ភ្នំពេញ ៖ រថយន្តស៊េរីទំនើបម៉ាសស្ដាគេចរថយន្តមួយគ្រឿងទៀតបណ្ដាលឲ្យបុករះបង្កាន់ដៃដែកខូចខាតជាច្រើនកង់ និងខូចខាតរថយន្តមួយកំណាត់មុខយ៉ាងដំណំ ក្នុងហេតុការណ៍នេះពុំមានគ្រោះថ្នាក់ដល់មនុស្សឡើយ។
ហេតុការណ៍នេះបានកើតឡើងនៅវេលាម៉ោង ៩ និង ៣០ នាទីយប់ថ្ងៃទី ៩ ខែមីនាឆ្នាំ ២០២១ ស្ថិតត្រង់ចំណុចផ្លូវកោងបុរីអង្គរក្នុងសង្កាត់ទួលសង្កែទី ២ ខណ្ឌឫស្សីកែវរាជធានីភ្នំពេញ។
យោងតាមប្រភពពីអ្នកបើកបររថយន្តបានឲ្យដឹងថា មុនកើតហេតុពួកគាត់មានគ្នា ២ នាក់ជិះរថយន្តម៉ាសស្ដាពណ៌សពាក់ផ្លាកលេខភ្នំពេញ 2Y- 3869 តាមបណ្ដោយផ្លូវបុរីអង្គរឆ្ពោះ ទៅរង្វង់មូលកាំកូលុះមកដល់ត្រង់ចំណុចផ្លូវកោងក៏ឃើញមានរថយន្តមួយគ្រឿងទៀតមកពីមុខ ក៏បួងចង្កូតគេចមកស្ដាំជ្រុលទៅបុករះបង្កាន់ដៃដែកដែលដាំអមផ្លូវ បណ្ដាលឲ្យដាច់ជាកង់អស់ជាច្រើនម៉ែត្រ តែសំណាងល្អដែលមិនមានគ្រោះថ្នាក់ដល់អ្នកបើកបរនិងអ្នករួមដំណើរឡើយ គ្រាន់តែខូចខាតរថយន្តផ្នែកខាងមុខយ៉ាងដំណំទៅមុខលែងរួច។
ភ្លាមនោះម្ចាស់រថយន្តបានខលទូរស័ព្ទហៅរថយន្តស្ទូចមកដឹកយកទៅជួសជុលនៅការ៉ាស់ តែត្រូវបានសន្តិសុខក្រុមហ៊ុនខាំកូចុះមកដល់ធ្វើការឃាត់រថយន្តដើម្បីទាមទារសំណងប៉ះប៉ូវទៅលើការខូចខាតបង្កាន់ដៃដែករបស់ក្រុមហ៊ុន។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់ចំណុចទីតាំងកើតហេតុ ចំណែកអ្នកបើកបររថយន្តក៏បានទំនាក់ទំនងទៅលោកប៉ារបស់ខ្លួនដើម្បីមកធ្វើការចរចាជាមួយនឹងក្រុមហ៊ុនដោយសងថ្លៃខូចខាតនៅបង្កាន់ដៃដែកចំនួន ១៥០ ដុល្លារបញ្ចប់រឿងនៅនឹងកន្លែងកើតហេតុភ្លាមៗ៕ រក្សាសិទ្ធិដោយ៖ សារឿន
