ជំនាញធ្វើទីផ្សារឌីជីថល មានសារៈសំខាន់ខ្លាំង ដើម្បីតភ្ជាប់គម្លាតយេនឌ័រផ្នែកឌីជីថល និងនាំយកស្ត្រីកាន់តែច្រើនចូលទៅក្នុងពិភពសហគ្រិនភាព។ នេះបើយោងតាមអ្នកដឹកនាំធុរិកិច្ចជាស្ត្រី ដែលថ្លែងក្នុងក្រុមពិភាក្សា តាមអនឡាញ ដែលរៀបចំដោយក្រុមហ៊ុន Facebook ដើម្បីរំឭកខួបទិវាសិទ្ធិនារីអន្តរជាតិ។
ក្នុងក្រុមពិភាក្សា នៃកម្មវិធីជជែកអំពីអាជីវកម្មជាមួយ Facebook ដែលសម្របសម្រួល ដោយអ្នកនាង ហ៊ាង អូមួយ អគ្គនាយិកាក្រុមហ៊ុនបច្ចេកវិទ្យា ខេសូលូសិន (Camsolution Technology) អ្នកនាង ហុក ស្រីមុំ និងអ្នក នាង អាំ វាសនា ដែលជាសហគ្រិនស្ត្រី បានចែករំលែកបទពិសោធរបស់ពួកគាត់អំពីការដំណើរការអាជីវកម្ម និងបាន ផ្តោតយ៉ាងខ្លាំងលើសារៈសំខាន់នៃវត្តមានតាមអនឡាញ និងការប្រើប្រាស់ការធ្វើទីផ្សារឌីជីថល។
អ្នកនាងហុក ស្រីមុំ ដែលជាសហស្ថាបនិក ក្រុមហ៊ុនអប់រំឈ្មោះថា The Khmer Lesson បានថ្លែងថា៖ «មានគម្លាត ដ៏ធំមួយក្នុងអក្ខរកម្ម ឌីជីថល រវាងបុរស និងស្ត្រី។ មនុស្សជាច្រើន នៅតែគិតថា ស្ត្រីមិនអាចគ្រប់គ្រងអាជីវកម្មបាន គួរតែនៅផ្ទះហើយបុរសជាអ្នករកប្រាក់។ ជួនកាលស្ត្រីខ្លួនឯងក៏គិតផងដែរថា ពិភព “ឌីជីថល” មានន័យថា បច្ចេកវិទ្យាព័ត៌មានវិទ្យា (IT) ដែលពិបាករៀន។ ទាំងអស់នេះបង្កឱ្យមានកង្វះអក្ខរកម្មឌីជីថល។»
ថ្មីៗនេះ អ្នកនាង ស្រីមុំ បានក្លាយជា គ្រូបណ្តុះបណ្តាលម្នាក់នៅកម្មវិធី #SheMeansBusiness ដែលជាកម្មវិធីមួយ ដែលត្រូវបានដំណើរការ ដោយក្រុមហ៊ុន Facebook និងគម្រោងសហគ្រិននារីសកម្មរបស់អង្គការផេកកម្ពុជា ដោយ មានការគាំទ្រពី USAID ដើម្បីផ្តល់ការបណ្តុះបណ្តាលការធ្វើទីផ្សារឌីជីថល ដោយឥតគិតថ្លៃដល់សហគ្រិនជា ស្ត្រីចំនួន ១ ៧០០ នាក់នៅទូទាំងប្រទេសកម្ពុជា តាមរយៈសិក្ខាសាលា និងការបណ្តុះបណ្តាលតាមអនឡាញ និងការបណ្តុះបណ្តាលផ្ទាល់។
គំនិតផ្តួចផ្តើម #SheMeansusiness ជាឱកាសមួយសម្រាប់សហគ្រិនជាស្ត្រីដើម្បីទទួលបានជំនាញដែលចាំបាច់ ក្នុងការពង្រីក និងកែលម្អអាជីវកម្មរបស់ពួកគេ និងដើម្បីពង្រីកបណ្តាញរបស់ខ្លួន។
អ្នកនាង អាំ វាសនា ដែលជាម្ចាស់ហាងកុំព្យូទ័រ BCS Computer ដែលបានបញ្ចប់ដោយជោគជ័យនូវការបណ្តុះបណ្តាល អំពីការធ្វើទីផ្សារ ឌីជីថល ពីកម្មវិធី #SheMeansBusiness បានធ្វើការងារក្នុងផ្នែកលក់និងធ្វើទីផ្សាររយៈពេល ៨ ឆ្នាំ ធ្វើការងារក្នុងការបណ្តុះបណ្តាលនិង បង្វឹកអ្នកផ្សេងទៀត ក្នុងនាមជាអ្នកឯកទេសបច្ចេកទេស និងអ្នកគ្រប់គ្រង ផលិតផល។ ជាមួយនឹងជំនាញដែលទទួលបាននេះ អ្នកនាង ក៏បានសម្រេចចិត្តបើកហាងលក់កុំព្យូទ័រខ្លួនឯង។
ដោយសារចំណេះដឹងដែលទទួលបានថ្មីៗ របស់គាត់អ្នកនាង វាសនា បាននិងកំពុងសម្របខ្លួនទៅនឹងទីផ្សារ អនឡាញ ដើម្បីរក្សាឱ្យអាជីវកម្មរបស់គាត់ ដំណើរការបានក្នុងអំឡុងពេលវេលាដ៏លំបាក ដែលបណ្តាលមកពីការរាតត្បាតជំងឺកូវីដ-១៩។
អ្នកនាង វាសនា បានថ្លែង ថា៖ «ខ្ញុំជឿថាស្ត្រីអាចក្លាយជាអ្នកដឹកនាំ និងសម្រេចបានជោគជ័យ។ នៅពេលមានការរាតត្បាតជំងឺកូវីដ-១៩ អាជីវកម្មរបស់ខ្ញុំ បានរងគ្រោះខ្លាំង ប៉ុន្តែ ដោយសារជំនាញធ្វើទីផ្សារឌីជីថលរបស់ខ្ញុំ ខ្ញុំអាចបង្កើនការលក់អនឡាញ ហើយយើងជួបភាពរុង រឿងម្តងទៀត។ ភាពជឿជាក់ របស់ខ្ញុំ គឺថាមិនត្រូវបោះបង់ចោលឡើយ បើទោះជាខ្ញុំមិនមានចំណេះដឹងគ្រប់គ្រាន់ នៅពេលដំបូងក៏ដោយ ក៏ ខ្ញុំបានបន្តរៀនសូត្រ និងតស៊ូហើយតែងតែព្យាយាមរៀនសូត្រ ពីបទពិសោធទាំងអស់។»
គិតត្រឹមខែមករា ឆ្នាំ២០២១ សហគ្រិនចំនួន ៦០០ នាក់ ត្រូវបានបណ្តុះបណ្តាល ស្ថិតក្រោមកម្មវិធី SheMeansBusiness ហើយនៅត្រឹម ឆ្នាំ ២០២៣ តួលេខនេះ នឹងមានចំនួនយ៉ាងហោចណាស់ ១ ៧០០ នាក់។
លោក ហេង ភក្តី អ្នកគ្រប់គ្រងផ្នែកគោលនយោបាយសាធារណៈរបស់ក្រុមហ៊ុន Facebook ដែលបានចូលរួមក្នុងកិច្ចពិភាក្សាតាមអនឡាញ នេះផងដែរ បានថ្លែងថា៖ «នៅក្រុមហ៊ុន Facebook យើងប្តេជ្ញាចិត្តបង្កើតបរិយាកាសដែលជំរុញសហគ្រិនភាព ក្នុងចំណោមស្ត្រី។ ក្នុងប្រទេសកម្ពុជាយើងបានចាប់ដៃគូជាមួយគម្រោងសហគ្រិននារីសកម្មរបស់អង្គការផេកកម្ពុជាដោយគាំទ្រដោយ USAID ដើម្បីផ្តល់ជូន កម្មវិធីបណ្តុះបណ្តាលស្ដីអំពីការធ្វើទីផ្សារឌីជីថល SheMeansBusiness និងផ្តល់ជូនសហគ្រិនទាំងនេះ នូវជំនាញដែលចាំបាច់ ដើម្បីដំណើរការអាជីវកម្មនៅលើផ្លាតហ្វមឌីជីថល៕»
រក្សាសិទ្ធិដោយ៖CEN
