ភ្នំពេញ ៖ វីដេអូថ្មីមួយ ដែលត្រូវបានបង្ហោះនៅលើផេក «បក្សីកីឡា មរតកដូនតាខ្មែរ» កាលពីម្សិលមិញនេះ (ថ្ងៃទី០៧ ខែមីនា ឆ្នាំ២០២១) បានបង្កឲ្យមានការភ្ញាក់ផ្អើល និងហួសចិត្តជាខ្លាំង ក្រោយឃើញបុរសជាអ្នកលេងមាន់ជល់ម្នាក់ បានចេញមុខនិយាយអួតក្តែងៗ ពីមាន់ជល់ដ៏ខ្លាំងពូកែរបស់ខ្លួន ដោយបបួលអ្នកលេងមាន់ជល់ដូចគ្នាមានគីឡូ ៣៦ បើខ្លាំងចូលមក ដោយហ៊ានភ្នាល់ដាក់ខ្សែកមាស ដាក់ឡាន ដាក់ផ្ទះ មិនខ្លាចនរណាទាំងអស់ ដោយអះអាងថា មាន់គករបស់ខ្លួននេះ ចាក់មិនងាប់ និងទើបឈ្នះថ្មីៗ បានលុយក្រាក់ៗ ទិញឡាន ទិញផ្ទះដោយសារវា។
តែទោះយ៉ាងណា ក្រោយពីស៊ើបសួរនាំពីប្រវត្តិរបស់កំពូលអ្នកអួតរូបនេះ ទើបដឹងថា រូបគេធ្លាប់ត្រូវបានសមត្ថកិច្ចចាប់ខ្លួនម្តងរួចហើយ ក្នុងករណីលេងល្បែងស៊ីសងខុសច្បាប់ (ជល់មាន់)។
នេះបើយោងតាមប្រភពព័ត៌មាន បានឲ្យដឹងថា បុរសខាងលើ ដែលមានឈ្មោះ ឃឹម សាវីត ភេទប្រុស អាយុ ៣៦ ឆ្នាំ មានទីលំនៅបូរីភពថ្មី ៣ សង្កាត់ព្រែកកំពឹស ខណ្ឌដង្កោ រាជធានីភ្នំពេញ មុខរបរលក់ដូរ ធ្លាប់ត្រូវបានសមត្ថកិច្ចខេត្តកណ្តាល ឃាត់ខ្លួនម្តងរួចមកហើយ កាលទី២ ខែមករា ឆ្នាំ២០២១ វេលាម៉ោង១៣ និង០០នាទី នៅចំណុចទំនប់៩៤ ភូមិអំពៅព្រៃ ឃុំកណ្ដោក ស្រុកកណ្ដាលស្ទឹង ខេត្តកណ្ដាល ពាក់ព័ន្ធល្បែងស៊ីសងខុសច្បាប់ (ជល់មាន់ និង អាប៉ោង)។
ក្រោយពីបានឃើញបែបនេះ អ្នកលេងបណ្តាញសង្គម ព្រោះតែហួសចិត្តនឹងអំនួតរបស់អតីជាខ្លាំងធ្លាប់ជាប់ខ្នោះរូបនេះ ក៏បានដាក់ឲ្យថា៖ «បើស៊ីបានសម្ងំស៊ីទៅ ចាំបាច់អួតក្អេងក្អាងធ្វើស្អីប្រូ?, សង្ស័យមិនយូរទេ បានទៅវាស់កម្ពស់ទៀតហើយ អាផេះ»៕ រក្សាសិទ្ធិដោយ៖ លឹម ហុង
