ភ្នំពេញ ៖ នារសៀលថ្ងៃទី៩ ខែមីនា ឆ្នាំ២០២១ នេះ តារាចម្រៀងដ៏ល្បី ណុប បាយ៉ារិទ្ធ ត្រូវបានក្រុមគ្រូពេទ្យបញ្ជូនទៅសម្រាកព្យាបាលជំងឺកូវីដ១៩ នៅសណ្ឋាគារ The Great Duke Phnom Penh ហើយ ។
យ៉ាងណាមិញ នៅមុននេះបន្តិច លោក ណុប បាយ៉ារិទ្ធ ក៏បានបង្ហោះសារជាថ្មី ដោយភ្ជាប់នឹងរូបភាពទីកន្លែងសម្រាកធ្វើចត្ថាឡីស័កគួរឲ្យស្រណោះថា៖ «ឥឡូវនេះខ្ញុំបានមកដល់សណ្ឋាគារ (The Great Duke Phnom Penh) អតីតសណ្ឋាគារinterconចាស់១ម៉ោងជាងហើយ ខ្ញុំសុខសប្បាយទេបងប្អូន ខាងសណ្ឋាគារ ខាងក្រសួងសុខាភិបាលនិងថ្នាក់ដឹកនាំលោកបានរៀបចំរួចជាស្រេចក្នុងបន្ទប់សម្រាកគឺមានផាសុកភាព មានខ្យល់អាកាសល្អ ខ្ញុំប្តេជ្ញាចិត្តថានិងព្យាយាមយកឈ្នះជំងឺនេះឲ្យបានបន្ថែមពីលើការព្យាបាលរបស់គ្រូពេទ្យ» ។
លោកស្រី យក់ សម្បត្តិ រដ្ឋលេខាធិការ ក្រសួងសុខាភិបាល បានមានប្រសាសន៍ កាលពីយប់មិញនេះ ថ្ងៃទី០៨ ខែមីនា ឆ្នាំ២០២១ ថា ឥឡូវនេះមានពាក់ព័ន្ធជាមួយប្អូនរបស់អគ្គនាយកហង្សមាស និងក្រុមគ្រួសារ មានចេញរោគសញ្ញាឆ្លងកូវីដ១៩ និងព្រមទាំងអ្នកចម្រៀងហង្សមាសច្រើននាក់ទៀត ដូចជា ណុប បាយ៉ារិទ្ធ ក៏ឆ្លងដែរ។
ទាក់នឹងរឿងកំពុងតែរសើបនេះផងដែរ នៅថ្ងៃទី០៩ ខែមីនា ឆ្នាំ២០២១ តារាចម្រៀងប្រចាំផលិតកម្មរស្មីហង្សមាស ណុប បាយ៉ារិទ្ធ ក៏បានចេញមកបញ្ចាក់ថា លោកពិតជាត្រូវបានក្រសួងសុខាភិបាល បានយកសំណាកទៅពិនិត្យកាលពីយប់មិញមែន ហើយពេលនេះ លោកកំពុងតែរង់ចាំលទ្ធផលតេស្ត។
ដោយឡែក នៅមុននេះបន្តិច នារសៀលថ្ងៃទី០៩ មីនា ដដែលនេះ ស្រាប់តែលោក ហេង ឡុង បានចេញមកបញ្ចាក់ច្បាស់ៗថា ពេលនេះ លោក ណុប បាយ៉ារិទ្ធ ត្រូវបានតេស្តវិជ្ជមានកូវី-១៩ ហើយ។ លោក ហេង ឡុង បានសរសេររៀបរាប់លម្អិតនៅលើហ្វេសប៊ុកថា៖ «មុននេះបន្តិច តារាចម្រៀង ណុប បាយ៉ារិទ្ធ បានបញ្ជាក់មកខ្ញុំបាទថា គាត់មានវិជ្ជមានជំងឺកូវីដ-១៩ សូមអំពាវនាវបងប្អូនទាំងអស់ដែលបានពាក់ព័ន្ធជាមួយនឹងប្អូនប្រុស សូមមេត្តាទៅធ្វើតេស្តរកជំងឺកូវីដ-១៩ ជាបន្ទាន់»។ ទន្ទឹមនេះផងដែរ សាមីខ្លួនលោក ណុប បាយ៉ារិទ្ធ ក៏បានបង្ហោះសារទទួលស្គាល់ការពិតថា៖ «មុននេះបន្តិចខ្ញុំបានទទួលលទ្ធផលហើយ គឺខ្ញុំមានវិជ្ជមានកូវីដ១៩ ខ្ញុំកំពុងរៀបចំសម្លៀកបំពាក់និងរង់ចាំរថយន្តខាងក្រសួងសុខាភិបាលមកទទួល អរគុណសម្រាប់ការព្រួយបារម្ភរបស់បងប្អូន ខ្ញុំត្រូវតែរឹងមាំ យកឈ្នះជំងឺនេះដោយការព្យាបាលពីគ្រូពេទ្យឲ្យបាន ខ្ញុំមិនតក់ស្លុតនិងការពិតនេះទេ ត្បិតខ្ញុំក្តី អ្នកដែលខ្ញុំឆ្លងពីគាត់ក្តី គ្មានអ្នកណារីករាយចហ់ទទួលឡើយ មានតែពាក្យមួយប្រាប់ខ្លួនឯងគឺរឹងមាំ តស៊ូ »៕ រក្សាសិទ្ធិដោយ៖ លឹម ហុង និងមីដា
