ខេត្តបន្ទាយមានជ័យ ៖ សេចក្តីរាយការណ៍ពីខេត្តបន្ទាយមានជ័យ បានបញ្ជាក់ថា ទីតាំងចំនួន៤កន្លែងសម្រាប់ចាក់វ៉ាក់សាំងបង្ការកូវីដ១៩នេះ ដើម្បីចាក់វ៉ាក់សាំងជូនក្រុមគោលដៅដំបូង គឺមន្ត្រីសុខាភិបាលកម្លាំងស្នងការដ្ឋាននគរបាលខេត្ត ដែលចាប់ផ្តើមចាក់នៅព្រឹកថ្ងៃទី២៤ ខែកុម្ភៈ ឆ្នាំ២០២១។
ថ្លែងប្រាប់សារព័ត៌មានក្នុងខេត្តនៅថ្ងៃនេះ, លោក ឡេ ច័ន្ទសង្វាត ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តបន្ទាយមានជ័យ បានឲ្យដឹងថា ៖ ទីតាំងទាំង៤កន្លែងដែលទទួលការចាក់វ៉ាក់សាំង បង្កាកូវីដ១៩មិនគិតកម្រៃរួមមាន ៖ ទី១.មន្ទីពេទ្យមិត្តភាពកម្ពុជា.ជប៉ុនមង្គលបូរី ដែលជាមន្ទីរពេទ្យខេត្តបន្ទាយមានជ័យ ទី២.មន្ទីរពេទ្យបង្អែកស្រុកព្រះនេត្រព្រះ។ ទី៣.មន្ទីរពេទ្យបង្អែកស្រុកថ្មពួក និងទី៤.មន្ទីរពេទ្យបង្អែកក្រុងប៉ោយប៉ែត ដែលគោលដៅដំបូងចាក់ជំហ៊ានដំបូង គឺលើមន្ត្រីសុខាភិបាល និងកម្លាំងនគរបាលនៃស្នងការដ្ឋាននគរបាលខេត្តបន្ទាយមានជ័យ។
លោកបានបញ្ជាក់ទៀតថា ៖ ដោយព្រឹកមិញដែលចូលរួមចាក់វ៉ាក់សាំង ដល់អភិបាលរងខេត្តនិងមន្ត្រីរដ្ឋបាលសាលាខេត្ត និងស្រុក/ក្រុងដែលធ្វើការងារចេញចូល ក្នុងមណ្ឌលចត្តាឡីស័កដោយមាន ស្នើសុំផ្ទាល់ពីលោក អ៊ុំ រាត្រី អភិបាលខេត្តបន្ទាយមានជ័យ បានទៅឯកឧត្តមបណ្ឌិតសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ទើបមន្ត្រីធ្វើការត្រួតពិនិត្យសុខភាពហើយចាក់វ៉ាក់សាំង ជូនរួមជាមួយមន្ត្រីសុខាភិបាលនិងកម្លាំងនគរបាល នៃស្នងការដ្ឋាននគរបាលខេត្ត។
សូមបញ្ជាក់ថា បើយោងតាមក្រសួង ជំហ៊ានដំបូងដែលចាក់វ៉ាក់សាំងលើក្រុម គោលដៅមន្ត្រីសុខាភិបាល ហើយត្រូវចាក់កម្លាំងនគរបាលនៃស្នងការដ្ឋាននគរបាលខេត្ត ក្នុង១ថ្ងៃអាចចាក់វ៉ាក់សាំងបង្ការជំងឺកូវីដ១៩ ក្នុង១កន្លែងអាចបាន១០០នាក់ ហើយក្នុង១នាក់ចាក់២ដូសរយៈពេល២ដង និងលើកទី២តាមការណាត់របស់ក្រុមគ្រូពេទ្យជំនាញ ណាត់មកចាក់ជំហ៊ានដំបូងប៉ាន់ប្រមាណជាង៣.០០០នាក់ សម្រាប់មន្ត្រីក្រុមការងារគោលដៅសិន និងអនុវត្តតាមការណែនាំរបស់ក្រសួងសុខាភិបាលបន្តទៀត៕ រក្សាសិទ្ធិដោយ៖CEN
