ភ្នំពេញ ៖ ស្ត្រីម្នាក់ដែលអគ្គីភ័យឆាបឆេះផ្ទះរបស់គាត់អស់មួយខ្នងសល់តែផេះ បានពោលថា ៖ ជិតដល់ថ្ងៃរៀបការកូនស្រីរបស់គាត់ហើយស្រាប់តែភ្លើងឆេះផ្ទះអស់បានលុយពីណាយកមករៀបការទៀតនោះ
នៅព្រឹកថ្ងៃទី៨ខែមីនាឆ្នាំ២០២១ ក្រុមការងារអង្គភាពCEN បានចុះទៅជួបសម្ភាសន៍ជាមួយស្ត្រីម្នាក់ឈ្មោះ ប៉ូច អូន អាយុ៦២ឆ្នាំមុខរបរលក់ខោអាវជជុះស្នាក់នៅម្តុំផ្លូវរថភ្លើង ភូមិកាកាប សង្កាត់កាកាបទី២ខណ្ឌពោធិ៍សែនជ័យរាជធានីភ្នំពេញដែលជាជនរងគ្រោះដោយគ្រោះអគ្គីភ័យ ។
គួររំលឹកផងដែរថា ៖ នៅវេលាម៉ោង១និង៣០នាទីយប់រំលងអាធ្រាតឈានចូលថ្ងៃទី៧ ខែមីនា ឆ្នាំ២០២១កន្លងទៅពេលថ្មីៗនេះ មានករណីអគ្គីភ័យមួយបានកើតឡើងនៅចំនុចផ្លូវរថភ្លើងក្នុងភូមិកាកាប សង្កាត់កាកាបទី២ខណ្ឌពោធិសែនជ័យបានលេបត្របាក់ផ្ទះប្រជាពលរដ្ឋអស់២ខ្នងសល់តែផេះរួមនិងផ្ទះអ្នកស្រីប៉ូចអូនផងដែរ។
តាមការរៀបរាប់ពីស្ត្រីរងគ្រោះខាងលើបានឲ្យដឹងថា៖រូបគាត់ឈ្មោះ ប៉ូច អូនអាយុ៦២ឆ្នាំស្នាក់នៅចំនុចកើតហេតុខាងលើនិងមានប្តីឈ្មោះ កង គា អាយុ៦៦ឆ្នាំស្នាក់នៅជាមួយគ្នានិងមានកូនស្រីម្នាក់ឈ្មោះ កង លីដា អាយុ២៨ឆ្នាំ មុខរបរបុគ្គលិកក្រុមហ៊ុនឯកជនស្នាក់ជាមួយគ្នា។
រូបគាត់បានបង្ហើបឲ្យដឹងថា គាត់មានតែកូនស្រីទោលតែម្នាក់គត់ហើយកូនស្រីគាត់ត្រូវបានភ្ជាប់ពាក្យជាមួយនិងកូនកំលោះឈ្មោះគង់ សុខា អាយុ២៦ឆ្នាំមុខរបរលក់គ្រឿងឈើស្នាក់នៅក្បែរគ្នា។
គាត់បានបន្តទៀតថា កូនស្រីគាត់លីដានិងសុខា គ្រោងចូលរោងការនៅថ្ងៃទី៨ខែមីនាឆ្នាំ២០២១នេះ តែដោយសារតែជំងឺកូវីដ ១៩បានរីករាលដាលជារៀងរាល់ថ្ងៃ ទើបគាត់បានពន្យារពេលរៀបការកូនស្រីរបស់គាត់លើកទៅថ្ងៃទី២០ខែមេសាឆ្នាំ២០២១វិញ ចៃដន្យអាក្រក់ស្រាប់នៅយប់ថ្ងៃទី៧ខែមីនាឆ្នាំ២០២១នេះ ភ្លើងឆេះផ្ទះរបស់គាត់និងម៉ូតូចំនួន៥គ្រឿងលុយដុល្លារចំនួន៣០០០ដុល្លារនិងលុយខ្មែរមួយចំនួន សរុបជាង១០០០០ដុល្លារសហរដ្ឋអាមេរិក អីចឹងហើយទើបគាត់បានពោលពាក្យថា៖ ភ្លើងឆេះផ្ទះអស់សល់តែផេះមានលុយឯណារៀបការកូនស្រីទៀត ហើយរហូតមកដល់ពេលនេះហើយក៏មិនទាន់់ឃើញមានមន្ត្រីសាលាខណ្ឌពោធិ៍សែនជ័យណាម្នាក់ ចុះមកសួសុខទុក្ខពួកគាត់នោះទេ។
ក្នុងនោះដែរគាត់ក៏សូមឲ្យលោកហែម ដារិទ្ធ អភិបាលខណ្ឌពោធិ៍សែនជ័យ និងសប្បុរសជនជួយគាត់ផង គាត់អស់រលីងពីខ្លួនហើយគ្មានអ្វីសល់នោះទេ លុយកាក់ដែលពួកគាត់ខិតខំំរកស៊ីសន្សុំរាប់សិបឆ្នាំ ពេលនេះសល់តែផេះទេ៕ រក្សាសិទ្ធិដោយ៖សួង សាម
