ភ្នំពេញ ៖ ការប្រារឰពិធីបុណ្យចូលឆ្នាំថ្មីចិន ត្រូវបានកំណត់ទៅតាមចន្ទគតិចិន ជាហេតុធ្វើឱ្យកាលបរិច្ឆេទប្រែប្រួល ជារៀងរាល់ឆ្នាំ នៅក្នុងប្រតិទិនសុរិយគតិ។ នៅក្នុងប្រតិទិនសុរិយគតិ កាលបរិច្ឆេទនៃការប្រារឰពិធីចូលឆ្នាំចិន មានបម្រែបម្រួលជារៀងរាល់ឆ្នាំ ពោលគឺចន្លោះ ថ្ងៃទី២១ ខែមករា ដល់ថ្ងៃ ទី២០ ខែកុម្ភៈ។ ជាទូទៅ ពិធីបុណ្យនេះបានចាប់ផ្ដើមធ្វើឡើង នៅចំថ្ងៃដែលព្រះចន្ទថ្មី បានចាប់ផ្ដើមរះបំភ្លឺលោកិយ។
ពិធីចូលឆ្នាំថ្មីប្រពៃណីចិន ត្រូវបានប្រារឰធ្វើឡើងនៅតាមតំបន់នានា ដែលមានប្រជាជនចិនរស់នៅយ៉ាងច្រើនកុះករ។ គេចាត់ ទុកពិធីបុណ្យនេះជាពិធីបុណ្យដ៏សំខាន់មួយ សម្រាប់ជនជាតិចិន និងជនជាតិដទៃទៀត ដែលឥទ្ធិពលវប្បធម៌ចិនបានជះសាយ ភាយទៅដល់ដូចជា ប្រទេសវៀតណាម កូរ៉េ ម៉ុងហ្គោល នេប៉ាល់ ប៊ូតង់ ជាដើម។
មនុស្សម្នាទាំងឡាយ ត្រូវស្លៀកពាក់ថ្មីៗ ដើម្បីរង់ចាំស្វាគមន៍ឆ្នាំថ្មីចូលមកដល់។ ជាទូទៅពណ៌ក្រហមត្រូវបានគេប្រើប្រាស់ ដើម្បីតុបតែងលម្អ។ មនុស្សចាស់ៗបានធ្វើ អាំងប៉ាវពណ៌ក្រហម មួយកញ្ចប់ផ្ដល់ទៅក្មេងៗ ឬអ្នកដែលមានអាយុតិចជាង។
គួរបញ្ជាក់ថា៖ នៅប្រទេសចិនភាគខាងជើង ប្រជាជនមានទម្លាប់ជាប្រណៃណីគឺធ្វើ (នំដុត) ទុកសម្រាប់បរិភោគនៅពាក់កណ្ដាលរាត្រី (នំដុត) គឺជានិមិត្តរូបបង្ហាញនូវ [ទ្រព្យសម្បត្តិ] ពីព្រោះទម្ងន់នំដុតមានលក្ខណៈដូចទៅនឹង (មាសតម្លឹង) របស់ចិនយ៉ងដូច្នោះដែរ។
ជាក់ស្ដែងក្រុមការងារCENយើងបានចុះជួបសម្ភាសន៍ផ្ទាល់ជាមួយអ្នកមីងម្នាក់ ដែលជាអ្នកលក់នំដុត សម្រាប់សែនពេលចូលឆ្នាំចិន នៅផ្សារចាស់ផ្លូវ១១០ កែង១៣ បានប្រាប់ឲ្យដឹងថា នំដុតគាត់លក់តែ៣ថ្ងៃប៉ុណ្ណោះ ក្នុងរដូវចូលឆ្នាំចិន ព្រោះបងប្អូនដែលជាប់ខ្សែស្រឡាយចិន គាត់និយមទិញនំដុតយកទៅសែន ហើយនំរបស់គាត់តម្លៃតាមធំតូចចាប់ពី៥០០០រៀលដល់10$ ។
អ្នកមីងលក់នំដុតបានបន្ថែមទៀតថា មានភ្ញៀវមកទិញច្រើនដាច់ខ្លាំងគួរសម តែបើព្រៀបនឹងឆ្នាំមុន លក់ដាច់ចាញ់ឆ្នាំមុន ពី២០ទៅ៣០ភាគរយ បើព្រៀបធៀបនឹងឆ្នាំ២០២០៕ រក្សាសិទ្ធដោយ៖សារឿន
