ភ្នំពេញ ៖ ដូចដែលប្រិយមិត្តទទួលជ្រាបហើយ ពីរូបភាពមួយសន្លឹកដ៏មានអន្ថន័យ បង្ហាញពីទឹកចិត្តរបស់ប៉ូលីសស្រីម្នាក់ ដែលក្នុងនាមជាម្តាយ ទោះក្នុងពេលត្រូវជាប់បំពេញភារៈកិច្ចការងារ ក៏ឆ្លៀតបំបៅដោះកូន និងបានភ្ជាប់សារយ៉ាងខ្លីថា៖ «ព្រោះតែពាក្យថាម្តាយ មិនថាក្នុងកាលៈទេសៈណាទេ ដើម្បីកូនភ្លេចអស់ភាពអៀនខ្មាស (នេះហើយជីវិតពិត)»។
តែអ្វីដែលយើងគ្រប់គ្នានឹកស្មានដល់នោះ គឺក្រោយរូបភាពនេះត្រូវបានចែករំលែកយ៉ាងផុសផុល ជាមួយនឹងការកោតសរសើរពីទំហំទឹកចិត្តរបស់ប៉ូលីសស្រីជាម្តាយយ៉ាងច្រើន មិនបានប៉ុន្មានថ្ងៃផង ស្រាប់តែគាត់បានបង្ហោះសារសុំទោសជាសាធារណៈ ដោយប្រហែលជាគាត់រងការស្តីបន្ទោសពីមេកើយ ដោយសាររូបភាពមួយសន្លឹកនេះ ដែលបានបង្ហោះកាលពីថ្ងៃទី០៣ ខែមីនា ឆ្នាំ២០២១។
នេះបើយោងតាមគណនីហ្វេសប៊ុកឈ្មោះ Sokha Konkatao បានបង្ហោះសារសុំទោសកាលពីថ្ងៃទី០៦ ខែមីនា ឆ្នាំ២០២១ ថា៖ «នាងខ្ញុំអនុសេនីយ៍ទោស៊ីថុង សុខា អត្តលេខ71655 សូមចេញមុខសុំទោសជាសារធារណះក្នុងFACE BOOK ចំពោះការផុសរូបភាពបំបៅដោះកូននៅកន្លែងធ្វើការនិងស្លៀកឈុតឯកសណ្ឋានកាលពីថ្ងៃទី02/03/2021កន្លងមកនេះ ការផុសទៅនេះនាងខ្ញុំពុំមានគោលបំណងធ្វើឲ្យប៉ះពាល់ដល់កិត្តិយសអង្គភាពនគរបាល ព្រមទាំងប៉ះពាល់ដល់កិត្តិយសស្ត្រីខ្មែរទេ អាស្រ័យដូចនេះសូមអង្គភាពនិងថ្នាក់ដឹកនាំគ្រប់ជាន់ថ្នាក់មេត្តាដោយក្តីអនុគ្រោះ»។
យ៉ាងណាមិញ ដោយសារតែឃើញរូបភាពមួយសន្លឹកនេះហាក់ធ្ងន់ធ្ងរ រហូតប៉ូលីសស្រីខាងលើត្រូវធ្វើកិច្ចសន្យាជាលាយលក្ខណ៍អក្សរបែបនេះ លោក ផែង វណ្ណៈ ក៏បានបង្ហាញអារម្មណ៍អាណិតអាសូរដល់ប៉ូលីសខាងលើជាខ្លាំង និងបានសួរទៅកាន់មេអង្គភាពនោះយ៉ាងចាក់ដោតថា៖ «ដើម្បី កូនទោះបីម៉ែត្រូវមេព្រមាន និងស្ដីបន្ទោស រហូតចាប់បង្ខំឲ្យម៉ែធ្វើកិច្ចសន្យាក៏ម៉ែព្រមដែរតែម៉ែមិនទុកអោយកូនស្លាប់ទេ ។
តើមាត្រាប៉ុន្មាន? ច្បាប់ណាដែលចែងថា មន្ត្រីរាជការជាស្ត្រីមិនអាចបំបៅដោះកូនបានពេលកំពុងបំពេញភារកិច្ច? បើនៅ ប្រទេសគេវិញ សូម្បីតែសមាជិកសភា ឬ នាយករដ្ឋមន្ត្រីជាស្ត្រី ក៏យកកូនមកបំបៅពេលកំពុងធ្វើការ និងពេលកំពុងប្រជុំដែរ ហើយផ្សាយពេញបណ្ដាញព័ត៌មានទៅទៀត។ អាណិតប្អូនស្រីណាស់ដែលមានមេគ្មានបេះដូង»៕ រក្សាសិទ្ធិដោយ៖ លឹម ហុង
