ភ្នំពេញ ៖ ក្រសួងសុខាភិបាល បានចេញសេចក្ដីជូនដំណឹងឲ្យដឹងថា គិតត្រឹមព្រឹកថ្ងៃទី២១ ខែកុម្ភៈ ឆ្នាំ២០២១ ក្រុមគ្រូពេទ្យជំនាញបានរកឃើអ្នកឆ្លងជំងឺកូវីដ-១៩ថ្មី ចំនួន ១៧នាក់ ថែមទៀត ក្នុងនោះមាន ១៥នាក់ ឆ្លងចេញពី «ព្រឹត្តិការណ៍សហគមន៍ ២០កុម្ភៈ» ហើយស្របពេលជាមួយគ្នានេះដែរ ក្រុមគ្រូពេទ្យបានព្យាបាលជាសះស្បើយអ្នកជំងឺនេះ ៣នាក់ ផងដែរ។
បើតាមសេចក្តីជូនព័ត៌មាន របស់ក្រសួងសុខាភិបាលបានបញ្ជាក់ថា អ្នកឆ្លងកូវីដ-១៩ ទាំង១៧នាក់នេះ រួមមាន ៖ ជនជាតិចិនច ១៤នាក់ និងវៀតណាមម្នាក់ ជាអ្នកពាក់ព័ន្ធនឹង «ព្រឹត្តិការណ៍សហគមន៍ ២០កុម្ភៈ» ដោយឡែក ជនជាតិឆេកម្នាក់ ជាអ្នកធ្វើដំណើរមកពីប្រទេសឆេក និងបុរសជនជាតិខ្មែរម្នាក់ ជាអ្នកធ្វើដំណើរមកពីប្រទេសថៃ។
ជាការទប់ស្កាត់ការចម្លងបន្តនូវវីរុសកូវីដ-១៩ ក្នុងសហគមន៍ទ្រង់ទ្រាយធំ ក្រសួងសុខាភិបាល បានអំពាវនាវដល់ប្រជាពលរដ្ឋ ឱ្យចូលរួមអនុវត្តន៍វិធានការការពារខ្លួន ឲ្យបានខ្ជាប់ខ្ជួន តាមការណែនាំរបស់ សម្តេចតេជោ ហ៊ុន សែន និងវិធានការក្រសួងសុខាភិបាល ដូចជា ត្រូវចូលរួមធ្វើចត្តាឡីស័ក ឲ្យបានត្រឹមត្រូវ, អ្នកពាក់ព័ន្ធ ១៤ថ្ងៃមុនព្រឹត្តិការណ៍សហគមន៍ ២០កុម្ភៈ ត្រូវមកធ្វើតេស្ត នៅមណ្ឌលសុខភាពចាក់អង្រែ, ត្រូវចូលរួមផ្តល់ព័ត៌មានបុគ្គល ដែលជាប់ពាក់ព័ន្ធដោយផ្ទាល់ និងប្រយោលនៃព្រឹត្តិការណ៍សហគមន៍២០កុម្ភៈ, បើមិនចាំបាច់សូមនៅផ្ទះ និងមិនត្រូវរើសអើងអ្នកដែលឆ្លងកូវីដ-១៩ នោះឡើយ។
ភោជនីយដ្ឋាន អាហារដ្ឋាន ត្រូវចាត់វិធានការអនាម័យឱ្យបានខ្ជាប់ខ្ជួន ត្រូវបាញ់ជាតិអាល់កុលសំលាប់មេរោគ នៅលើដៃ និងខ្លួនប្រាណមនុស្ស , សម្អាតតុ កៅអី ដោយបាញ់អាល់កុល, រក្សាគម្លាតអានាម័យ, ពលរដ្ឋត្រូវពាក់ម៉ាសគ្រប់ៗគ្នា , កុំទៅកន្លែងអ៊ូអរ , ហាមជួបជុំគ្នាក្នុងពិធីផ្សេងៗ…។
ចំណែកអ្នកជាសះស្បើយ៣នាក់ ក្នុងថ្ងៃដដែលនេះវិញ រួមមាន ៖ បុរសជនជាតិនីហ្សេរីយ៉ាម្នាក់ និងស្ត្រីជនជាតិចិនម្នាក់ ដែលធ្វើដំណើរមកពីក្រៅប្រទេស និងស្ត្រីជនជាតិខ្មែរម្នាក់ ជាពលករធ្វើដំណើរមកពីប្រទេសថៃ។
គួរបញ្ជាក់ថា សរុបអ្នកឆ្លងកូវីដ-១៩ នៅកម្ពុជាមានចំនួន ៥៣៣នាក់ ក្នុងនោះ បានជាសះស្បើយចំនួន ៤៧៣នាក់ និងសល់អ្នកកំពុងសម្រាកព្យាបាលនៅតាមមន្ទីរពេទ្យនានាចំនួន ៦០នាក់៕ រក្សាសិទ្ធិដោយ ពិសិដ្ឋ CEN
