រដ្ឋបាល Biden បាននិយាយកាលពីថ្ងៃច័ន្ទថា អ្នកដែលបានចាក់វ៉ាក់សាំងការពារប្រឆាំងនឹងកូវីដ-១៩ ពេញលេញ គឺអាចជួបប្រជុំគ្នាជាក្រុមតូចៗ ជាមួយអ្នកត្រូវបានចាក់វ៉ាក់សាំងបង្ការដទៃៗទៀត ដោយមិនចាំបាច់ពាក់ម៉ាស់ ប៉ុន្តែគួរតែជៀសវាងការធ្វើដំណើរដែលមិនចាំបាច់ ហើយបន្តពាក់មុខនៅទីសាធារណៈ។
ដោយឡែក បើយោងតាមមជ្ឈមណ្ឌលគ្រប់គ្រងនិងបង្ការជំងឺសហរដ្ឋអាមេរិក (CDC) បានប្រកាសថា មនុស្សដែលបានចាក់វ៉ាក់សាំងប្រឆាំងនឹងកូវីដ-១៩ ពេញលេញ គឺអាចជួបជុំគ្នាជាក្រុមតូចៗ ជាមួយបុគ្គលដែលមិនបានទទួលការចាក់វ៉ាក់សាំង ដែលត្រូវបានគេចាត់ទុកថា មានហានិភ័យទាបចំពោះជំងឺកូវីដ-១៩ ពីគ្រួសារមួយផ្សេងទៀត ដោយមិនចាំបាច់បាក់ម៉ាស់នោះទេ។
មជ្ឈមណ្ឌលគ្រប់គ្រងនិងបង្ការជំងឺសហរដ្ឋអាមេរិក បានបញ្ចាក់ថា អ្នកដែលបានចាក់វ៉ាក់សាំងកូវីដ-១៩ ពេញលេញ Dos (ដូស) ចុងក្រោយ ចំនួន២សប្តាហ៍ក្រោយមក ត្រូវបានចាត់ទុកថា ទទួលបានការការពារប្រឆាំងវីរុសដ៏ធ្ងន់ធ្ងរនេះ ខណៈដែលរហូតមកដល់ពេលនេះ ជនជាតិអាមេរិកាំងជាង ៣០ លាននាក់ បានទទួលថ្នាំបង្ការនេះរួចហើយ។
តែទោះយ៉ាងណា CDC ក៏បានណែនាំថា អ្នកចាក់វ៉ាក់សាំងពេញលេញគួរតែបន្តអនុវត្តការប្រុងប្រយ័ត្នបន្ថែមទៀត ដូចជាការជៀសវាងការជួបជុំគ្នាដោយផ្ទាល់, ត្រូវពាក់ម៉ាស់ពេលទៅលេងជាមួយមនុស្សដែលមិនទាន់ទទួលការចាក់វ៉ាក់សាំង ពីគ្រួសារជាច្រើន ឬ ពាក់ម៉ាស់នៅពេលដែលមានហានិភ័យខ្ពស់នៃការគ្របដណ្តប់ពី COVID-19។
នាយក CDC លោកស្រី Rochelle Walensky បានប្រាប់អ្នកយកព័ត៌មានថា វាមានសារៈសំខាន់ណាស់ ក្នុងការការពារអ្នកដែលមិនបានចាក់វ៉ាក់សាំង ហើយនៅតែងាយរងគ្រោះ ខណៈពេលដែលករណីឆ្លងវីរុសថ្មីចំនួន ៦០.០០០ នាក់ កើតឡើងជារៀងរាល់ថ្ងៃ។
លោកស្រីបាននិយាយថា៖ “យើងនៅតែស្ថិតក្នុងដំណាក់កាលរីករាលដាលនៃជំងឺរាតត្បាតធ្ងន់ធ្ងរនេះ ហើយនៅតែមានប្រជាជនជាង ៩០ ភាគរយ មិនបានចាក់វ៉ាក់សាំងពេញលេញ។ ហេតុដូច្នេះហើយ គ្រប់គ្នាមិនថាចាក់វ៉ាក់សាំង រឺអត់ទេ គួរតែបន្តជៀសវាងពីការប្រមូលផ្តុំមធ្យម និងធំ ក៏ដូចជាការធ្វើដំណើរដែលមិនចាំបាច់”៕ រក្សាសិទ្ធិដោយ៖ លឹម ហុង
