បន្ទាយមានជ័យ :ក្រសួងធនធានទឺកនឹងសាងសង់ទំនប់បង្ហៀរនៅអាងអូខៃដន បន្ទាប់ពីក្រុមហ៊ុនអានកូធ្វើអោយប្រែប្រួលរបបទឹកដែលបង្កបញ្ហាមួយចំនួនដល់ពលរដ្ឋនិងអាជ្ញាធរដែនដីជាបន្តបន្ទាប់នោះ។
លិខិតលេខ១៧៥៣ធទឧចុះថ្ងៃទី២២សីហា២០១៧របស់លោក លឹម គានហោ រដ្ឋមន្ត្រីក្រសួងធនធានទឹកនិងឧតុនិយមផ្ញើជូនលោកអភិបាលខេត្តបន្ទាយមានជ៏យ ដែលCENទទួលបានច្បាប់ថតចម្លងដែរអោយដឹងថា: ចំពោះសំណើរបស់រដ្ឋបាលខេត្តបន្ទាយមានជ័យនោះ ក្រសួងនឹងបញ្ចូលក្នុងគម្រោង Imigation Development and Flood Mitigation in BanteayMeanchey Province ដែលកំពុងដំណើរការជ្រើសរើសទីប្រឹក្សាត្រួតពិនិត្យសំណង់(កុងស៊ុលតង់) សម្រាប់សិក្សាគ្រោងប្លង់លម្អិត។ ពោលគឺបន្ទាប់ពីរដ្ឋបាលខេត្តបន្ទាយមានជ័យលិខិតលេខ៩២៩/១៧ លសចុះថ្ងៃទី១៩កក្កដា២០១៧ ស្នើសុំក្រសួងធនធានទឹកនិងឧតុនិយមដើម្បីសាងសង់ទំនប់បង្ហៀរទឹកឬសំណង់បញ្ចេញទឹកមកប៉ែកខាងជើងផ្លូវជាតិលេខ៥សម្រាប់ស្រោចស្រពដល់វិស័យកសិកម្មក្នុងភូមិសាស្ត្រស្រុកអូរជ្រៅ។
ក្រសួងធនធានទឹកនិយាយថា : នៅមុនការជួសជុលនុងពងហរឹងតួទំនប់អូរខៃដនដោយក្រុមហ៊ុនអានកូនៅប៉ែកខាងជើងតួទំនប់មានBox Culvert មួយកន្លែងសម្រាប់បញ្ចេញទឹកមកស្រោចស្រពប៉ែកខាងជើងផ្លូវជាតិលេខ៥(ស្វាយ -ប៉ោយប៉ែត ដែលជារឿយៗទីតាំងនោះតែងតែដាច់ដោយទឹកជំនន់ទើបក្រុមហ៊ុនបិទតែម្តង។ ប៉ុន្តែលោក យឹម ប៊ុនរ៉ុម ប្រធានមន្ទិរធនធានទឹកខេត្តនេះ និយាយថា លិខិតនេះលោកអភិបាលខេត្តថា មិនបានឃើញនៅឡើយ។
ការសាងសង់នេះត្រូវបាន អ្នកបច្ចេកទេសនិងអ្នកវិភាគនិយាយថា ដើម្បីគ្រប់គ្រង់របបទឹកអាងអូខៃដននេះអោយបានល្អ ត្រឹមត្រូវនិងបញ្ជៀសបញ្ហាប្រឈមក៏ដូចជាគ្រោះមហន្តរាយពីទឹកអាងនេះ។ ព្រោះថា កន្លងមកទឹកអាងនេះដែលចាប់យកទៅវិនិយោគដោយក្រុមហ៊ុនអានកូរបស់លោកឧកញ្ញា កុក អាន នោះបានបង្កបញ្ហាទ្វេរគ្រោះ។ នៅរដូវប្រាំងពលរដ្ឋខ្វះទឹកប្រើប្រាស់ ទឹកបរិភោគព្រោះក្រុមហ៊ុនមិនបើកទឹកអោយ។ ដល់រដូវវស្សាទឹកច្រើន ក្រុមហ៊ុនបើកទ្វារអាងទម្លាក់ទឹកអោយលិចលង់ដំណាំស្រូវ លំនៅឋានពលរដ្ឋ។ ប៉ុន្តែជនជាតិវៀតណាម លោក យន់ ឌឹក ជាមេកាម្នាក់របស់ក្រុមហ៊ុនអានកូប្រាប់កាសែតរស្មីកម្ពជាថ្ងៃទី២០ តុលាថា: ក្រុមហ៊ុនបានសម្របសម្រួលបញ្ហាជាមួយពលរដ្ឋនិងអាជ្ញាធរជាបន្តបន្ទាប់។
លោក យន់ ឌឹក បញ្ជាក់ថា :”ក្នុងនោះក្រុមហ៊ុនបានទិញគ្រវាត់ចោលកុំអោយមានរឿងនៅដីស្រែពលរដ្ឋជិត១០០ហិចតា ស្ថិតនៅជាប់ទ្វារទឹកទី១ នៃអាងនេះ ដែលតែងតែរងការលិចទឹកនិងខ្វះទឹកធ្វើស្រែកន្លងមកនោះ “។ លោកនិយាយទៀតថា ក្រុមហ៊ុនក៏នឹងបន្តដោះស្រាយបញ្ហាទំនាស់ដីផ្លូវជាមួយពលរដ្ឋ”ម្ចាស់ផ្ទះក្រហម” ហើយពង្រឹងទំនប់អាងបន្ថែម ជួសជុលច្រាំងមាត់អាងនិងមាត់ប្រឡាយដែលបាក់រលេះកាលពីទឹកជំនន់ថ្ងៃទី១០-១៤តុលា២០១៧កន្លងមកនេះ។ ហើយទំនប់បង្ហៀរឬច្រកបញ្ចេញទឹក ក៏ក្រុមហ៊ុនអាចនឹងសាងសង់ដែរ៕ ដោយ : បន្ទាយ
