ភ្នំពេញ ៖ នេះជាករណីថ្មីមួយទៀតហើយ ដែលគួរឲ្យស្អប់ខ្លាំងបំផុត ខណៈដែលនារីម្នាក់ចេញពីធ្វើការនៅពេលយប់ និងទើបតែបើកលុយហើយថ្មីៗ ហៅ PassApp ជិះ ស្រាប់តែដល់កន្លែងស្ងាត់ ធ្វើសកម្មភាពប្លន់យកលុយគ្មានសល់ រួចបើកគេចខ្លួនបាត់ស្រមោលតែម្តង។
ហេតុការណ៍នេះបានបង្កឲ្យមានការភ្ញាក់ផ្អើល កាលពីវេលាម៉ោងប្រមាណ ១០ យប់ថ្ងៃទី៧ ខែកុម្ភៈ ឆ្នាំ២០២១ ស្ថិតនៅតាមបណ្តោយផ្លូវលេខ R6 ជិតផ្លូវរថភ្លើង ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
នារីរងគ្រោះបានរៀបរាប់ទាំងទឹកភ្នែកឲ្យដឹងថា មុនពេលកើតហេតុ រូបនាងបានចេញពីធ្វើការនៅច្បារអំពៅ ហើយបានហៅ PassApp ជិះ ក្នុងគោលបំណងទៅផ្ទះមីង នៅខាងក្រោយពេទ្យកាល់ម៉ែត្រ (ម្តុំវិហារចាម)។
នារីរងគ្រោះបន្តថា លុះពេលមកចំណុចកើតហេតុ (កន្លែងស្ងាត់) ស្រាប់តែជនសង្ស័យជាអ្នករត់កង់បីឥណ្ឌា (PassApp) បានយកលេសឈប់បត់ជើងតូច រួចហើយក៏បានធ្វើសកម្មភាពដកកាំបិត មកភ្ជង់គំរាមនាង យកកាបូបស្ពាយដែលមានលុយក្នុងនោះចំនួន 210 $ ហើយដេញនាងចុះពីកង់បី រួចបើកគេចខ្លួនបាត់ស្រមោល ដោយមិនរំខានដល់សមត្ថកិច្ចមូលដ្ឋានឡើយ។
ក្រោយហេតុការណ៍បានកើតឡើង សមត្ថកិច្ចមូលដ្ឋាន ក៏បានចុះមកដល់កន្លែងកើតហេតុ ហើយក៏បានដឹកនារីរងគ្រោះ ទៅកាន់ប៉ុស្តិ៍រដ្ឋបាលស្រះចក ដើម្បីឲ្យនាងដាក់ពាក្យបណ្តឹង និងក៏ដូចកំណត់មុខសញ្ញាដើម្បីតាមចាប់ជនសង្ស័យមកផ្តន្ទាទោសតាមផ្លូវច្បាប់៕ រក្សាសិទ្ធិដោយ៖ លឹម ហុង
