ក្មេងប្រុសឥណ្ឌូនេស៊ីម្នាក់ឈ្មោះ Arya Permana អាយុ ១៤ ឆ្នាំ ដែលត្រូវបានគេចាត់ទុកថាជា ក្មេងប្រុសធាត់ជាងគេនៅលើពិភពលោក មានទំងន់ធ្ងន់បំផុតរហូតដល់ ១៩០ គីឡូក្រាម នៅក្នុងអាយុ ១១ ឆ្នាំ ឥឡូវនេះ បានស្រកជាងពាក់កណ្តាលនៃទំងន់ចាស់ហើយ។
ជាក់ស្តែង នៅពេលនេះ Arya រស់នៅភូមិ Cipurwasari ខេត្ត West Java មានទម្ងន់នៅសល់ត្រឹម ៨២.៥ គីឡូក្រាម។ គួរបញ្ជាក់ថា នៅពេលរូបគេមានទម្ងន់ធ្ងន់បំផុត Arya ធ្លាប់ស្លៀករុំក្រណាត់ ព្រោះតែមិនមានសម្លៀកបំពាក់ណាមួយអាចស្លៀករ៉ូវនឹងទំហំខ្លួនរបស់គេ នោះគឺខណៈពេល Arya កំពុងពេញស្រេកឃ្លានអាហារពេញៗមួយថ្ងៃ។ ប៉ុន្តែ ក្នុងរយៈប៉ុន្មានឆ្នាំចុងក្រោយនេះ Arya បានតាំងចិត្តតមអាហារយ៉ាងហ្មត់ចត់ ហើយព្យាយាមធ្វើលំហាត់ប្រាណយ៉ាងសកម្មភាព ជាហេតុធ្វើឲ្យរបៀបរស់នៅ និងបាត់បង់ទំងន់របស់ក្មេងប្រុសរូបនេះ គួរឲ្យចាប់អារម្មណ៍។
ក្មេងប្រុស Arya បានធ្វើឱ្យគ្រូពេទ្យមានការព្រួយបារម្ភជាខ្លាំង កាលពីប៉ុន្មានឆ្នាំមុននេះ គឺនៅពេលរូបភាពរបស់គេ ត្រូវបានគេបង្ហោះនៅលើគេហទំព័រព័ត៌មាន។ ព្រោះថា នៅពេលនោះ Arya ជាក្មេងប្រុសធាត់ខ្លាំងដែលមានសុខភាពខ្សោយ។ ក្នុងអំឡុងពេលថ្ងៃក្តៅនៅរដូវក្តៅ ជារឿយៗ Arya ត្រូវអង្គុយក្នុងធុងទឹកដើម្បីកាត់បន្ថយការក្តៅហត់។
ជាការពិតណាស់ ក្នុងកំឡុងពេលដែលលើសទម្ងន់ខ្លាំង Arya មិនអាចទៅសាលារៀនបានទេ ព្រោះរូបគេមិនមានកម្លាំង ក្នុងការធ្វើដំណើរទៅសាលារៀន ពោលគឺពិបាកខ្លាំងក្នុងការចលនាតែម្តង។ ប៉ុន្តែ ក្នុងរយៈពេលប៉ុន្មានឆ្នាំកន្លងមកនេះ Arya បានផ្លាស់ប្តូរយ៉ាងខ្លាំងដោយស្រកទំងន់គួរឱ្យចាប់អារម្មណ៍។
Arya បានចែករំលែកឲ្យដឹងថា “របបអាហារគួរតែត្រូវបានកាត់បន្ថយយឺតៗ និងថយចុះជាលំដាប់រាល់សប្តាហ៍មិនមែនភ្លាមៗទេ។ កុំធ្វើឱ្យរបបអាហារសម្រកទម្ងន់ក្លាយជាបញ្ហាប្រឈមពិបាក នោះជាអ្វីដែលខ្ញុំបានធ្វើ”។
ឥឡូវនេះ Arya អាចចូលរួមសកម្មភាពលំហាត់រាងកាយជាមួយមិត្តភក្តិរបស់គេ តាមរយៈការដើរ ៣ គីឡូម៉ែត្រក្នុងមួយថ្ងៃ លេងបាល់បោះ វាយសី និងកីឡាជាច្រើនទៀត ប្រហែល ២ ម៉ោងក្នុងមួយថ្ងៃ។ រូបគេក៏អាចដើរទៅសាលារៀនបានធម្មតាផងដែរ។
Arya និយាយថា៖ “ខ្ញុំអាចលេងកីឡាជាមួយមិត្តភក្តិរបស់ខ្ញុំ។ កាលពីមុន រឿងទាំងនេះមិនអាចទៅរួចទេ សម្រាប់ខ្ញុំ តែឥឡូវនេះ ខ្ញុំមានអារម្មណ៍ប្រសើរជាងមុនច្រើន ខ្ញុំមានអារម្មណ៍ខុសគ្នាខ្លាំងជាងមុន”៕ រក្សាសិទ្ធិដោយ៖ លឹម ហុង
