ភ្នំពេញ ៖ បុរសម្នាក់និងរួមដំណើរ២នាក់ទៀត បានបើករថយន្តក្នុងល្បឿនលឿនមិនប្រយ័ត្នបានជ្រុលចង្កូតទៅបុករថយន្តប្រភេទដឹកទំនិញ៥តោន ចំពីក្រោយពេញទំហឹង បណ្តាលឲ្យរថយន្តបង្កខ្ទេចផ្នែកខាងមុខស្ទើរទាំងស្រុង។
ហេតុការណ៍គ្រោះថ្នាក់ចរាចរណ៍នេះដែរ កើតឡើងកាលពីវេលាម៉ោង ៤ និង ៤០នាទីយប់ទៀបភ្លឺថ្ងៃសៅរ៍ ទី១៣ ខែកុម្ភៈ ឆ្នាំ ២០២១ ស្ថិតនៅតាមបណ្ដោយផ្លូវជាតិលេខ ៥ ក្នុងសង្កាត់គីឡូម៉ែត្រលេខ ៦ ខណ្ឌឫស្សីកែវ រាជធានីភ្នំពេញ។
ប្រភពព័ត៌មានពីសមត្ថកិច្ចនៅកន្លែងកើតហេតុ បានឲ្យដឹងថា មុនពេលកើតហេតុ គាត់បានឃើញរថយន្តប្រភេទដឹកទំនិញ ៥ តោន មួយគ្រឿង ពណ៌សពាក់ផ្លាកលេខ ភ្នំពេញ3-E 5380 បើកបរដោយបុរសម្នាក់ ធ្វើដំណើរតាមបណ្តោយផ្លូវជាតិលេខ៥ ក្នុងទិសដៅពីជើងទៅត្បូង ក្នុងល្បឿនមធ្យម ខណៈមកដល់កន្លែងកើតហេតុ ស្រាប់តែមានរថយន្តមួយគ្រឿងទៀត ម៉ាកធុនត្រាពណ៌សពាក់ផ្លាកលេខភ្នំពេញ 2-Y 2098 បើកបរដោយបុរសម្នាក់ រួមដំណើរ២នាក់ទៀត ធ្វើដំណើរពីក្រោយស្របគ្នា ក្នុងទិសដៅពីជើងមកត្បូងក្នុងល្បឿនលឿនដូចហោះមកបុកចំពីក្រោយរថយន្តដឹកទំនិញ៥តោនពេញទំហឹង បណ្តាលឲ្យប៉ើងទៅមុខជាច្រើនម៉ែត្រ រងការខូចខាតតិចតួច ចំណែកឯរថយន្តបង្កវិញ រងការខូចខាតផ្នែកខាងមុខទាំងស្រុង និងរងរបួសអ្នកនៅក្នុងរថយន្ត ធ្ងន់ស្រាល៣នាក់បញ្ជូនទៅមន្ទីរពេទ្យ។
ក្រោយពេលកើតហេតុ សមត្ថកិច្ចមូលដ្ឋានចុះមកដល់រួចក៏ទំនាក់ទំនង ទៅខាងជំនាញចរាចរណ៍ក្រុង ឲ្យចុះមកវាស់វែងនិងធ្វើកំណត់ហេតុយករថយន្តពីរគ្រឿង ទៅរក្សាទុកនៅការិយាល័យចរាចរណ៍ផ្លូវគោក រង់ចាំដោះស្រាយនៅពេលក្រោយ៕ រក្សាសិទ្ធិដោយ៖ សាមេត
