Monday, May 23, 2022

ដោយសារ​កូ​វីដ​១៩ ក្រសួងមហាផ្ទៃ ណែនាំ​៣​ចំណុច ដល់​អភិបាល​រាជធានី​ខេត្ត ដើម្បី​កំណត់​ទិសដៅ និង​ផែនការ​សកម្មភាព ក្រោយ​ផ្អាក​ការរៀបចំ​សន្និបាត​ប្រចាំឆ្នាំ​

​ភ្នំពេញ ៖ ក្រសួងមហាផ្ទៃ នៅ​ថ្ងៃទី​២៥ ខែកុម្ភៈ ឆ្នាំ​២០២១ បានចេញ​លិខិត​មួយ​ដោយបាន​ជម្រាប​មក​អភិបាល រាជធានី ខេត្ត ពី​ការផ្អាក​ការរៀបចំ​សន្និបាត​ត្រួតពិនិត្យ​លទ្ធផល​ការងារ​ឆ្នាំ​២០២០ និង​លើក​ទិសដៅ​ការងារ​ឆ្នាំ​២០២១ របស់​ក្រសួងមហាផ្ទៃ និង​ការអនុវត្ត​កិច្ចការ​បន្ត​របស់​រដ្ឋ​បាល​រាជធានី ខេត្ត​។

​ក្រសួងមហាផ្ទៃ ក៏បាន​ចេញ​ណែនាំ​៣​ចំណុច ទៅកាន់​អភិបាល​រាជធានី​ខេត្ត ដើម្បី​កំណត់​ទិសដៅ និង​ផែនការ​សកម្មភាព​រប​ស់រាជ​ធានី​ខេត្ត​នីមួយៗ​។​

​តាម​លិខិត​របស់​ក្រសួងមហាផ្ទៃ ផ្ញើ​ទៅ​អភិបាល​រាជធានី​ខេត្ត បាន​ឲ្យ​ដឹងថា កន្លងមក ក្រសួង​រៀបចំ​សន្និបាត ត្រួតពិនិត្យ​លទ្ធផល​ការងារ​ឆ្នាំ​២០២០ និង​លើក​ទិសដៅ​ការងារ​ឆ្នាំ​២០២១ រយៈពេល​ពីរ​ថ្ងៃ ចាប់ពី​ថ្ងៃទី​២៤ ដល់​ថ្ងៃទី​២៥ ខែកុម្ភៈ ឆ្នាំ​២០២១ ប៉ុន្តែ​ដោយសារ​ស្ថានភាព​នៃ​ការឆ្លង រីក​រាលដាល​ជំងឺ​កូ​វីដ​១៩ ក្នុង​ព្រឹត្តិការណ៍​សហគមន៍ ២០​កុម្ភៈ ធ្វើ​ឲ្យ​សន្និបាត​នេះ​មិនអាច​ប្រព្រឹត្តទៅបាន​។​

​ដើម្បី​កំណត់​ទិសដៅ និង​ផែនការ​សកម្មភាព​រប​ស់រាជ​ធានី​ខេត្ត​នីមួយៗ ក្រសួងមហាផ្ទៃ បាន​ណែនាំ​ដល់​អភិបាល​រាជធានី​ខេត្ត ដូចខាងក្រោម​៖

១៖ ក្រសួងមហាផ្ទៃ នឹង​ផ្ញើ​របាយការណ៍ ស្តីពី​លទ្ធផល​ការងារ​ឆ្នាំ​២០២០ និង​លើក​ទិសដៅ​ការងារ​ឆ្នាំ​២០២១ របស់​ក្រសួង សុន្ទរកថា​បើក​ស​និ្ន​បាត និង​របាយការណ៍​ស្តីពី​លទ្ធផល​ការងារ​ប្រឡងប្រណាំង អនុវត្ត​គោលនយោបាយ ភូមិ​ឃុំ​មាន​សុវត្ថិភាព ឆ្នាំ​២០២០ ដើម្បី​ជា​មូលដ្ឋាន​សម្រាប់​រដ្ឋបាល​រាជធានី​ខេត្ត នីមួយៗ​។​

២៖ ប្រគល់​សិទ្ធិ​ជូន​អភិបាល និង​ប្រធាន​គណៈបញ្ជាការ​ឯកភាព​រដ្ឋបាល​រាជធានី​ខេត្ត ធ្វើការ​ប្រគល់​រង្វាន់​ជ័យលាភី ប្រឡងប្រណាំង​អនុវត្ត​គោលនយោបាយ​ភូមិ​ឃុំ​មាន​សុវត្ថិភាព ឆ្នាំ​២០២០ ជូន​ដល់​រដ្ឋបាល​ឃុំ​សង្កាត់ ក្នុង​រាជធានី​ខេត្ត​នីមួយៗ​។​

៣៖ ចំពោះ​ការអនុវត្ត​ចលនា​ប្រឡងប្រណាំង​អនុវត្ត​ភូមិ​ឃុំ​សង្កាត់​មាន​សុវត្ថិភាព របស់​រាជរដ្ឋាភិបាល ពាក់ព័ន្ធ​នឹង​សមត្ថកិច្ច​ក្រសួងមហាផ្ទៃ គណៈបញ្ជាការ​ឯកភាព​រដ្ឋបាល​រាជធានី ខេត្ត ត្រូវ​បន្ត​ជំរុញ​អនុវត្ត​គោលការណ៍​ណែនាំ ដែលមាន​ស្រាប់​រហូតដល់​ក្រសួងមហាផ្ទៃ មានការ​ណែនាំ​ជាថ្មី​៕ រក្សា​សិទ្ធិ​ដោយ​៖​បញ្ញា​ស័ក្តិ​