ភ្នំពេញ ៖ រថយន្តស៊េរីទំនើប២គ្រឿងប៉ះគ្នាត្រង់ចំណុចផ្លូវបែកជាបួន រងការខូចខាតយ៉ាងដំណំ សំណាងដែរ ដែលមិនបង្កគ្រោះដល់អ្នកបើកបរ និងប្រជាពលរដ្ឋដែលធ្វើដំណើរតាមដងផ្លូវឡើយ។
ហេតុការណ៍នេះ បានបង្កការភ្ញាក់ផ្អើលយ៉ាងខ្លាំង ត្រង់ចំណុចផ្លូវបែកជាបួនផ្លូវ៩៦កែង៦១ ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ ។
តាមប្រភពដែលឃើញហេតុការណ៍ បានប្រាប់ក្រុមការងារCENឲ្យដឹងថា មុនកើតហេតុគេឃើញរថយន្តឡង់គ្រីសស័រពណ៌ខ្មៅពាក់ផ្លាកលេខ (ន.ប 2-3608) បើកបរទិសដៅពីលិចទៅកើតតាមបណ្ដោយផ្លូវ៩៦ ឆ្លងកាត់ផ្លូវ៦១ជិតផុងក៏មានរថយន្តមួយគ្រឿងទៀត ម៉ាកមីស៊ី មីស៊ី ត្រាយតុន ពណ៌ខ្មៅពាក់ផ្លាកលេខភ្នំពេញ 2AY-2336 បើកបរតាមផ្លូវ៦១រួចបត់ឆ្វេង បណ្ដាលឲ្យគៀរថយន្តឡង់គ្រីសស័ររងការខូចខាតចាប់ពីទ្វាមុខរហូតដល់ក្រោយយ៉ាងដំណំ ចំណែករថយន្តមីស៊ី មីស៊ីវិញ ខូចខាតចង្កៀងមុខយ៉ាងដំណំផងដែរ។ ក្នុងករណីនេះ មិនបង្កឲ្យមានអ្នករបួសឡើយ គ្រាន់តែខូចខាតរថយន្តទាំងសងខាង។
ក្រោយកើតហេតុ សមត្ថកិច្ចមូលដ្ឋាននិងសមត្ថកិច្ចជំនាញខណ្ឌបានមកដល់ ក៏បានឲ្យម្ចាស់រថយន្តទាំងពីរ ធ្វើការចរចាគ្នា ដោយអ្នកបើករថយន្តមីស៊ីមីស៊ីព្រមទទួលកំហុស សងជាសំណងទៅខាងរថយន្តឡង់គ្រីសស័ចំនួន1000$ បញ្ចប់រឿងនៅកន្លែងកើតហេតុ៕ រក្សាសិទ្ធិដោយ៖ សាររឿន
