ស្វាយរៀង ៖ អនុវត្តតាមប្រសាសន៍ណែនាំដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាថ្ងៃអង្គារ ទី៩ ខែកុម្ភៈ ឆ្នាំ២០២១ ឯកឧត្តម ម៉ែន វិបុល អភិបាលខេត្តស្វាយរៀង និងជាប្រធានគណៈកម្មការប្រយុទ្ធប្រឆាំងជំងឺកូវីដ១៩ខេត្ត បានចាត់ឱ្យឯកឧត្ដម តូច ប៉ូលីវ៉ា អភិបាលរងខេត្ត និងជាអនុប្រធានគណៈកម្មការប្រយុទ្ធប្រឆាំងជំងឺកូវីដ១៩ខេត្ត ដឹកនាំក្រុមការងារ និងកម្លាំងជំនាញ ចុះពិនិត្យ លក្ខណៈសម្បត្តិ ពិនិត្យទីតាំងតាមវត្តនានាក្នុងក្រុងស្វាយរៀង សម្រាប់ត្រៀមរៀបចំធ្វើឈាបនដ្ឋាន ក្នុងករណីដែលមានអ្នកជំងឺកូវីដ១៩ ទទួលមរណភាព កំឡុងពេលសម្រាកព្យាបាលក្នុងខេត្ត ក្រុមការងារបានពិនិត្យឃើញទីតាំងវត្តកោះជុំ ដែលមានទីធ្លាធំទូលាយ និងនៅឆ្ងាយពីទីប្រជុំជន អាចរៀបចំធ្វើឈាបនដ្ឋានសម្រាប់ត្រៀមបំរុងទុកបាន ។
ទន្ទឹមនោះ និងរៀបចំក្រុមជាងសាងសង់ និងអ្នកជំនាញធ្វើប្លង់បច្ចេកទេសឡបូជាអោយបានឆាប់ៗខាងមុខនេះផងដែរ។
សូមបញ្ជាក់ថា សម្តេចតេជោ ហ៊ុន សែន នាយករដ្ឋមន្ត្រី បានបញ្ជាក់ឲ្យអភិបាលរាជធានីភ្នំពេញ រៀបចំកន្លែងឈាបនដ្ឋានបូជាសព ប្រសិនបើមានករណីស្លាប់ដោយសារកូវីដ–១៩ ។ សម្ដេចតេជោ បញ្ជាក់ថា ការបូជានេះ មិនមែនប្រទេសកម្ពុជាគ្មានដីសម្រាប់បញ្ចុះទេ ពោលគឺដើម្បីបានធាតុជូនដល់សាច់ញាតិរបស់ជនរងគ្រោះយកទៅធ្វើបុណ្យតាមប្រពៃណីសាសនា របស់គេតែប៉ុណ្ណោះ។
យោងតាមអនុសាសន៍របស់សម្តេចតេជោ ហ៊ុន សែន តាមរយៈប្រព័ន្ធអេឡិចត្រូនិច នៅថ្ងៃទី៩ ខែមីនា ឆ្នាំ២០២១នេះ សម្តេចតេជោ ហ៊ុន សែន បានប្រសាសន៍ថា ក្រោយពីសម្តេចមានការពិភាក្សាយ៉ាងម៉ត់ចត់រួចជាមួយរដ្ឋមន្ត្រីក្រសួងសុខាភិបាល ឯកឧត្តម ម៉ម ប៊ុនហេង រួចហើយនោះ សម្តេច បានសម្រេច ត្រូវតែបូជាចំពោះជនរងគ្រោះ ដែលបានបាត់បង់ជីវិត ដោយសារករណីមេរោគកូវីដ–១៩នេះ បើទោះបីជាទំនៀមទម្លាប់ជនជាតិខ្លះ មិនអាចធ្វើការបូជាក៏ដោយនោះ។
សម្តេចតេជោ ហ៊ុន សែន នាយករដុ្ឋមន្ត្រី ក៏បានបញ្ជាឲ្យអភិបាលរាជធានី-ខេត្តទាំងអស់ ត្រៀមកន្លែងដ៏សមស្របមួយ ដើម្បីធ្វើបច្ឆាសម្រាប់បូជាសព ជនរងគ្រោះ ដែលបានស្លាប់ហើយបច្ឆានោះ ក៏អនុញ្ញាតឲ្យរៀបចំបូជាប្រជាពលរដ្ឋធម្មតា បានផងដែរ។
សម្តេចតេជោ ហ៊ុន សែន បានបញ្ជាក់ផងដែរថា បើទោះបីប្រទេសកម្ពុជា នាពេលបច្ចុប្បន្ននេះពុំទាន់មានករណីស្លាប់ដោយសារមេរោគកូវីដ–១៩ក្តី ប៉ុន្តែវាការត្រៀមមួយសម្រាប់ផ្តល់ភាពងាយស្រួលកុំឲ្យបាត់នូវម្ចាស់ការ នាពេលដែលករណីនេះ បានកើតឡើង ។ សម្តេច ក៏បានស្នើឲ្យភាគីពាក់ព័ន្ធទាំងអស់ ជាពិសេសក្រសួងសុខាភិបាល និងក្រសួងយុត្តិធម៌ក៏ត្រូវតាក់តែងអនុក្រឹត្យដោយលម្អិតមួយទាក់ទងនឹងអ្នកជំងឺកូវីដ–១៩នេះផងដែរ។
សូមបញ្ជាក់ថា គិតត្រឹម ថ្ងៃទី ១០ ខែមីនា ឆ្នាំ២០២១ ប្រទេសកម្ពុជា ពុំមានករណីស្លាប់ ដោយសារមេរោគកូវីដ១៩-នេះឡើយ៕ រក្សាសិទ្ធិដោយ៖បញ្ញាស័ក្តិ
