ភ្នំពេញ៖ បើយោងតាមអ្នកនាំពាក្យក្រសួងសាធារណការ បានឱ្យដឹងថា គិតមកដល់ចុងខែកុម្ភៈ ឆ្នាំ២០២១នេះ ការលក់ផ្លាកលេខពិសេសផ្ទាល់ខ្លួនសម្រាប់រថយន្ត (ផ្លាកលេខកម្ពុជា) បានរយៈពេលជាង១ឆ្នាំ និងការលក់ផ្លាកលេខពិសេស លក្ខណៈគ្រួសារ (ផ្លាកលេខរាជធានីខេត្ត) បានរយៈពេលប្រមាណ០៦ឆ្នាំ រកចំណូលសរុបបានប្រមាណ ២១០,៥០០,០០០,០០០រៀល ដែលស្មើនឹង ៥២,៦០០,០០០ដុល្លារ។
អ្នកនាំពាក្យក្រសួងសាធារណការ លោក ហ៊ាង សុទ្ធាយុត្តិ បានបញ្ជាក់ថា ការលក់ផ្លាកលេខពិសេសផ្ទាល់ខ្លួនសម្រាប់រថយន្ត គិតមកដល់ពេលបច្ចុប្បន្ននេះ លក់បានចំនួនជាង ៤,៨០០ ផ្លាកលេខ រកចំណូលបានជាង៣៩ពាន់លានរៀល ដែលស្មើនឹងជិត១០លានដុល្លារ ហើយសម្រាប់ផ្លាកលេខពិសេសគ្រួសារ គិតចាប់ពីចុងឆ្នាំ២០១៦ មកដល់ពេលនេះ បានលក់អស់ជាង ១៦៥,០០០ផ្លាកលេខ គិតជាទឹកប្រាប់បានប្រមាណជាង ១៧១ពាន់លានរៀល ដែលស្មើនឹង ៤២,៧៨០,០០០ដុល្លារ ហើយសរុបជាថវិកាទាំងផ្លាកលេខពិសេសផ្ទាល់ខ្លួន និងផ្លាកលេខគ្រួសារ ក្រសួងរកចំណូលបានប្រមាណ ២១០,៥០០,០០០,០០០រៀល ដែលស្មើនឹង ៥២,៦០០,០០០ ដុល្លារ។
ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ចូន បានថ្លែងនៅក្នុងកិច្ចប្រជុំពិនិត្យលើវឌ្ឍនភាពការងារ និងពិភាក្សាលើតម្លៃលេខចុះបញ្ជីពិសេសផ្ទាល់ខ្លួន ដោយមានការចូលរួមពីសមាជិកសមាជិកាគណៈកម្មកាអន្តរក្រសួងគ្រប់គ្រងការលក់លេខចុះបញ្ជីរថយន្ត និងមន្ត្រីជំនាញអង្គភាពពាក់ព័ន្ធ បានឱ្យដឹងថា ការលក់លេខពិសេសផ្ទាល់ខ្លួនទៅកាន់ បណ្ដាក្រុមហ៊ុនឯកជនធំៗនានា ដែលមានបំណងចង់ប្រើប្រាស់លេខពិសេសផ្ទាល់ខ្លួន គឺដើម្បីកៀងគរចំណូលថវិកាជាតិឱ្យបានច្រើនថែមទៀត។
បើតាមអ្នកនាំពាក្យក្រសួងសាធារណៈការ សម្រាប់ផ្លាកលេខពិសេសផ្ទាល់ខ្លួន (ផ្លាកលេខកម្ពុជា)នេះ បានធ្វើការសិក្សាអស់រយៈពេលប្រមាណជិត២ឆ្នាំ ទើបបានសម្រេចសម្ភោធបើកដំណើរការលក់ជាផ្លូវការក្រោមអធិបតីភាព ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ចូន នៅថ្ងៃទី០៧ ខែមករា ឆ្នាំ២០២០នៅផ្សារទំនើបអ៊ីអន២ រាជធានីភ្នំពេញ។
គួរបញ្ជាក់ថា ការផ្តួចផ្តើមគំនិតក្នុងការធ្វើផ្លាកលេខពិសេសនេះ ត្រូវបានឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ចូន ធ្វើឡើងក្នុងគោលបំណងកៀរគរថវិកាជូនជាតិពីអ្នកប្រើប្រាស់យានយន្ត ដែលចង់បានផ្លាកលេខពិសេសបំពាក់នៅលើរថយន្តរបស់ពួកគេ៕
រក្សាសិទ្ធិដោយ៖CEN
