ភ្នំពេញ ៖ បុរសម្នាក់តូចចិត្តប្រពន្ធមានប្តីថ្មី ជិះកង់មកលោតទឹកសម្លាប់ខ្លួនពីលើស្ពានបាឡេមិនសម្រេច ព្រោះសន្តិសុខប្រចាំការនៅទីនោះឃាត់ទាន់។
ហេតុការណ៍នេះ បានកើតឡើងកាលពីវេលាម៉ោង និង៤០នាទី រសៀលថ្ងៃទី៩ខែមីនា ឆ្នាំ ២០២១ ចំណុចលើស្ពានបាឡេក្នុងភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ។
បុរសខាងលើឈ្មោះគិន ចន្ធី អាយុ៤១ឆ្នាំ ស្នាក់នៅភូមិត្រពាំងទទឹម ឃុំពោធិ៍ចំរើន ស្រុកបសេដ្ឋ ខេត្តកំពង់ស្ពឺ ។
តាមប្រភពព័ត៌មានពីបុរសអភ័ព្វស្នេហ៍ខាងលើដែលស្លៀកពាក់សម្លៀកបំពាក់ ជាសន្តិសុខផងនោះ បានឱ្យដឹងថា ខ្លួននិងប្រពន្ធបានយកគ្នាជាច្រើនឆ្នាំ និងរស់នៅជាមួយគ្នាក៏មានសុភមង្គលហើយពួកគេ បានកូនប្រុសម្នាក់អាយុ៤ឆ្នាំ ជាចំណងស្នហ៍ស្រាប់តែពេលថ្មីៗនេះ មានបងថ្លៃខាងប្រពន្ធឱ្យប្រពន្ធបស់គាត់យកប្តីថ្មីហើយប្រពន្ធបស់គាត់ ក៏លែងគាត់ទៅយកប្តីថ្មីតាមសំដីបងថ្លៃបាត់ទៅដែលធ្វើឱ្យជាអតីតប្តី ដែលស្រឡាញ់ប្រពន្ធខ្លាំងពិបាក់ចិត្តគិតអ្វីមិនឃើញហើយណាមួយការងារក៏គ្មានធ្វើទៀត ក៏សម្រេចចិត្តជិះកង់ពីម្តុំផ្សារបែកចាន ក្នុងស្រុកអង្គស្នួល ខេត្តកណ្តាល ប៉ងមកលោតសម្លាប់ខ្លួន។
តាមព័ត៌មានពីបុរសជាសន្តិសុខ ដែលយាមប្រចាំការនៅក្បែរស្ពានបាឡេ គេបានឱ្យដឹងថា ពួកគាត់បានឃើញបុរសខាងលើប៉ងលោតទឹកសម្លាប់ខ្លួន ពីលើស្ពានបាឡេ ភ្លាមៗនោះគាត់ក៏បានស្រែកកុំឱ្យលោត និងព្យាយាមនិយាយពន្យល់ រហូតដល់បុរសខាងលើទន់ចិត្ត និងព្រមចុះពីរបាស្ពានហើយក៏ទាក់ទងសមត្ថកិច្ចមូលដ្ឋានកទៅសួរនាំ។
បុរសអភ័ព្វស្នេហ៍ខាងលើ បន្ទាប់សមត្ថកិច្ចសួរនាំ និងអប់រំរួចក៏ជិះកង់ត្រឡប់ទៅវិញ៕ រក្សាសិទ្ធិដោយ៖សារឿន
