នារីវ័យក្មេងម្នាក់ទើបរៀបការរួច មកពីប្រទេសឥណ្ឌា ត្រូវបានគេអះអាងថាបានស្លាប់ដោយសារការគាំងបេះដូង ពីការយំខ្លាំងពេក មុនពេលនាងចាកចេញពីផ្ទះឪពុកម្តាយរបស់នាង ទៅនៅខាងប្តី។
យោងតាមសារព័ត៌មាន News 18 បានឲ្យដឹងថា ហេតុការណ៍នេះបានកើតឡើងនៅក្នុងស្រុក Sonepur នៃរដ្ឋ Odisha ប្រទេសឥណ្ឌា កាលពីថ្ងៃទី៥ ខែមីនា ឆ្នាំ២០២១។ នារីរងគ្រោះមានឈ្មោះ Rosy Sahu គឺស្ថិតនៅឯផ្ទះឪពុកម្តាយរបស់នាង កំពុងរៀបចំធ្វើពិធី “bidaai” ពោលគឺពិធីក្រោយរៀបការ មុនពេលកូនក្រមុំត្រូវបានគេនាំទៅផ្ទះខាងប្តីរបស់នាង ប៉ុន្តែ នៅពេលនោះ នាងស្រាប់តែគាំងបេះដូងភ្លាមៗតែម្តង។
គេបានគេរាយការណ៍ថា Rosy នៅតែមានសុខភាពល្អ ក្នុងពិធីមង្គលការធ្វើឡើងនៅយប់ថ្ងៃទី៤ ខែមីនា។
ទោះជាយ៉ាងណាក៏ដោយ នៅព្រឹកបន្ទាប់ នាងចាប់ផ្តើមយំមិនឈប់ហើយមិនអាចជួយខ្លួនឯងបានទេ។ សាក្សីបាននិយាយថា នាង Rosy យំខ្លាំងពេករហូតដល់នាងដួលសន្លប់។ ភ្ញៀវម្នាក់នៅក្នុងពិធីមង្គលការបាននិយាយថា រ៉ូសនៅតែជួបការលំបាក ព្រោះឪពុកនាងបានទទួលមរណភាព កាលពីប៉ុន្មានខែមុន។
កាសែត Hindustan Times បានឲ្យដឹងថា សមាជិកគ្រួសារនិងសាច់ញាតិបានព្យាយាមធ្វើអ្វីៗគ្រប់យ៉ាង ដើម្បីជួយឱ្យនាង Rosy មានស្មារតីឡើងវិញ ដូចជាការយកទឹកចាក់លើមុខរបស់នាង ប៉ុន្តែវាហាក់ដូចជាគ្មានប្រយោជន៍នោះទេ។ ទីបំផុតពួកគេបាននាំនាងទៅមណ្ឌលសុខភាពសហគមន៍ Dunguripallu ដើម្បីសង្គ្រោះបន្ទាន់ ជាទីកន្លែងដែលគ្រូពេទ្យនៅទីនោះបានប្រកាសថា Rosyបានស្លាប់ហើយ។ មូលហេតុនៃការស្លាប់របស់នាង ត្រូវបានកំណត់ថាជាការគាំងបេះដូង។
អ្នកភូមិម្នាក់ឈ្មោះ Ramesh Sahu បាននិយាយថា “នាងបានបន្តយំ ខណៈពេលដែលនាងត្រូវបានគេនាំទៅផ្ទះខាងប្តីរបស់នាង។ គាត់បានសម្តែងការសោកស្តាយថា៖ថា “យើងមិនរំពឹងថានាងនឹងស្លាប់បែបនេះទេ ព្រោះថា Rosy គឺជាក្មេងស្រីដែលគួរឱ្យស្រឡាញ់”។
សាកសពរបស់ Rosy ត្រូវបានបញ្ជូនទៅពិនិត្យ ហើយលទ្ធផលចុងក្រោយ មិនទាន់បញ្ចេញនៅឡើយទេ៕ រក្សាសិទ្ធិដោយ៖ លឹម ហុង
