ភ្នំពេញ ៖ សម្ដេចពិជ័យសេនា ទៀ បាញ់ ប្រមុខការពារជាតិកម្ពុជាបានបញ្ជាក់ថា រថយន្តកងទ័ពជាង ២០០គ្រឿង បានត្រៀមរួចរាល់អស់ហើយសម្រាប់ដឹកជញ្ជូនប្រជាពលរដ្ឋ និងពលករខ្មែរ ដែលវិលត្រឡប់មកពីប្រទេសចូលមកក្នុងប្រទេសកម្ពុជាវិញ។
សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានមានប្រសាសន៍ CEN ថា បន្ទាប់ពីទទួលបានបទបញ្ជាពីសម្ដេចតេជោ ហ៊ុន សែន កងទ័ពបានត្រៀមរថយន្តជាង ២០០គ្រឿងសម្រាប់ដឹកពលករដែលមកពីប្រទេសថៃចូលមកក្នុងប្រទេសកម្ពុជាវិញ ។
ហើយខាងកងទ័ពបានត្រៀមរួចរាល់តាំងពីថ្ងៃទី៨ ខែមីនា ឆ្នាំ២០២១ ដោយរថយន្តយោធាមួយចំនួនបានបំពេញតួនាទីភារកិច្ចនៅជួរមុខស្រាប់រួចទៅហើយ ប៉ុន្តែដោយសារមានបទបញ្ជា និងមានការកែសម្រួលខ្លះៗ ដោយប្រើរថយន្តជាង ២០០គ្រឿង សម្រាប់ដឹកពលករមកពីប្រទេសថៃចូលមកខាងក្នុងប្រទេសវិញ។
សម្ដេចពិជ័យសេនា ទៀ បាញ់ បានមានប្រសាសន៍បញ្ជាក់ថា រថយន្តរបស់កងទ័ពជាង ២០០គ្រឿងបានត្រៀមរួចរាល់អស់ហើយ គឺរង់ចាំតែការអនុវត្តដំណើរការតែប៉ុណ្ណោះ ហើយនៅថ្ងៃទី៩ ខែមីនាឆ្នាំ២០២១នេះ កងទ័ពគ្រប់ទិសទីទាំងអស់នឹងបំពេញតាមតួនាទីភារកិច្ចតាមបទបញ្ជារបស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា។
ចំណែកលោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក បានបញ្ជាឲ្យមេបញ្ជាការយោធភូមិភាគ មេបញ្ជាការងងពលធំ បញ្ជាការដ្ឋានចំណុះកងទ័ពជើងគោក ត្រៀមរថយន្តចំនួន ២០៤ គ្រឿង សម្រាប់ដឹកពលករខ្មែរដែលត្រឡប់មកពីប្រទេសថៃ ដើម្បីមកចូលរួមបុណ្យចូលឆ្នាំខ្មែរខាងមុខនេះ។
លោកឧត្តមសេនីយ៍ឯក ហ៊ុន ម៉ាណែត ដោយសារស្ថានភាពនៅតាមព្រំដែនប្រជាពលរដ្ឋបុកមកខ្លាំង ដើម្បីត្រៀមលក្ខណៈចូលឆ្នាំខ្មែរខាងមុខនេះ គឺសម្តេចតេជោ ហ៊ុន សែន បានដាក់បទបញ្ជាឲ្យរុញកម្លាំងកងទ័ពដើម្បីជួយដឹកជញ្ជូនប្រជាពលករដែលត្រឡប់មកពីថៃ។ ចំពោះការរៀបចំកម្លាំងដំបូង គឺប្រើប្រាស់កម្លាំង ២០៤គ្រឿង តាមផែនការដឹកជញ្ជូនដែលមានស្រាប់ របស់កងពលលេខ៩០ ចំនួន ១០៤គ្រឿង និងកងពល៩៩ ចំនួន ១០០គ្រឿង៕ រក្សាសិទ្ធិ ដោយៈ ចេស្តារ
