមត្ថកិច្ចនៅកន្លែងកើតហេតុ បានឲ្យដឹងថា មុនពេលកើតហេតុគាត់បានឃើញរថយន្តម៉ាកLexus RX330 មួយគ្រឿងពណ៌សពាក់ផ្លាកលេខភ្នំពេញ2-BA7661 បើកបដោយជនជាតិចិន ធ្វើដំណើរតាមបណ្តោយផ្លូវជាតិលេខ៣ ក្នុងទិសដៅពីត្បូងមកជើងក្នុងល្បឿនលឿន ខណៈមកដល់ចំណុចកើតហេតុ ស្រាប់តែមានរថយន្តមួយគ្រឿងទៀតម៉ាក NAVARA ពណ៌កណ្តុរប្រមេះពាក់ផ្លាកលេខ ភ្នំពេញ2-T 04 86 បើកបដោយជនជាតិខ្មែរ ធ្វើដំណើរតាមបណ្តោយផ្លូវជាតិលេខ៣ដូចគ្នា ក្នុងទិសដៅបញ្ច្រាសទិសពីជើងមកត្បូង ខណៈមកដល់ចំណុចកើតហេតុ ក៏ជ្រុលទៅបុកនឹងរថយន្ត LexusRX330 ចំពីមុខពេញទំហឹងបណ្តាលឲ្យរថយន្តរងការខូចខាត ខ្ទេចផ្នែកខាងមុខទាំងសងខាងយ៉ាងដំណំ។
ក្រោយពេលកើតហេតុសមត្ថកិច្ចមូលដ្ឋាន សហការជាមួយនឹងខាងជំនាញចរាចរណ៍ខណ្ឌកំបូល ចុះមកដល់រួចក៏ប្រគល់តួនាទីនេះ ទៅឲ្យខាងចរាចរណ៍ជំនាញក្រុង ចុះមកវាស់វែងនិងធ្វើកំណត់ហេតុ យករថយន្តស្ទូចមកស្ទូចយករថយន្តទាំង២គ្រឿង ទៅរក្សាទុកនៅខាងការិយាល័យចរាចរណ៍ផ្លូវគោក រង់ចាំដោះស្រាយនៅពេលក្រោយ៕ រក្សាសិទ្ធិដោយ៖ សា មេត
