កំពង់ចាម ៖ នៅព្រឹក ថ្ងៃទី១២ ខែកុម្ភៈ ឆ្នាំ២០២១ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អញ្ជើញជួបសំណេះសំណាលជាមួយកងបោសសម្អាតគ្រាប់យុទ្ធភ័ណ្ឌមិនទាន់ផ្ទុះក្រោមទឹក ស្ថិតនៅភូមិវាល ឃុំមានជ័យ ស្រុកស្រីសន្ធរ ខេត្តកំពង់ចាម ។
យោងតាមរបាយការណ៍សង្ខេបរបស់ ឯកឧត្តម នាយឧត្តមសេនីយ៍ សែម សុវណ្ណនី បានឲ្យដឹងថា គិតត្រឹម ថ្ងៃទី១១ ខែកុម្ភៈ ឆ្នាំ ២០២១ ប្រតិបត្តិការ រុករក ទទួល បានលទ្ធផលគួរជាទីមោទនៈ ដោយបានរកឃើញគ្រាប់មិនទាន់ផ្ទុះ ទំហំ60-105mm ចំនួន ៧២២គ្រាប់ និងគ្រាប់ ប្រភេទតូច (ប្រភេទកាំភ្លេីងដៃ និងកាំភ្លើងយន្ត) ចំនួន ៥៤.៩២៥គ្រាប់ ។ សរុបរួមមាន ៥៥.៦៩៧គ្រាប់ ដែលត្រូវបានរុករកឃើញនៅក្នុងឃ្លុបទី១ និងនៅ៣ឃ្លុបទៀត ដែលត្រូវយកចេញជាបន្តបន្ទាប់។
មានប្រសាសន៍ក្នុងឱកាសនោះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍ថាតាងនាមសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី សូមថ្លែងនូវការកោតសរសើរ និងអរគុណយ៉ាងជ្រាលជ្រៅចំពោះ ឯកឧត្តម នាង ផាត ចំពោះឯកឧត្តម សែម សុវណ្ណនី និងចំពោះឯកឧត្តម នាយឧត្តមសេនីយ៍ នាយទាហាន នាយទាហានរង និងអស់លោកជាមន្ត្រីជំនាញទាំងអស់ ព្រមទាំងអ្នកពាក់ព័ន្ធទាំងឡាយ រួមសាមគ្គីគ្នាធ្វើឲ្យប្រតិបត្តិការ នេះប្រកបដោយជោគជ័យ។
សម្ដេចក្រឡាហោម បានបន្ថែមថា រហូតមកដល់ពេលនេះមិនទាន់បានបញ្ចប់នៅឡើយទេ ដូចក្នុងរបាយការណ៍បានបញ្ជាក់ហើយថាអាចរហូតដល់អំឡុងខែឧសភាទើបអាចចប់។ ប៉ុន្តែយើងមិនតក់ក្រហល់នោះទេ បញ្ហាចម្បងគឺសុវត្ថិភាព។ យើងមិនត្រូវពន្លឿនដោយការប្រថុយប្រថាននោះទេ។
សម្ដេចបានបញ្ជាក់ថានៅទីនេះក្រៅពីរកឃើញគ្រាប់គឺបានរកឃើញធាតុមនុស្សម្នាក់។ ក្នុងឱកាសនោះដែរសម្ដេចក៏បានអំពាវនាវក៏ដូចជាប្រកាសស្វែងរកសាច់ញាតិនៃអតីតយុទ្ធជនដែល បានមរណៈភាពនៅក្នុងកប៉ាល់ដែលលិច។
សម្ដេចក៏បានផ្សព្វផ្សាយអំពីគោលនយោបាយភូមិឃុំមានសុវត្ថិភាពរបស់រាជរដ្ឋាភិបាលជូនបងប្អូនប្រជាពលរដ្ឋនិងអង្គភាពផងដែរ។ សម្ដេចក៏បានអំពាវនាវដល់មន្ត្រីមូលដ្ឋានពិសេសលោកមេឃុំ មេភូមិ ស្មៀន ប៉ុស្តិ៍នគរបាលរដ្ឋបាល គឺសំខាន់ណាស់ត្រូវបម្រើសេវាសាធារណៈជូនប្រជាពលរដ្ឋឲ្យបានល្អ។
សូមបញ្ជាក់ថា ប្រតិបត្តិការរុករក និងប្រមូលគ្រឿងយុទ្ធភណ្ឌ ក្នុងបាតទន្លេមេគង្គ ក្នុងទំហំ ១៥០០ម៉ែត្រ ស្មើនឹង ១៥០ហិកតា គឺត្រូវបានអនុវត្តឡើងតាំងពីចុងខែតុលា ឆ្នាំ២០២០ នឹងគ្រោងបញ្ចប់នៅអំឡុងខែឧសភា ឱ្យទាន់មុនរដូវវស្សាខាងមុខនេះ។
ក្រុមការងាររុករកយុទ្ធភ័ណ្ឌមិនទាន់ផ្ទុះ បានរកឃើញឆ្អឹងសាកសពរបស់អតីតទាហានម៉ារីន លន់ ណុល មានឈ្មោះ CHHIM CHHEANGLY ដែលបានបន្សល់ទុកក្នុងនាវាដឹកគ្រាប់ ដែលបានលិចក្នុងទន្លេមេគង្គ ក្នុងភូមិសាស្ត្រភូមិវាល ឃុំ មានជ័យ ស្រុកស្រីសន្ធរ ខេត្តកំពង់ចាម ។
ជាការជូនដំណឹងដល់សាច់ញាតិ បងប្អូន មកទំនាក់ទំនងជាមួយរដ្ឋបាលខេត្តកំពង់ចាម ដើម្បីទទួលយកធាតុរបស់គាត់ទៅធ្វើបុណ្យតាមប្រពៃណី ៕ រក្សាសិទ្ធិដោយ៖បញ្ញាស័ក្តិ
