ភ្នំពេញ៖ បើទោះបីជាមានជំងឺកូវីដ-១៩ តាមមករំខាននៅឆ្នាំ២០២០ យ៉ាងណាក៏ដោយ ក៏ធនាគារ អេស៊ីលីដា បានប្រកាសពីប្រាក់ចំណេញក្រោយបង់ពន្ធរួច មានដល់ទៅ ជាង១៤១ លានដុល្លារអាមេរិក នៅឆ្នាំ២០២០ ដោយមានកំណើន ១៧% ធៀបនឹងឆ្នាំ២០១៩។
បើតាមរបាយការណ៍របស់ធនាគារអេស៊ីលីដាដ៏ដែលនេះ បានឱ្យដឹងទៀតថា គ្រាន់តែត្រីមាសទី ៤ ដែលជាត្រីមាសចុងក្រោយ នៃឆ្នាំ២០២០ ធៀបនឹង ត្រីមាសទី៤ នៃឆ្នាំ២០១៩ ធនាគារក្នុងស្រុកមួយនេះ សម្រេចបានប្រាក់ចំណេញសុទ្ធរហូតដល់ទៅជាង ២៣% ជាមួយនឹងទឹកប្រាក់ប្រមាណជាង ៤៣លានដុលារ។
បើតាមរបាយការណ៍ប្រាក់ចំណូល មិនទាន់បង់ពន្ធរបស់អេស៊ីលីដា នៅឆ្នាំ ២០២០ មានដល់ទៅ ១៨០ លានដុល្លារ ខណៈដែលទ្រព្យសកម្មសរុបមានជាង ៦ពាន់ ៥០០លានដុល្លារ កើនខ្ពស់ជាង ពីឆ្នាំ ២០១៩ រហូតដល់ទៅប្រមាណជិត ៤០០ លានដុល្លារអាមេរិក។
ដោយឡែក សម្រាប់ឥណទានដែលធនាគារអេស៊ីលីដា បានផ្ដល់ជូនអតិថិជន ក៏មានកំណើនដែរ ដោយ ឆ្នាំ២០២០ មានដល់ទៅជាង ៤ពាន់៥០០ លានដុល្លារ កើនជាង ១៦% បើធៀបនឹង ឆ្នាំ២០១៩។ ចំណែកឯ ឥណទានមិនដំណើរការវិញ មានប្រមាណ ២,៤% នៅក្នុងឆ្នាំ២០២០ រួមជាមួយនិងប្រាក់បញ្ញើរបស់អតិថិជន មានប្រមាណ ៤ពាន់ ៣០០លានដុល្លារអាមេរិក កើនជិត ៣០០លានដុល្លារអាមេរិក៕
រក្សាសិទ្ធិដោយ៖CEN
