ភ្នំពេញ ៖ ជនសង្ស័យ២នាក់ជិះម៉ូតូមួយគ្រឿង ធ្វើសកម្មភាពចូលទៅលួចបាសតែសំណាងមិនល្អ លើកបាសមិនរួចបានម្ចាស់ផ្ទះឃើញទាន់ដេញក្រប៊ួចទាញកអាវបានម្នាក់ ចំណែកបក្ខពួកម្នាក់ទៀតជិះរត់គេចខ្លួនបាត់ស្រមោល។
ហេតុការណ៍ភ្ញាក់ផ្អើលនេះដែរកើតឡើងនៅវេលាម៉ោង៧ និង ៤០ នាទីយប់ថ្ងៃអង្គារ ទី៩ ខែមីនា ឆ្នាំ ២០២១ ចំណុចមុខរោងចក្រ៦ជាន់ តាមបណ្តោយផ្លូវវេងស្រេង ក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មានពីបងស្រីជាម្ចាស់ផ្ទះឈ្មោះ សារឿន កណ្ណិការ បានរៀបរាប់ឲ្យដឹងថា មុនពេលកើតហេតុគាត់បានចេញពីផ្ទះទៅទិញម្ហូបនៅផ្សារ រួចបានទុកឲ្យកូនស្រីនៅចាំផ្ទះ ខណៈពេលដែលគាត់បានដើរទៅដល់ពាក់កណ្តាលផ្លូវ ស្រាប់តែក្រឡេកទៅឃើញជនសង្ស័យមានគ្នា២នាក់ ជិះម៉ូតូមួយគ្រឿងម៉ាកហុងដាទ្រីមសង់សេ១២៥ ពណ៌ខ្មៅមិនចាំផ្លាកលេខបានចូលទៅលួចបាសបាន១ រួចបម្រុងលើកដាក់លើម៉ូតូ ប្រុងនឹងជិះរត់គេចខ្លួនតែត្រូវបានគាត់រត់មកទាន់ក៏ទាញកអាវទម្លាក់ជនសង្ស័យបានម្នាក់ ចំណែកបក្ខពួកម្នាក់ទៀតបានជិះរត់គេចខ្លួនបាត់ទៅ។
ក្រោយពេលកើតហេតុសមត្ថកិច្ចមូលដ្ឋាន ចុះមកដល់រួចវាយខ្នោះជនសង្ស័យ យកទៅប៉ុស្តិ៍នគរបាលរដ្ឋបាលសង្កាត់ចោមចៅទី១ ដើម្បីធ្វើការសាកសួរបន្តរួចឱ្យជនរងគ្រោះជាម្ចាស់ផ្ទះ ទៅដាក់ពាក្យបណ្ដឹង ដើម្បីងាយស្រួលសមត្ថកិច្ចតាមស្រាវជ្រាវរកមុខសញ្ញាជាបក្ខពួកម្នាក់ទៀត ដើម្បីយកមកចាត់ការតាមផ្លូវច្បាប់៕ រក្សាសិទ្ធិដោយ៖ សា មេត
