យោងតាមសារព័ត៌មានឥណ្ឌាមួយ បានរាយការណ៍ឲ្យដឹងថា បុរសម្នាក់មកពីទីក្រុង Ranchi ក្នុងរដ្ឋ Jharkhand បានរត់ចោលប្រពន្ធ និងកូន ទៅសម្ងំសុខជាមួយមិត្តស្រីថ្មី ដោយគ្មានគិតខ្វល់អ្វីសូម្បីតែបន្តិចឡើយ។
បុរសរូបនោះ ដែលមានឈ្មោះថា Rajesh Mahato មកពី Kokar Tiril នៅក្នុងទីក្រុង Ranchi បានទៅរស់នៅជាមួយមិត្តស្រីរបស់គាត់ បន្ទាប់ពីមានទំនាក់ទំនងស្នេហាជាមួយនាង បើទោះជាបានដឹងថាខ្លួនមានប្រពន្ធកូនទៅហើយ។ ពិតមែនហើយ យើងក៏មិនអាចស្តីបន្ទោសមិត្តស្រីនោះបានទេ ព្រោះថា នាងក៏មិនបានដឹងថា បុរសរូបនេះមានប្រពន្ធនោះដែរ ព្រោះ Rajesh បានប្រាប់កុហក់នាងថា ខ្លួនគេនៅលីវប៉ុណ្ណោះ។
ក្រោយពីអ្នកទាំងពីរ បានពង្រាត់គ្នា ប្រពន្ធរបស់ Rajesh បានប្តឹងទៅប៉ូលីស ស្របពេលដែលឪពុកម្តាយមិត្តស្រីរបស់គាត់ ក៏បានដាក់ពាក្យបណ្តឹងទៅប៉ូលីសផងដែរ ដោយចោទថា លោក Rajesh បានចាប់ជំរិតកូនស្រីរបស់ពួកគេ។
ប៉ូលីសឥណ្ឌាបន្ទាប់មក បានធ្វើការស៊ើបអង្កេតតាមដាន Rajesh ហើយបានឃុំខ្លួនគាត់។ បុរសរូបនេះ បានឆ្លើយសារភាពប្រាប់ប៉ូលីសថា រូបគេរៀបការនឹងមិត្តស្រីរួចហើយ នៅពេលពួកគេបានពង្រត់គ្នា។ រឿងនេះគឺជាបញ្ហាប្រឈមមុខដ៏ធំរវាងមិត្តស្រី និងប្រពន្ធរបស់ Rajesh ដែលជម្រុញឲ្យប៉ូលីសត្រូវធ្វើការ «ដោះស្រាយ» សម្រាប់ភាគីទាំងអស់ដែលជាប់ពាក់ព័ន្ធ។
ដំណោះស្រាយរបស់ប៉ូលីស បានចេញលទ្ធផលឲ្យដឹងថា៖ ទី១- គឺ Rajesh ត្រូវចំណាយពេល ៣ ថ្ងៃ នៅជាមួយប្រពន្ធដើម ក្នុងរយៈពេល១សប្តាហ៍, ទី២- គាត់ក៏នឹងត្រូវចំណាយពេល ៣ ថ្ងៃ ដូចគ្នា នៅជាមួយមិត្តស្រី នៅក្នុងរយៈពេល១សប្តាហ៍ និងទី៣- គាត់ត្រូវផ្តល់ពេលមួយថ្ងៃ ដើម្បីសំរាក។
ប៉ូលីសក្នុងតំបន់បាននិយាយថា ការរៀបចំនេះគឺត្រឹមត្រូវ ដោយពិចារណាថា លោក Rajesh បានរៀបការជាមួយពួកគេទាំងពីរ។ គ្រប់ភាគីពាក់ព័ន្ធទាំងអស់បានចុះកិច្ចសន្យាជាផ្លូវការ ដើម្បីគាំទ្រការរៀបចំនេះ និងរក្សាច្បាប់ចម្លងមួយច្បាប់។
តែទោះយ៉ាងណា គ្រាន់តែក្នុងរយៈពេលពីរបីថ្ងៃនៃកិច្ចព្រមព្រៀងត្រូវបានចុះហត្ថលេខា ស្រាប់តែមិត្តស្រីនោះបានចោទប្រកាន់លោក Rajesh ពីបទរំលោភផ្លូវភេទ លើលេសនៃអាពាហ៍ពិពាហ៍ ហើយបានដាក់ពាក្យបណ្តឹងទៅប៉ូលីសផ្សេងទៀត។ ហើយករណីនេះ ក៏ត្រូវតុលាការក្នុងតំបន់ ក៏បានចេញដីកាចាប់ខ្លួន Rajesh ផងដែរ។
បច្ចុប្បន្ន បុរសរូបនេះកំពុងរត់គេចពីប៉ូលីស ហើយបើយោងតាមរបាយការណ៍ក្នុងស្រុកបានឲ្យដឹងថា ប្រពន្ធដើមរបស់ Rajesh ត្រូវបានគេជឿថា បានជួយគាត់អោយរត់គេចពីប៉ូលីស៕ រក្សាសិទ្ធិដោយ៖ ប៉ូលីស
