ភ្នំពេញ ៖ កញ្ញា ស៊ន សៀវម៉ី គឺជាកីឡាការិនីជម្រើសជាតិរបស់កម្ពុជា ផ្នែកកីឡាតេក្វាន់ដូ ដែលត្រូវបានគប្រសិទ្ធិនាមថាជា «វីរៈកីឡារិនី» ក្រោយពីកញ្ញាបានកែប្រែប្រវត្តិសាស្ត្រកីឡារបស់កម្ពុជា និងក៏ដូចលើកមុខមាត់ប្រទេសជាតិ តាមរយៈការដណ្តើមបានមេដាយមាសនៅក្នុងព្រឹត្តិការណ៍កីឡាអាស៊ីលើកទី១៧ នៅទីក្រុងអ៊ិនឆន ប្រទេសកូរ៉េខាងត្បូង កាលពីឆ្នាំ២០១៤ និងជាម្ចាស់មេដាយមាសកីឡាស៊ីហ្គេម ៣សម័យកាល ផងដែរ។
ជាមួយនឹងវីរៈភាពដ៏អស្ចារ្យនេះផងដែរ នោះកាលពីទី២ ខែកុម្ភៈ ឆ្នាំ២០២១ កញ្ញា ស៊ន សៀវម៉ី ត្រូវបានព្រះមហាក្សត្រ នៃព្រះរាជាណាចក្រកម្ពុជា បានចេញព្រះរាជក្រឹត្យមួយ ត្រាស់បង្គាប់តែងតាំង និងផ្តល់ឋានៈជូនងារជា «លោកជំទាវ» និងធ្វើជាជាជំនួយការសម្តេចវិបុលសេនាភក្តី សាយ ឈុំ ប្រធានព្រឹទ្ធសភា នីតិកាលទី៤ មានឋានៈស្មើអគ្គនាយក បន្ថែមលើមុខងារបច្ចុប្បន្ន។
យ៉ាងណាមិញ ងាករឿងជីវិតផ្ទាល់ខ្លួនវិញ គឺក្រោយពីបានរកឃើញបុរសម្នាក់ជាគូជីវិតរបស់ខ្លួនរួចមក លោកជំទាវ ស៊ន សៀវម៉ី ក៏បានភ្ជាប់ពាក្យជាមួយគ្នា កាលពីថ្ងៃទី២៨ ខែឧសភា ឆ្នាំ២០២០ កន្លងទៅ។ ដោយគូដណ្តឹងរបស់លោកជំទាវ គឺជាបុរសម្នាក់ដែលគេស្គាល់ថាជាអ្នកថតរូបអាជីពមានឈ្មោះ កែវ ដេវីត។
ដោយឡែក នៅមុននេះបន្តិច នាថ្ងៃទី២២ ខែកុម្ភៈ ឆ្នាំ២០២១ នេះ មហាជននៅក្នុងបណ្តាញសង្គម ពិតជាមានការភ្ញាក់ផ្អើលជាខ្លាំង ដែលនៅទីបំផុត លោកជំទាវ ស៊ន សៀវម៉ី និងគូដណ្តឹង ក្រោយពីបានភ្ជាប់ពាក្យ និងបានយល់ចិត្តគ្នាស៊ីជម្រៅ អស់រយៈពេលចូលជាងកន្លះឆ្នាំមកនេះ បានសម្រេចចិត្តដឹកដៃគ្នាចូលរោងជ័យក្លាយជាប្តីប្រពន្ធពេញច្បាប់ គឺត្រឹមសែនព្រែន ដោយគ្រាន់តែអញ្ជើញភ្ញៀវកិត្តិយសទាំងសងខាង មកចូលរួមជួយដឹងឮប៉ុណ្ណោះ។
តែទោះយ៉ាងណាក៏ដោយចុះ ក្រោយពីបានឃើញបែបនេះ អ្នកប្រើប្រាស់បណ្តាញសង្គមហ្វេសប៊ុកជាច្រើន បាននាំគ្នាសម្តែងនូវក្តីត្រេកអរ និងរំភើបរីករាយជាខ្លាំង និងក៏ដូចជូនពរអ្នកទាំងពីរស្រឡាញ់គ្នាដល់ចាស់កោងខ្នង៕ រក្សាសិទ្ធិដោយ៖ លឹម ហុង
