នេះជាហេតុការណ៍ដ៏ចម្លែកមួយ ដែលបានកើតឡើងនៅក្នុងរដ្ឋ Telangana ប្រទេសឥណ្ឌា ខណៈប៉ូលីសបានធ្វើការឃាត់ខ្លួនមាន់គកមួយក្បាល បន្ទាប់ពីវាបានសម្លាប់ម្ចាស់របស់វា នៅនឹងសង្វៀនជល់មួយលួចលាក់ ស្ថិតនៅក្នុងប្រាសាទ Yellamma ទីក្រុង Jagtial កាលពីថ្ងៃទី២២ ខែកុម្ភៈ ឆ្នាំ២០២១ កន្លងទៅថ្មីៗនេះ។ម្ចាស់រងគ្រោះមានឈ្មោះថា Thanugulla Satish អាយុ ៤៥ ឆ្នាំ បាននាំមាន់ជល់របស់ខ្លួន ទៅជល់នៅសង្វៀនលួចជល់ខុសច្បាប់ខាងលើ។ ហើយការជល់នោះផងដែរ គឺពុំមែនជល់តាមខ្នាយកំណើតទេ គឺជាលក្ខណៈត «ផ្លែដែក» ដើម្បីប្រយុទ្ធគ្នាឆាប់ឈ្នះចាញ់។
ប៉ុន្តែ ចៃដន្យអាក្រក់ មាន់គកនោះ ស្រាប់បានចាក់ត្រូវចំក្ររលៀនរបស់ Satish តែម្តង។ ដោយសារមានឈាមហូរច្រើនពេក ភ្លាមៗនោះ គេក៏បានបញ្ជូនគាត់ទៅមន្ទីរពេទ្យ ដើម្បីសង្គ្រោះ ប៉ុន្តែត្រូវបានប្រកាសថាស្លាប់នៅពេលមកដល់មន្ទីរពេទ្យ។បន្ទាប់ហេតុការណ៍នេះកើតឡើង ប៉ូលីសបានយកមាន់ជល់នោះទៅប៉ុស្តិ៍ប៉ូលិស Gollapalli និងឲ្យចំណីវាស៊ី។ ប៉ូលីសបានបញ្ជាក់យ៉ាងច្បាស់ថា សត្វមាន់ជល់នេះ មិនត្រូវបានចាប់ខ្លួន ឬឃុំខ្លួនទេ។
លោក Jeevan បានប្រាប់អ្នកយកព័ត៌មានរបស់កាសែត IANS ថា “យើងនឹងនាំមាន់ជល់នេះ ឡើងតុលាការ ហើយធ្វើតាមការណែនាំរបស់ចៅក្រមអំពីអ្វីដែលត្រូវធ្វើបន្ទាប់”។ចាប់តាំងពីកើតមានហេតុការណ៍អកុសលនេះមក ការជល់មាន់ត្រូវបានហាមឃាត់នៅក្នុងរដ្ឋ Telangana ខណៈក្រុមមនុស្សញៀនជល់មាន់ តែងតែបាននាំគ្នាលួចលាក់ជល់មាន់ នៅក្បែរទីសក្ការៈបូជា Yellamma ក្នុងភូមិ។
សូមបញ្ជាក់ឲ្យដឹងផងដែរថា កាលពីខែតុលា ឆ្នាំ២០១៧ សត្វសេកចំនួន ១៣ ក្បាល ក៏ត្រូវបាននាំខ្លួនទៅកាន់តុលាការដេលី ប្រទេសឥណ្ឌាផងដែរ បន្ទាប់ពីជនជាតិអ៊ូសបេគីស្ថានម្នាក់ឈ្មោះ Anvarjon Rakhinematjonov ត្រូវបានទីភ្នាក់ងាររដ្ឋាភិបាល CISF ឃុំខ្លួននៅអាកាសយានដ្ឋានអន្តរជាតិ Indira Gandhi ពីបទប៉ុនប៉ងរត់ពន្ធសត្វសេកទាំងនេះចេញពីប្រទេស។
ពួកវាត្រូវបាននាំខ្លួនទៅកាន់តុលាការដើម្បីប្រគល់ទៅឲ្យអ្នកការពារសត្វព្រៃ៕ រក្សាសិទ្ធិដោយ៖ លឹម ហុង
