ភ្នំពេញ ៖ រថយន្តកាមរីបាឡែន បើកឆ្លងផ្លូវជ្រុលទៅបុករះគូទរថយន្តសាំយ៉ុង និងបង្គោលរបងស្ថានីយ៍ទូរទស្សន៍CTN ១ដើម បន្តទៅបុកប៉ាណូពីរផ្ទាំងទៀត រួចផ្ទប់ជាប់ប្រអប់ភ្លើងរបស់រដ្ឋមួយប្រអប់ បណ្ដាលឱ្យរងការខូចខាត។
ហេតុការណ៍នេះ បានកើតឡើងកាលពីវេលាម៉ោង ៤និង៤៥នាទី រសៀលថ្ងៃទី១១ ខែកុម្ភៈ ឆ្នាំ ២០២១ ត្រង់ចំណុចមុខស្ថានីយទូរទស្សន៍ ctn តាមបណ្តោយផ្លូវជាតិលេខ៥ ភូមិក្រោលគោ សង្កាត់គីឡូម៉ែត្រលេខ ៦ ខណ្ឌឫស្សីកែវ រាជធានីភ្នំពេញ។
រថយន្តរងគ្រោះម៉ាកសាំយ៉ុង ពណ៌សំបកឪឡឹក ពាក់ផ្លាកលេខកំពង់ស្ពឺ 2A 3152 បើកដោយបុរសម្នាក់មិនត្រូវបានស្គាល់ឈ្មោះនោះទេ។
បើយោងតាមប្រភពព័ត៌មានពីកន្លែងកើតហេតុ បានឱ្យដឹងថា នៅមុនពេលកើតហេតុ គាត់បានឃើញរថយន្តកាមរីបាឡែនមួយគ្រឿង ពណ៌ស្កពាក់ផ្លាកលេខ ភ្នំពេញ2-AZ 0615 បើកបរដោយបុរសម្នាក់រួមនឹងអ្នកដំណើរ ធ្វើដំណើរតាមបណ្តោយផ្លូវបេតុងទិសដៅពីលិចទៅកើត ខណៈមកដល់កន្លែងកើតហេតុស្រាប់តែមានរថយន្តមួយគ្រឿងទៀត ម៉ាកសាំយ៉ុងពណ៌សំបកឪឡឹក ពាក់ផ្លាកលេខកំពង់ស្ពឺ 2A 31 52 បើកបរដោយបុរសម្នាក់ ធ្វើដំណើរតាមបណ្តោយផ្លូវជាតិលេខ៥ ក្នុងទិសដៅពីជើងទៅត្បូង ក្នុងល្បឿនលឿន លុះមកដល់ចំណុចកើតហេតុត្រូវរថយន្តបង្កបានបុកគូទចំពីចំហៀងផ្នែកខាងក្រោយ រួចជ្រុលទៅបុកប្រអប់ភ្លើងរបស់រដ្ឋ១ ប្រអប់ និងផ្ទាំងប៉ាណូ២ផ្ទាំង ព្រមទាំងបង្គោលរបងរបស់ស្ថានីយ៍ទូរទស្សន៍CTN ១ដើមទៀត។
ក្រោយពេលកើតហេតុ សមត្ថកិច្ចមូលដ្ឋានសហការជាមួយជំនាញចរាចរណ៍ខណ្ឌឬស្សីកែវ ចុះមកដល់រួចទាក់ទងទៅជំនាញក្រុង ចុះមកវាស់វែងនិងធ្វើកំណត់ហេតុ ស្ទូចយករថយន្តបង្កខាងលើ ទៅរក្សាទុកនៅការិយាល័យចរាចរណ៍ផ្លូវគោក រង់ចាំដោះស្រាយនៅពេលក្រោយ។ ដោយឡែករថយន្តសាំយ៉ុង ខាងរថយន្តបង្កសងជាសំណង ៣០០$ បញ្ចប់រឿងនៅកន្លែងកើតហេតុ៕ រក្សាសិទ្ធិដោយ៖ សា មេត
