ភ្នំពេញ ៖ ដូចដែលប្រិយមិត្តជាច្រើនក្នុងបណ្តាញសង្គម បានទទួលជ្រាបរួចហើយ ពីរូបភាពមួយសន្លឹកដ៏មានអត្ថន័យ បង្ហាញទឹកចិត្តម្តាយជាមន្ត្រីប៉ូលិសចរាចរណ៍ម្នាក់ បើទោះជារវល់បំពេញកិច្ចការងារយ៉ាងណា ក៏បានឆ្លៀតផ្តល់ភាពកក់ក្តៅដល់កូនតូចរបស់ខ្លួន តាមរយៈការបំបៅដោះ និងភ្ជាប់សារមួយឃ្លាថា៖ «ព្រោះតែពាក្យថាម្តាយ មិនថាក្នុងកាលៈទេសៈណាទេ ដើម្បីកូនភ្លេចអស់ភាពអៀនខ្មាស (នេះហើយជីវិតពិត)»។
ប៉ុន្តែ ក្រោយផុសរំលងបានប៉ុន្មានថ្ងៃ និងកំពុងផ្ទុះការចាប់អារម្មណ៍ជាខ្លាំង ជាមួយការកោតសរសើរព្រោងព្រាត ស្រាប់តែ នៅថ្ងៃទី០៦ ខែមីនា ឆ្នាំ២០២១ អ្នកម្តាយជាមន្ត្រីប៉ូលីសខាងលើ ដែលមានគណនីហ្វេសប៊ុកឈ្មោះ Sokha Konkatao ដោយមិនដឹងជាយ៉ាងម៉េច បានបង្ហោះសារសុំទោសដល់អង្គភាពការងាររបស់ខ្លួនយ៉ាងដូច្នេះថា៖ «នាងខ្ញុំអនុសេនីយ៍ទោ ស៊ីថុង សុខា អត្តលេខ71655 សូមចេញមុខសុំទោសជាសារធារណៈ ក្នុង FACE BOOK ចំពោះការផុសរូបភាពបំបៅដោះកូននៅកន្លែងធ្វើការ និងស្លៀកឈុតឯកសណ្ឋាន កាលពីថ្ងៃទី02/03/2021 កន្លងមកនេះ ការផុសទៅនេះនាងខ្ញុំពុំមានគោលបំណងធ្វើអោយប៉ះពាល់ដល់កិត្តិយសអង្គភាពនគរបាល ព្រមទាំងប៉ះពាល់ដល់កិត្តិយសស្ត្រីខ្មែរទេ អាស្រ័យដូចនេះសូមអង្គភាពនិងថ្នាក់ដឹកនាំគ្រប់ជាន់ថ្នាក់ មេត្តាដោយក្តីអនុគ្រោះ»។
តែទោះយ៉ាងណា ក្រោយឃើញបែបនេះ លោកជំទាវ ហ៊ុន ស៊ីណាត ក៏បានបង្ហោះសារលើកទឹកចិត្តថា៖ «នេះហើយជាព្រហ្មវិហារធម៌របស់ម្តាយគ្រប់រូប ដែលត្រូវផ្តល់អោយកូន កូនក្មួយស្រីឃ្លាន ហើយជាម៉ោងក្មួយស្រីបម្រើការងារ ក្មួយមិនមានពេលរត់ទៅរត់មក ដើម្បីដោះដូរឯកសណ្ឋានទេ ហើយបានរត់មកបំបៅដោះកូននោះទេក្មួយ ឬក៏រង់ចាំអោយចប់ការងារបានទេ ក្មួយស្រីថ្នាក់លើរបស់ក្មួយស្រីមានតែអាណិតក្មួយ និងកោតសរសើរការតស៊ូរបស់ក្មួយ ក្នុងនាមជាស្ត្រី និងជាម្តាយ។ ចំណែកខ្ញុំវិញ សូមសរសើរដោយស្មោះដែលក្មួយធ្វើនេះ»៕ រក្សាសិទ្ធិដោយ៖ លឹម ហុង
