ភ្នំពេញ ៖ ដើម្បីសុខុមាលភាពរបស់បងប្អូនប្រជាពលរដ្ឋ ពិសេសបងប្អូនប្រជាពលរដ្ឋដែលបាននិងកំពុងធ្វើចត្តាឡីស័ក នៅតាមទីតាំងចត្តាឡីស័កមួយចំនួន នៅក្នុងរាជធានីភ្នំពេញ លោកឃួង ស្រេង អភិបាលនៃគណៈអភិបាលរាជធានីភ្នំពេញ បានណែនាំឲ្យមន្ត្រីនៃមន្ទីរសុខាភិបាលរាជធានី ចុះបាញ់ថ្នាំមូសនៅមណ្ឌលចត្តាឡីស័កមួយចំនួន នៅក្នុងមូលដ្ឋានរាជធានីភ្នំពេញ។
ជាក់ស្តែងនៅព្រលប់ថ្ងៃទី០៩ខែមីនានេះ ក្រុមការងារនៃមន្ទីរសុខាភិបាលរាជធានីភ្នំពេញ អនុវត្តទៅតាមការណែនាំរបស់លោកឃួង ស្រេង បានចុះធ្វើសកម្មភាពបាញ់ថ្នាំសម្លាប់មូសក្នុងទីតាំងធ្វើចត្តាឡីស័កចំនួន៣ ក្នុងមូលដ្ឋានខណ្ឌសែនសុខ និងខណ្ឌពោធិ៍សែនជ័យ ក្នុងនោះ រួមមានមណ្ឌលចត្តាឡីស័កវិទ្យាល័យហ៊ុនសែនបុរី១០០ខ្នង អនុវិទ្យាល័យហ៊ុនសែនពោធិចិនតុង និងមណ្ឌលចត្តាឡីស័កអនុវិទ្យាល័យហ៊ុនសែនភ្នំពេញថ្មី។
មន្ត្រីរដ្ឋបាលរាជធានីភ្នំពេញ បានឲ្យដឹងនៅរាត្រីថ្ងៃទី០៩ខែមីនានេះថា អនុវត្តទៅតាមការណែនាំរបស់លោកឃួង ស្រេង អភិបាលនៃគណៈអភិបាលរាជធានីភ្នំពេញ ក្រុមការងារនៃមន្ទីរសុខាភិបាលរាជធានីភ្នំពេញ តែងបានបាញ់ថ្នាំមូស និងបាញ់សម្លាប់មេរោគ ដើម្បីសុខុមាលភាពរបស់បងប្អូនប្រជាពលរដ្ឋ ។
មន្ត្រីដដែលក៏បានបញ្ជាក់ផងដែរថា ពាក់ព័ន្ធនឹងការបាញ់ថ្នាំមូសនេះដែរ យើងមិនមែនចេះតែបាញ់នោះទេ គឺយើងត្រូវកំណត់ពីពេលវេលា ដែលត្រូវបាញ់ ទៅតាមជំនាញរបស់សុខាភិបាល៕ រក្សាសិទ្ធិដោយ៖បញ្ញាស័ក្តិ
