កាលពីពេលថ្មីៗនេះ តាមរយៈបទសម្ភាសន៍ជាមួយលោក អ៊ឹម ជីវ៉ា តារាសម្តែងស្រីជើងចាស់ អ្នកស្រី ញឹម សុខា បានរៀបរាប់ទាំងទឹកភ្នែកថា ចាប់តាំងពីពេលដែលគាត់បានក្លាយជាម្តាយធម៌របស់ស្រីអូន សម្រស់ធម្មជាតិមក ពេលនេះ គាត់ដាច់បាយហើយ ព្រោះតែពេលនេះ លែងមានគេហៅទៅថតសម្តែងរឿងដូចមុន និងសូម្បីរើងអើងមិនចង់រាប់រកទៀត។
ក្នុងនោះ តារាស្រីជើងចាស់រូបនេះ បាននិយាយថា គាត់សម្រេចចិត្តចេញមកនិយាយរឿងនេះ គឺដើម្បីចង់សំណូមកុំឲ្យមហាជន មានការយល់ច្រឡំមកលើរូបគាត់ទៀត ដោយនាំគ្នាគិតថា តាំងពីគាត់ក្លាយជាម្តាយធម៌របស់សេដ្ឋីនីរួចមក គឺគាត់មានផ្ទុះ មានឡាន និងមានប្រាក់ខែរាប់ពាន់ដុល្លារ ប៉ុន្តែ ធាតុពិតនោះ គឺមិនដូចពាក្យគេនិយាយឡើង។
ទាក់ទងនឹងការលើកឡើងបែបនេះ អ្នកស្រី សុខា ក៏សូមបញ្ជាក់ឲ្យដឹងថា អ្នកស្រីគ្រាន់តែបានទទួលលុយឧបត្ថម្ភដំបូង ពីកូនធម៌អ្នកនាងស្រីអូន ២ លានរៀល និងកូនជួយបង់ថ្លៃបន្ទប់ជួល១ខែ ៨០ ដុល្លារ បាន២ខែ ប៉ុណ្ណោះ ក្រៅពីនេះអ្នកស្រីពុំទទួលបានអ្វីបន្ថែមទៀតពីកូនស្រីធម៌ទេ។ តែយ៉ាងណា អ្នកស្រីក៏សូមថ្លែងអំណរគុណយ៉ាងខ្លាំង ចំពោះទឹកចិត្តដ៏ធំធេងរបស់កូនស្រីធម៌។ ហើយគាត់ចេញមកបកស្រាយនេះ គឺគ្មានបំណងអាក្រក់អ្វីចំពោះអ្នកនាងស្រីអូននោះទេ ពោលគឺគាត់គ្រាន់តែចង់ឲ្យមហាជន ជាពិសេសអ្នកក្នុងចង្កោមសិល្បៈបានជ្រាប ឈប់យល់ច្រឡំ និងឈប់រើសអើងគាត់ ដើម្បីគាត់បានថតរឿងដូចមុនវិញផង។
តែយ៉ាងណា ក្រោយតារាស្រីជើងចាស់ បានចេញមុខបកស្រាយបែបនេះ ក៏បានធ្វើឲ្យមហាជនមួយចំនួនធំ ហាក់មិនពេញចិត្តឡើយ ដោយនាំគ្នារិះគន់នូវពាក្យពេចន៍មិនល្អៗជាច្រើន មកលើរូបគាត់ដូចជាថាជាក្រពើ ជាដើម។ ក្នុងនោះផងដែរ លោក តាន់ គឹមសួរ ក៏បានធ្វើការព្រលះឲ្យយ៉ាងធ្ងន់ៗបែបនេះថា៖ «ស៊ុន្ទរី នួន ម៉េចបានជាធ្វើបែបនេះដាក់អ្នកម្តាយធម៌អ៉ីចឹង? ហ៊ានចំណាយលុយរាប់សិបម៉ឺនដុល្លារជួយដល់សង្គម ហេតុអ្វីទុកឲ្យម្តាយខ្លួនឯងអត់បាយដល់ថ្នាក់នេះ? សែនហួសចិត្ត ហួសចិត្តដែលប្អូនជួយប៉ះចំក្រពើ ឲ្យរាង ថ្ងៃក្រោយមុនជួយមនុស្ស ត្រូវចេះមើលមុខ មើលក្រោយផង បិសាចចេញកន្ទុយបណ្តើរៗហើយ។»៕ រក្សាសិទ្ធិដោយ៖ លឹម ហុង
