សូមរម្លឹកឡើងវិញបន្តិចថា កាលពីវេលាម៉ោងប្រមាណ ១១ ថ្ងៃទី១ ខែមិនា ឆ្នាំ២០២១ មានករណីចូលប្លន់ប្រដាប់អាវុធដ៏រន្ធត់ ទៅលើភូមិគ្រឹះលេខ២០ ក្នុងបុរីអង្គរភ្នំពេញ ស្ថិតក្នុងភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ ដោយឧក្រិដ្ឋជនមានគ្នីគ្នាចំនួន៤នាក់ បានរៀបផែនការ ដើម្បីជម្រិតយកប្រាក់ចំនួន១លានដុល្លារជាមុន ទើបប្លន់សម្លាប់ម្ចាស់ផ្ទះទាំងប្តីប្រពន្ធ និងកូនឈ្នួល២នាក់ ជាក្រោយ។
តែយ៉ាងណា ផែនការដ៏ហំហួនរបស់ពួកគេ ត្រូវបរាជ័យរលាយដូចទឹក និងថែមទាំងក្លាយជាខ្លោចទាំង៤នាក់តែម្តង ក្រោយពួកគេបានប្រឈមមុខនឹងកម្លាំងរាជអាវុធហត្ថរាជធានីភ្នំពេញ ដែលត្រៀមចាំរង់ចាំនៅក្នុងផ្ទះជនរងគ្រោះរួចជាស្រេច ដែលជាហេតុធ្វើឲ្យពួកគេទាល់ច្រក បើកការបាញ់ស្រោចទៅសមត្ថកិច្ច ហើយកម្លាំងអាវុធហត្ថ ក៏ប្រើសិទ្ធិបាញ់តបតវិញ បណ្តាលឲ្យពួកគេស្លាប់រដូករណែលទាំង៤នាក់នៅនឹងកន្លែងតែម្តង។
យ៉ាងណាមិញ ក្នុងចំណោមឧក្រិដ្ឋជនជាចោរប្លន់ទាំង៤នាក់ គឺមានម្នាក់ឈ្មោះ អុឹម សុវណ្ណារិទ្ធ គឺថាធ្វើឲ្យមហាជនមានការចាប់អារម្មណ៍យ៉ាងខ្លាំង ព្រោះថារូបគេគឺជាមេខ្លោង និងកាន់ប័ណ្ណសម្គាល់ជា មន្ត្រីយោធា មានឋានន្តរស័កថ្នាក់វរសេនីយ៍ត្រី ប៉ុន្តែ ទោះ យ៉ាងណា បញ្ជាការដ្ឋានអង្គរក្ស បានធ្វើការបដិសេធ ដោយអះអាងថា ប័ណ្ណដែលជនល្មើសរូបនេះប្រើប្រាស់ គឺជា ប័ណ្ណក្លែងក្លាយ និងក៏មិនមានឈ្មោះនៅក្នុងបញ្ជាការដ្ឋានអង្គរក្សឡើយ។
ទាក់ទងនឹងទង្វើដ៏សាហាវមិននឹកស្មានរបស់បុគ្គលខាងលើនេះផងដែរ បើងាកមកស្តាប់លោក លោក វិល្លាម បញ្ចេញឲ្យដឹង គឺថាបះសក់តែម្តង ព្រោះឧក្រិដ្ឋជន អុឹម សុវណ្ណរិទ្ធ នេះ ធ្លាប់សុំធ្វើជាតៃកុងឡានច្រើនលើក ប៉ុន្តែ សំណាងល្អ ដែលលោកបដិសេធ កុំអីមិនដឹងយ៉ាងណាទេ។
ក្នុងនោះ លោក វិល្លាម បានរៀបរាប់បញ្ជាក់ ដោយភ្ជាប់សារឆាតឲ្យឃើញជាក់ស្តែងឡើងញាក់សាច់ថា៖ «ចេះតែឆ្ងល់ថា មេ ឧក្រិដ្ឋជនចា ប់ជំរិត ដូចប្រហែលៗមុខ ការពិតទាល់ឆែកមើលបានដឹងថា ធ្លាប់ឆាតមកសុំបើកឡានអោយខ្ញុំ ៣-៤ ដង តែត្រូវខ្ញុំបដិសេដ ។ កុំអីក្លាយជាជ្រូកខ្វៃផស់វាបាត់ ។ បានន័យថាដើរសុំការងារគេគ្រប់គ្នា ដើម្បីសិក្សាថាមួយណាអាចធ្វើស៊ីបាន?»៕ រក្សាសិទ្ធិដោយ៖ លឹម ហុង
