ភ្នំពេញ ៖ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានមានប្រសាសន៍ប្រាប់ CEN នៅព្រឹកថ្ងៃទី១០ ខែមីនា នេះថា ដំណើរការចាក់វ៉ាក់សាំងការពារជំងឺកូវីដ១៩ ដល់កងទ័ព គិតចាប់ពីថ្ងៃទី១០ ខែកុម្ភៈ រហូតដល់ថ្ងៃទី១០ ខែមីនា ឆ្នាំ២០២១ នេះ បានប្រព្រឹត្តទៅដោយរលូន មិនមានបញ្ហាអ្វីកើតមានឡើងនោះទេ។
សម្ដេចពិជ័យសេនា ទៀ បាញ់ បានបញ្ជាក់ថា “យើងទទួលបានជោគជ័យគ្រប់ទីកន្លែងទាំងអស់ ហើយឥឡូវនេះវិលមកដល់ជុំទី២ បានន័យថា គឺត្រូវចាក់នូវម្ជុលទី២ ជាបន្តបន្ទាប់ ព្រោះធម្មតាវ៉ាក់សាំងនេះ បើសិនជាចាក់ម្ជុលទី២ហើយ គឺវាបានផ្តល់នូវភាពកក់ក្តៅច្រើនចំពោះបុគ្គលទាំងនោះ ដែលបានចាក់ហើយ”។
ប្រមុខការពារជាតិបានបញ្ជាក់ទៀតថា ការចាក់វ៉ាក់សាំងការពារជំងឺកូវីដ១៩ លើកទី១ ដល់កងទ័ព គឺបានជិត ១សែននាក់ និងអ្នកដែលនៅសេសសល់ គឺនៅបន្តចាក់ជាបន្តទៀតឲ្យបានគ្រប់គ្នាចំពោះកងកម្លាំងប្រដាប់អាវុធទាំងអស់ ដែលទទួលបានការអនុញ្ញាតឲ្យចាក់វ៉ាក់សាំងបង្ការជំងឺកូវីដ១៩ សម្តេចតេជោ ហ៊ុន សែន នាយករដ្ឋមន្ត្រី។
ដោយសម្តេចបានបញ្ជាក់យយ៉ាងដូច្នេះថា “ម្ជុលទី១ គឺយើងចាក់បានច្រើននាក់ហើយ ជិត ១សែននាក់ហើយ ដូច្នេះនៅសល់ខ្លះទៀត ដែលយើងត្រូវបន្តចាក់ទៀត និយាយរួមគឺត្រូវចាក់ឲ្យអស់នៅកងកម្លាំងប្រដាប់អាវុធ ដែលទទួលបានការអនុញ្ញាតឲ្យចាក់ពីសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា”។
យោងតាមរបាយការណ៍របស់ក្រសួងការពារជាតិ បានឲ្យដឹងថា គិតចាប់ពីថ្ងៃទី១០ ខែកុម្ភៈ រហូតដល់ថ្ងៃទី០៩ ខែមីនា ឆ្នាំ២០២១ ក្រសួងការពារជាតិកម្ពុជា បានចាក់វ៉ាក់សាំងការពារជំងឺកូវីដ១៩ ស៊ីណូហ្វាម (Sinopharm) របស់សាធារណរដ្ឋប្រជាមានិតចិនលើកទី១ ជូនកងកម្លាំងកើនដល់ចំនួនសរុប ៩៨,៥២០នាក់ ខណៈចាក់លើកទី២ បានចំនួន ៣០,៣៦៦នាក់៕ រក្សាសិទ្ធិដោយៈ ចេស្តារ
