កាលពីពេលថ្មីៗនេះ មហាជន ជាពិសេសអ្នកប្រើប្រាស់បណ្តាញសង្គម នៅក្នុងប្រទេសថៃ ពិតជាមានការភ្ញាក់ផ្អើលយ៉ាងខ្លាំង ទៅនឹងវីដេអូមួយដែលត្រូវបានដឹងថា ស្ត្រីជាម្តាយម្នាក់ បាននាំកូនប្រសារស្រីជាមួយនឹងសំបុត្រអាពាហ៍ពិពាហ៍ស្របច្បាប់ ចូលទៅអុកឡុកពិធីមង្គលការកូនប្រុសរបស់ខ្លួន ដែលបានលួចទៅរៀបការប្រពន្ធថ្មីស្ងាត់ៗ ទាំងមិនទាន់លែងលះប្រពន្ធដើមដាច់ស្រេចផងនោះ។
អ្វីដែលគួរឲ្យចាប់អារម្មណ៍ជាខ្លាំងនោះ គឺក្នុងខណៈពេលនោះផងដែរ ស្ត្រីជាម្តាយត្រូវបានឃើញចូលទៅដល់ក្នុងផ្ទះខាងកូនក្រមុំ ហើយបានឈរចង្អុលមុខ ជេរធ្ងន់ៗ និងព្រមទាំងរុញក្បាលកូនប្រុសរបស់ខ្លួនឡើងផ្ងាកទៅក្រោយ និងទះក្បាល១ដៃយ៉ាងធ្ងន់ មុនដើរចេញ ទាំងនៅក្នុងកម្មពិធីព្រះសង្ឃកំពុងតែចម្រើនព្រះបរិត្តឱ្យពរជ័យដល់កូនកំលោះកូនក្រមុំ។
ក្រោយរឿងរ៉ាវនេះបានផ្ទុះឡើង ព្រះសង្ឃដែលមិនអាចធ្វើអ្វីបានក្រៅតែពីធ្វើតាមតួនាទី ជាមួយនឹងការធ្វើភ្នែកម៉ក់ៗ គួរឲ្យឈឺចាប់ជំនួសម្តាយនិងកូនប្រសារស្រី បានមានសង្ឃដីការយ៉ាងដូច្នេះថា នេះគឺជាទង្វើរដ៏ត្រឹមត្រូវណាស់ ដែលស្ត្រីជាម្តាយចូលទៅប្រដៅកូនប្រុសខ្លួនដែលបានធ្វើខុសធ្ងន់បែបនេះ ព្រោះថា ប្រសិនជារូបអាត្មាជាម្តាយវិញ ក៏ទប់ចិត្ត ទប់អារម្មណ៍ពុំបានដែរ ចំពោះទង្វើរដែលកូនប្រុសមកធ្វើរឿងមិនគួរគាប្បីបែបនេះដាក់ វាពិតជាមានការឈឺចាប់ខ្លាំងណាស់។
ក្រោយពីបានឃើញព្រះសង្ឃខាងលើ បានមានសង្ឃដីការដ៏ប្រពៃបែបនេះ ឃើញថាមានអ្នកប្រើប្រាស់បណ្តាញសង្គមជាច្រើន បានសម្តែងនូវការគាំទ្រយ៉ាងខ្លាំង ដោយក្នុងនោះ គេបានលើកឡើងថា «ស្ត្រីជាម្តាយធ្វើបែបនេះគឺល្អខ្លាំងណាស់ ម្តាយគ្រប់រូបគួរយកគំរូតាមគាត់…»៕ រក្សាសិទ្ធិដោយ៖ លឹម ហុង