ភ្នំពេញ ៖ ប្រិយមិត្តបានទទួលជ្រាបរួចហើយ ទាក់ទងនឹងព័ត៌មានផ្ទុះឡើង ក្រោយក្រសួងពាណិជ្ជកម្មបានចេញលិខិតផ្ញើជូនក្រសួងសុខាភិបាល ដោយប្តឹងចោទប្រកាន់ផលិតផលអាហារបំប៉ន CooSea របស់ក្រុមហ៊ុនសម្រស់ធម្មជាតិ ដែលកន្លងមក បានផ្សព្វផ្សាយមានចរិតភូតកុហកបំភាន់ បោកបញ្ឆោតដល់សាធារណជន អំពីគុណភាពផលិតផល ថាព្យាបាលជាប្រភេទជំងឺរាប់សិបមុខ។
តែទោះយ៉ាងណា ក្រោយព័ត៌មាននេះបានសាយភាយផ្ទុះឡើងដ៏មិននឹកស្មានបែបនេះ ហេតុនេះ ដើម្បីកុំឲ្យមហាជន ជាពិសេសអ្នកគាំទ្រ មានការយល់ច្រឡំ នៅពេលនេះ ក្រុមហ៊ុនសម្រស់ធម្មជាតិ ដែលមានមេធាវី ២ រូប ជាតំណាង បានចេញសេចក្តីជូនដំណឹងដោយអះអាងថា មានសារព័ត៌មានមួយចំនួន បានឆ្លៀតឱកាសផ្សព្វផ្សាយព័ត៌មានបំភ្លៃក្នុងគោលបំណងកេង យកផលប្រយោជន៍ថា ផលិតផលបំប៉នសុខភាព COOSEA Premium Spirulina របស់ក្រុមហ៊ុន សម្រស់ធម្មជាតិ ឯ.ក បានប្រើប្រាស់ពាក្យភូតកុហកបំភាន់ បោកបញ្ឆោតដល់សាធារណជន អំពីគុណភាពផលិតផល ហើយក៏ត្រូវក្រសួងពាណិជ្ជកម្មប្តឹង។
ក្នុងនោះផងដែរ យោងតាមលិខិតជូនដំណឹងនេះ បានបញ្ជាក់ឲ្យដឹងថា លិខិតលេខ ០០៧២ ព.ណ.អ.កបប ដែលចេញដោយក្រសួងពាណិជ្ជកម្ម កាលពីថ្ងៃទី១៣ ខែមករា ឆ្នាំ២០២១ នោះ តាមពិតគឺជាលិខិតដែលមានក្របខណ្ឌគតិយុត្តិ ជាលិខិតរដ្ឋបាលសម្រាប់ស្នើសុំសហការចំពោះការត្រួតពិនិត្យគុណភាព និងឯកសារផលិតផលរវាងក្រសួងសុខាភិបាល និងក្រសួងពាណិជ្ជកម្ម តែប៉ុណ្ណោះ។ ក្រុមហ៊ុនសម្រស់ធម្មជាតិ ឯ.ក ក៏បានទៅបំភ្លឺ និងសហការការផ្តល់ព័ត៌មាន ក៏ដូចជាផ្តល់ឯកសារពាក់ព័ន្ទនានា ជូនក្រសួងពាណិជ្ជកម្ម និងក្រសួងសុខាភិបាលតាំងពីខែមករា ឆ្នាំ២០២១ រួចរាល់ហើយ។
ហេតុនេះ សូមសាធារណជន និងក៏ដូចបណ្តាសារព័ត៌មានទាំងអស់ មេត្តាជ្រាប៕ រក្សាសិទ្ធិដោយ៖ លឹម ហុង
