ភ្នំពេញ ៖ “សហគមន៍ធុរកិច្ចនិងវិនិយោគជប៉ុន កោតស្ញប់ស្ញែងការដឹកនាំរបស់រាជរដ្ឋាភិបាលកម្ពុជា ជាពិសេស បញ្ញាញាណរបស់សម្តេចតេជោនាយករដ្ឋមន្ត្រី ក្នុងការអភិវឌ្ឍសេដ្ឋកិច្ច ទោះបីមានការញាំញីដោយការរាតត្បាតនៃជំងឺកូវីដ-១៩ ក៏ដោយ”, នេះជាអ្វីដែលឯកអគ្គរដ្ឋទូតនិងផ្នែកឯកជនជប៉ុនបានលើកឡើងក្នុងកិច្ចប្រជុំលើកទី២១ នៃគណៈកម្មាធិការចម្រុះកម្ពុជា-ជប៉ុន កាលពីរសៀលថ្ងៃទី១១ ខែកុម្ភៈ ឆ្នាំ២០២១ នេះ។ កិច្ចប្រជុំនេះដឹកនាំដោយឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា និងឯកឧត្តម ម៉ាសាហ៊ីរ៉ុ មីខាមី (Masahiro MIKAMI) ឯកអគ្គរដ្ឋទូតជប៉ុនប្រចាំកម្ពុជា។
សេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា នៅរសៀលថ្ងៃព្រហស្បតិ៍ ទី១១ ខែ កុម្ភៈ ឆ្នាំ២០២១ នៅទីស្តីការក្រុមប្រឹក្សាអភិវឌ្ឍន៍កម្ពុជា ឯកឧត្តម សុខ ចិន្តាសោភា រដ្ឋមន្ត្រីប្រតិភូអម នាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា និងឯកឧត្តម ម៉ាសាហ៊ីរ៉ូ មីខារី (Masahiro MIKAMI) ឯកអគ្គរដ្ឋទូតវិសាមញ្ញនិងពេញសមត្ថភាពនៃប្រទេសជប៉ុនប្រចាំកម្ពុជា បានដឹកនាំកិច្ចប្រជុំ លើក ទី៤១ នៃគណៈកម្មាធិការចម្រុះកម្ពុជា-ជប៉ុន ដោយមានការចូលរួមពីតំណាងក្រសួង ពាក់ព័ន្ធនៃរាជរដ្ឋាភិបាល -ស្ថាប័ន , ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA), អង្គការ ពាណិជ្ជកម្មក្រៅប្រទេសជប៉ុន (JETRO), សមាគមធុរកិច្ចជប៉ុននៅកម្ពុជា (BAC), និងតំណាងក្រុមហ៊ុន ជប៉ុនដែលមានប្រតិបត្តិការវិនិយោគនៅកម្ពុជា ចំនួនប្រមាណ ១១០ រូប។ កិច្ចប្រជុំទ្វេភាគីនេះ ត្រូវបាន រៀបចំឡើងចាប់តាំងពីឆ្នាំ២០០៩ មក ក្រោមក្របខ័ណ្ឌនៃ កិច្ចព្រមព្រៀងរវាងព្រះរាជាណាចក្រកម្ពុជា និង ជប៉ុន ស្តីពីសេរីភាវូបនីយកម្ម ការជំរុញ និងការការពារវិនិយោគ ដែលត្រូវបានចុះហត្ថលេខា ដោយ សម្តេចតេជោនាយករដ្ឋមន្ត្រី និងឯកឧត្តមនាយករដ្ឋមន្ត្រីជប៉ុន ស៊ីនហ្សូ អាប (Shinzo Abe) កាលពី ថ្ងៃទី១៤ ខែមិថុនា ឆ្នាំ២០០៧។ កិច្ចប្រជុំនេះ គឺជាផ្នែកមួយនៃយន្តការថែទាំវិនិយោគ ដោយបានផ្តល់ ឱកាសដល់អ្នកវិនិយោគជប៉ុន លើកឡើងដោយផ្ទាល់នូវបញ្ហាប្រឈមនានា និង សំណូមពរជូនតំណាង រាជរដ្ឋាភិបាលពិនិត្យ និងរកដំណោះស្រាយ ក្នុងគោលបំណងធ្វើឱ្យប្រសើរឡើងនូវបរិយាកាសវិឱយោត និងធុរកិច្ចនៅកម្ពុជា។
អង្គប្រជុំបានផ្តោតការពិភាក្សាលើចំណុចអាទិភាពមួយចំនួន ដូចជា (១) ការទូទាត់ប្រាក់បំណាច់ អតីតភាពការងារសម្រាប់រោងចក្រសហគ្រាសក្នុងវិស័យកម្មន្តសាល, (២) បញ្ហាពាក់ព័ន្ធនឹងបញ្ហាពន្ធដារ ជាពិសេសការប្រើប្រាស់ប្រព្រឹត្តកម្មគណនេយ្យចំពោះវិស័យកាត់ដេរ និងកម្មន្តសាល នីតិវិធីនាំចូលរថយន្ត និងវិធានប្រកួតប្រជែងមិនស្មើភាព , (៣) ការអនុវត្ត, (៤ ) តារាងតម្លៃអគ្គិសនីថ្មីសម្រាប់ឆ្នាំ២០២១ និងស្វែងរកលទ្ធភាពក្នុងការបញ្ចុះថ្លៃដើមនៃការផលិតអគ្គីសនី, (៥) បញ្ហាឡូជីស្ទិក ដោយស្វែងរកលទ្ធភាព ក្នុងការពន្លឿននីតិវិធីសម្រាប់បើកច្រកព្រំដែនអន្តរជាតិស្ទឹងបត់ជាបណ្តោះអាសន្នដើម្បីសម្រួលដល់ការ ធ្វើពាណិជ្ជកម្មឆ្លងកាត់ព្រំដែនកាន់តែប្រសើរ។
ឯកឧត្តម សុខ ចិន្តាសោភា បានកោតសរសើរនិងវាយតម្លៃខ្ពស់ចំពោះការចូលរួមយ៉ាងសកម្ម របស់សហគមន៍ធុរកិច្ចជប៉ុននៅកម្ពុជា ដែលជានិច្ចកាល បានបន្តជំរុញសកម្មភាពវិនិយោគរបស់ខ្លួននៅ កម្ពុជាឱ្យមានសកម្មភាពរស់រវើក ទោះបីមានការរំខានពីការរាតត្បាតនៃជំងឺកូវីឌ-១៩ក៏ដោយ។ នេះជា សក្ខីភាពមួយដែលអ្នកវិនិយោគជប៉ុនបានបង្ហាញពីការប្តេជ្ញាចិត្តបន្តការវិនិយោគរបស់ខ្លួននៅកម្ពុជា និង ផ្តល់ជំនឿទុកចិត្តយ៉ាងមុតមាំចំពោះរាជរដ្ឋាភិបាលកម្ពុជា ក្រោមការដឹកនាំប្រកបដោយបញ្ញាញាណដ៍ ឈ្លាសវៃនិងប៉ិនប្រសប់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជា ណាចក្រកម្ពុជា។
ឯកឧត្តម ម៉ាសាហ៊ីរ៉ូ មីខាមី បានកោតស្ញប់ស្ញែងចំពោះការដឹកនាំដ៏មោះមុតរបស់រាជរដ្ឋាភិបាលកម្ពុជា ជាពិសេស បញ្ញាញាណដ៏ឈ្លាសវៃនិងប៉ិនប្រសប់របស់ សម្តេចតេជោនាយករដ្ឋមន្ត្រី ក្នុងការ ទប់ទល់នឹងការញ៉ាញ្ជីនៃជំងឺរាតត្បាតកូវីដ -១៩ ដោយរក្សាបាននូវឧត្តមភាពប្រកួតប្រជែងរបស់កម្ពុជាក្នុង តំបន់។ ឯកឧត្តមឯកអគ្គរដ្ឋទូតក៏បានថ្លែងអំណរគុណយ៉ាងជ្រាលជ្រៅជូនចំពោះក្រុមប្រឹក្សាអភិវឌ្ឍន៍ កម្ពុជា និងក្រសួង -ស្ថាប័នពាក់ព័ន្ធទាំងអស់ ដែលតែងតែខិតខំប្រឹងប្រែងប្រកបដោយស្មារតីទទួលខុស ត្រូវខ្ពស់ក្នុងការសម្របសម្រួល និងចាត់វិធានការឆ្លើយតបប្រកបដោយប្រសិទ្ធភាព។
គួរកត់សម្គាល់ថា គិតត្រឹមដំណាច់ខែមករា ឆ្នាំ២០២១ ក្រុមប្រឹក្សាអភិវឌ្ឍន៍កម្ពុជាបានទទួល ស្វាគមន៍ និងចុះបញ្ជីតម្រោងវិនិយោគមានលក្ខណៈសម្បត្តិគ្រប់គ្រាន់របស់ជប៉ុន ចំនួន ១៤៤គម្រោង ក្នុងទុនវិនិយោគសរុបប្រមាណ ២,៧៩ប៊ីលានដុល្លារអាមេរិក ក្នុងនោះមានគម្រោងវិនិយោគចំនួន ៦៦ តម្រោង បានបោះទីតាំងវិនិយោគក្នុងតំបន់សេដ្ឋកិច្ចពិសេស ដែលមានទុនវិនិយោគសរុបប្រមាណ ៣៤០ លានដុល្លារអាមេរិក៕ រក្សាសិទ្ធិដោយ៖បញ្ញាស័ក្តិ
